ناۋرىزناما كۇنتىزبەسىنە سايكەس 20 ناۋرىز – ۇلتتىق سپورت كۇنى. بۇل كۇن ءتول سپورتىمىزدى دارىپتەۋگە, ناسيحاتتاۋعا جانە ونى زاماناۋي ۇردىستەرمەن ۇشتاستىرا وتىرىپ, ۇلتتىق بىرەگەيلىكتى نىعايتۋعا باعىتتالعان ماڭىزدى داتا. بۇگىندە ەلىمىزدە اسىق اتۋ, اۋدارىسپاق, بايگە, ءداستۇرلى ساداق اتۋ, جامبى اتۋ, جەكپە-جەك, كوكپار, قازاق كۇرەسى, قۇسبەگىلىك, تەڭگە ءىلۋ جانە توعىزقۇمالاق سىندى 11 ۇلتتىق سپورت ءتۇرى دامىپ كەلەدى. ونىڭ ىشىندە تورتەۋى يۋنەسكو-نىڭ ماتەريالدىق ەمەس مادەني مۇرالار تىزىمىنە ەنگىزىلگەن. حالىق ىقىلاسى مەن الەم مويىنداعان ۇلتتىق سپورت تۇرلەرىن ۇلىستىڭ ۇلى كۇنى قارساڭىندا ايرىقشا بەدەرلەۋ سانا مەن ءتاندى سەرپىلتىپ قانا قويماي, ۇجىمدىق رۋح سىيلايتىنى ءسوزسىز, دەپ جازادى Egemen.kz.
بۇگىندە ەلىمىزدە ۇلتتىق سپورتتى ناسيحاتتاۋ ءارى جاس بۋىن بويىنا ءسىڭىرۋ تۇرعىسىندا تياناقتى تىرلىك اتقارىلىپ جاتىر. تۋريزم جانە سپورت مينيسترلىگى كەلتىرگەن دەرەككە ساي, قازىر ەل اۋماعىندا 16 555 ۇلتتىق سپورت ۇيىرمەسى جۇمىس ىستەپ تۇر. دۇنيەجۇزىلىك توعىزقۇمالاق قاۋىمداستىعىنىڭ باس حاتشىسى ماقسات شوتاەۆ ناۋرىز قارساڭىندا ۇلتتىق سپورتتىڭ ۇلىقتالۋى بالدىرعانداردىڭ ۇيىرمەدەن ۇيرەنگەندەرىن مەرەكە قارساڭىندا اعا تولقىننىڭ تاجىربيەسىمەن تولىقتىرۋ ۇشىندە ۇتىمدى ەكەنىن اتاپ ءوتتى.
ۇلتتىق سپورت تۇرلەرى: كوكپار مەن قىز قۋ الەمدە قالاي ناسيحاتتالىپ جاتىر
«ۇلتتىق سپورت كۇنى – حالىقتىڭ مادەني مۇراسىن, سالت-ءداستۇرىن جانە تاريحي جادىن جاڭعىرتاتىن ماڭىزدى كۇن. بۇل كۇن تەك ويىن-ساۋىق ەمەس, ۇلتتىڭ رۋحاني بولمىسىن, دۇنيەتانىمىن جانە ءومىر سالتىن كورسەتەتىن ەرەكشە قۇبىلىس. ەڭ الدىمەن, ۇلتتىق ويىنداردىڭ تاربيەلىك ءمانى زور ەكەنىن ەسكەرسەك, جاستاردى ەپتىلىككە, باتىلدىققا, ۇيىمشىلدىققا جانە توزىمدىلىككە باۋليتىنى قۋانتادى. سونىمەن قاتار, ۇلتتىق ويىندار كۇنى – ۇرپاقتار ساباقتاستىعىن جالعايتىن كوپىر. اعا بۋىن ءوز بىلگەنىن كەيىنگىگە ۇيرەتىپ, مادەني مۇرانى ساقتاۋعا ۇلەس قوسادى. بۇل قوعامدا بىرلىك پەن ءوزارا تۇسىنىستىكتى نىعايتادى», دەدى ماقسات شوتاەۆ.
سونداي-اق بىلتىردان باستاپ ۇلتتىق سپورت تۇرلەرى وليمپيادالىق سپورت تۇرلەرىمەن قاتار باسىمدىققا يە بولدى. بۇل ۇلتتىق سپورت وكىلدەرىنىڭ شەبەرلىگىن شىڭداۋعا سەپتىگىن تيگىزەتىن ماقساتتى قارجىلاندىرۋعا جول اشىپ وتىر. دۇنيەجۇزىلىك توعىزقۇمالاق قاۋىمداستىعىنىڭ باس حاتشىسى ۇلتتىق ويىنداردىڭ ادامزاتتىق قۇندىلىققا اينالۋى ولاردىڭ امبەباپ قاسيەتتەرىمەن دە بايلانىستى ەكەنىن ەرەكشە ەكشەدى.
ۇلتتىق سپورت – تابىس كوزى
«كەز كەلگەن حالىقتىڭ ويىندارىندا ادىلدىك, دوستىق, ىنتىماقتاستىق, قۇرمەت سياقتى ورتاق قۇندىلىقتار كورىنىس تابادى. سوندىقتان ۇلتتىق ويىندار تەك ءبىر ۇلتقا عانا ەمەس, بۇكىل ادامزاتقا ورتاق رۋحاني بايلىق رەتىندە باعالانادى. قازىرگى جاھاندانۋ داۋىرىندە ۇلتتىق ويىنداردى ساقتاۋ – مادەني ارتۇرلىلىكتى قورعاۋدىڭ ماڭىزدى بولىگى. ولار ارقىلى ءار حالىق وزىندىك ەرەكشەلىگىن ساقتاي وتىرىپ, الەمدىك مادەنيەتكە ۇلەس قوسادى. ۇلتتىق ويىندار ءتۇرلى ەلدەر اراسىندا مادەني بايلانىس ورناتىپ, حالىقتار دوستىعىن نىعايتۋعا ىقپال ەتەدى. ال وسىنداي قىراعى قىزمەت اتقاراتىن ۇلتتىق سپورتتىڭ مەرەكە اياسىندا ايتۋلى تويلانۋى قۋانتادى», دەپ اتاپ ءوتتى ماقسات شوتاەۆ.
ولجاسى مول ۇلتتىق سپورت
جالپى ەلىمىزدە «اقبيداي» اۋىل سپورت ويىندارى, «قازاقستان بارىسى» ءتۋرنيرى, « ۇلى دالا جورىعى» مارافون-بايگەسى جانە ەتنوسپورت بويىنشا ءتۇرلى فەستيۆالدەر جىل بويى ۇيىمداستىرىلادى. ەڭبەكتەگەن بالادان, ەڭكەيگەن قارياعا دەيىن قىزىعا اتسالىساتىن سپورت تارتىستارى ونى ۇزدىكسىز ۇگىتتەۋگە ۇلەس قوسىپ جاتىر.