استاناداعى اۋدانارالىق قىلمىستىق ىستەر سوتىندا پوليتسيا قىزمەتكەرلەرى اراسىنداعى جانجالعا قاتىستى ءىس قارالدى. ەسىل اۋدانىنىڭ پوليتسيا باسشىسىنىڭ بۇرىنعى ورىنباسارى ءالي ابەتاەۆ باسشىسى ساكەن نوعاەۆتى ۇرعانى ءۇشىن كىنالى دەپ تانىلدى, دەپ حابارلايدى Egemen.kz.
سوت مالىمەتىنە سايكەس, وقيعا 2025 جىلعى 5 شىلدەدە مەيرامحانالاردىڭ ءبىرىنىڭ ارتقى اۋلاسىندا بولعان. ابەتاەۆ نوعاەۆتان نەگە تەلەفون قوڭىراۋلارىنا جاۋاپ بەرمەگەنىن سۇراعان. نوعاەۆ تەلەفونى ىستەمەي قالعانىن ايتقان.
«كەيىن ابەتاەۆ ونى سوققىعا جىققان. سونداي-اق بىرنەشە رەت باسىنان جانە بەتىنەن ۇرعان. جابىرلەنۋشى شەتكە تايساقتاعانىمەن, شابۋىلشى سوققىسىن توقتاتپاعان. ولار كولىكتەر اراسىنداعى ارالىققا تۇسكەندە ابەتاەۆ نوعاەۆقا قايتا سوققى جاساپ, ودان كەيىن قىلعىندىرۋ ءتاسىلىن قولدانعان», دەلىنگەن سوت ماتەريالدارىندا.
شابۋىل ناتيجەسىندە جابىرلەنۋشى جەڭىل دەنە جاراقاتىن العان. سوت ابەتاەۆقا ءبىر جىلعا دەيىن بوستاندىعىن شەكتەۋ جازاسىن تاعايىندادى.
سونداي-اق سوت ىشكى ىستەر مينيسترىنە قاتىستى جەكە ەسكەرتۋ شىعاردى. قۇجاتتا پوليتسيا قىزمەتكەرىنىڭ ارەكەتى قۇقىق قورعاۋ ورگاندارىنىڭ بەدەلىن تۇسىرگەنى اتاپ وتىلگەن.
سوتتىڭ قورىتىندى مالىمەتىندە:
«ابەتاەۆ قۇقىق قورعاۋ ورگانى قىزمەتكەرى ەكەنىن جاقسى بىلە وتىرىپ, سانالى تۇردە ارەكەت ەتكەن جانە وسىلايشا ءىىم-ءنىڭ بەدەلىن جانە مەملەكەتتىك بيلىك ينستيتۋتىنىڭ ابىرويىن تۇسىرگەن», دەلىنگەن.
ەسكە سالا كەتەيىك, بوكستان ەكى دۇركىن الەم چەمپيونى, لوندون وليمپياداسىنىڭ چەمپيونى سەرىك ساپيەۆ ءوزىنىڭ ورىنباسارى داۋرەن ەسىمحانوۆپەن جانجالداسىپ قالىپ, كەيىن ولار قىزمەتىنەن كەتكەن ەدى.