ابۋ-دابي قالاسىندا اسكەري شيەلەنىس كەزىندە ءتۇرلى نىسانداردى ۆيدەوعا ءتۇسىرىپ, ونى الەۋمەتتىك جەلىلەردە جاريالاعان 45 ادام ۇستالدى, دەپ حابارلايدى Egemen.kz.
بيلىك وكىلدەرىنىڭ مالىمەتىنشە, ولار ناقتى ەمەس ءارى قوعامدى جاڭىلىستىرۋى مۇمكىن اقپارات تاراتتى دەگەن كۇدىككە ىلىنگەن. مۇنداي ماتەريالدار قوعامدىق پىكىردى قوزدىرىپ, قاۋەسەتتەردىڭ تارالۋىنا سەبەپ بولۋى مۇمكىن ەكەنى ايتىلدى.
بيلىك سونداي-اق ۇشقىشسىز ۇشۋ اپپاراتتارىنىڭ شابۋىلدارىنا قاتىستى كادرلاردى تۇسىرۋگە جانە جاريالاۋعا بىرىككەن اراب امىرلىكتەرى اۋماعىندا تىيىم سالىنعانىن ەسكەرتتى. مۇنداي ارەكەتتەر ەل قاۋىپسىزدىگىنە جانە اسكەري وپەراتسيالاردىڭ جۇرگىزىلۋىنە كەرى اسەر ەتۋى مۇمكىن.
بۇعان دەيىن دۋباي قالاسىندا دا وسىنداي ارەكەتتەر ءۇشىن 21 ادام ۇستالعان. ولار يراننىڭ ءباا اۋماعىنا جاساعان سوققىلارىنا قاتىستى جالعان اقپارات پەن ارانداتۋشىلىق ماتەريالدار تاراتتى دەپ ايىپتالعان.
ايتا كەتەيىك, يزرايل 28 اقپاندا تاڭەرتەڭ يرانعا سوققى جاسادى. شابۋىلدى ەلدىڭ قورعانىس مينيسترى يسراەل كاتس راستادى. تەگەران قالاسىندا كەمىندە ءۇش جارىلىس بولدى.سونىمەن قاتار دۋباي, ابۋ-دابي جانە راس-ەل-حايمادا جۇرگەن قازاقستان ازاماتتارى رەيستەردىڭ توقتاتىلۋىنا بايلانىستى ەلگە قايتا الماي قالعان. ال «قازپوشتا» تاياۋ شىعىستاعى جاعدايدىڭ شيەلەنىسۋىنە بايلانىستى حالىقارالىق پوشتا جونەلتىلىمدەرىنە ۋاقىتشا شەكتەۋلەر قويىلعانىن مالىمدەدى.
بۇعان دەيىن تاياۋ شىعىستاعى قاقتىعىس سالدارىنان 13 رەيس توقتاتىلعانىن جازعان بولاتىنبىز. سونداي-اق تاياۋ شىعىستاعى احۋالدىڭ ۋشىعۋىنا بايلانىستى قازاقستاننىڭ شەت ەلدەردەگى مەكەمەلەرىنىڭ جەدەل بايلانىس جانە «جەدەل جەلى» نومىرلەرىنىڭ ىسكە قوسىلعانى حابارلانعان ەدى.