ناۋرىز مەيرامىندا تۇركىستان قالاسىنداعى جاڭا اتشاباردىڭ اشىلۋىنا وراي ۇيىمداستىرىلعان كوكپاردان الەم چەمپيوناتىندا كوماندالار جوعارى دەڭگەيدەگى شەبەرلىكتەرىن كورسەتىپ, جانكۇيەرلەرگە تارتىستى ءارى اسەرلى ويىن سىيلادى, دەپ جازادى Egemen.kz.
حالىقارالىق باسەكەنىڭ قورىتىندىسى بويىنشا قازاقستان قۇراماسى چەمپيون اتاندى. ولار فينالدا وزبەكستان كوكپارشىلارىن 9:2 ەسەبىمەن جەڭدى. وزبەكستان قۇراماسى ەكىنشى ورىنعا يە بولدى. اۋعانستان كومانداسى ۇزدىك ۇشتىكتى تۇيىندەسە, رەسەي شاباندوزدارى ءتورتىنشى ورىننان كورىندى. جەڭىمپازدار مەن جۇلدەگەرلەر ارنايى ماراپاتتارعا يە بولدى. ولارعا مەدالدار, كۋبوكتار جانە العىسحاتتار تابىستالدى. سونىمەن قاتار جۇلدە قورى دا ۇلەستىرىلىپ, ءبىرىنشى ورىن يەگەرلەرىنە 15 ميلليون تەڭگە, ەكىنشى ورىنعا 7,5 ميلليون تەڭگە, ءۇشىنشى ورىنعا 4,5 ميلليون تەڭگە بەرىلدى. ءتورتىنشى ورىن العان كومانداعا 3 ميلليون تەڭگە كولەمىندە سىياقى تابىستالدى.
سونداي-اق جاڭا اتشاباردا ۇلتتىق سپورتتى دارىپتەۋگە ماقساتىندا بىرنەشە جارىس وتكىزىلدى. مىسالى, ءداستۇرلى ساداق اتۋدان ازيا چەمپيوناتى جوعارى دەڭگەيدە ۇيىمداستىرىلدى. چەمپيوناتقا قازاقستان ۇلتتىق قۇراماسىنان بولەك, موڭعوليا, قىتاي, قىرعىزستان, ءۇندىستان, سولتۇستىك كيپر, تۇركيا, وزبەكستان, رەسەي جانە تايلاند ەلدەرىنەن كەلگەن سپورتشىلار قاتىستى. جالپى سانى 110-عا جۋىق مەرگەن 10 مەملەكەتتىڭ نامىسىن قورعادى.قاتىسۋشىلار بارلىق ساناتتا باق سىناپ, ەرلەر مەن ايەلدەر اراسىندا ۇزدىكتەر انىقتالدى. تارتىستى باسەكە قورىتىندىسىندا قازاقستان قۇراماسى جالپىكوماندالىق ەسەپتە ءبىرىنشى ورىنعا يە بولدى. موڭعوليا قۇراماسى ەكىنشى ورىنعا تۇراقتاسا, قىرعىزستان سپورتشىلارى ۇزدىك ۇشتىكتى تۇيىندەدى.
باتىس قازاقستاندا ۇلتتىق سپورت ليگاسى اشىلدى