ناۋرىزدىڭ 23-ءى كۇنى تۇندە WBA Fedelatin ۆەرسياسى بويىنشا چەمپيوندىق اتاعىن قورعاعان قازاقستاندىق بوكسشى قانات يسلام كولۋمبيالىق ورلاندو دە حەسۋس ەسترادانى 4-راۋندتا نوكاۋتپەن جەڭدى.
ورتا سالماقتا ونەر كورسەتۋشى قازاقستاندىق بوكسشى قانات يسلام كاسىپقويلار رينگىندە وسىمەن 19-شى رەت جەڭىس تويىن تويلادى. 30 جاستاعى قازاقستاندىق كولۋمبيالىق ورلاندو دە حەسۋس ەستراداعا قارسى ۇرىستا WBA Fedelatin ۆەرسياسى بويىنشا چەمپيوندىق اتاعىن ساقتاپ قالدى.
جەكپە-جەك كولۋمبيانىڭ بارانكيليا قالاسىندا ءوتتى. ۇرىستىڭ العاشقى مينۋتىنان باستاپ قانات قارسىلاسىن سوققىنىڭ استىنا الدى. ەكىنشى راۋند تا ءبىزدىڭ بوكسشىنىڭ باسىمدىعىمەن ءوتتى. بىراق باسەكەلەسىن كىندىكتەن تومەن ۇرىپ العان ودان ءبىر ۇپاي كەمىتىلدى. مۇنىڭ ەسەسىنە, قانات كەلەسى راۋندتا كولۋمبيالىقتى ەكى رەت نوكداۋنعا جىبەردى. ءتورتىنشى راۋندتىڭ باسىندا قانات سول قولىنىڭ قارىمىمەن قارسىلاسىن تاعى دا رينگكە ۇشىرىپ ءتۇسىردى. رەفەري نوكداۋن ۋاقىتىن تولىق ساناپ شىقتى. شايقاس قايتا جالعاستى. بىراق تورەشى سالدەن كەيىن ۇرىستى توقتاتىپ, قازاق جىگىتىنىڭ جەڭگەنىن جاريا ەتتى. بۇل قانات يسلامنىڭ 19-شى شايقاسىن دا جەڭىسپەن اياقتاعانىن كورسەتتى. ول بۇلاردىڭ 16-سىندا ايقاستى مەرزىمىنەن بۇرىن اياقتاعان. ازىرگە بىردە-ءبىر رەت جەڭىلىپ كورگەن جوق.
وسى كۇنى كولۋمبيا رينگىنە قازاقستاندىق تاعى ءبىر بوكسشى – جانقوش تۇراروۆ تا كوتەرىلدى. ول دا كولۋمبيالىق بوكسشىمەن ۇرىس وتكىزدى. وسى رەيتينگىلىك ۇرىسىن جەڭىسپەن اياقتاعان جەرلەسىمىز قارسىلاسىن 7-راۋندتا بەت قاراتپاي تاستادى. ءسويتىپ, تورەشىنىڭ شەشىمىمەن وعان جەڭىس بەرىلىپ, قارسىلاسىنا تەحنيكالىق نوكاۋت جازىلدى.
دامير قوجامقۇل.