14 ناۋرىز – كورىسۋ كۇنىنە وراي ۇلتتىق ۇلان اسكەري قىزمەتشىلەرى اتا-انالارى مەن جاقىندارىمەن بايلانىسىپ, مەرەكەلىك قۇتتىقتاۋلارىن جەتكىزدى. اسكەري بورىشىن وتەپ جۇرگەن ساربازدار ءۇشىن بۇل كۇن تۋعان-تۋىسپەن اماندىق سۇراسىپ, ساعىنىشىن باساتىن ەرەكشە ساتتەردىڭ ءبىرى بولدى, دەپ جازادى Egemen.kz.
5451 اسكەري ءبولىمىنىڭ ساربازدارى مەرەكەلىك كۇنى تەلەفون ارقىلى اتا-انالارىمەن حابارلاسىپ, ولاردىڭ حال-جاعدايىن سۇراپ, جىلى تىلەكتەرىن ءبىلدىردى. كۇندەلىكتى اسكەري تارتىپكە ساي قىزمەت اتقارىپ جۇرگەن ۇلاندىقتار ءۇشىن وتباسىمەن تىلدەسۋ ۇلكەن قۋانىش پەن رۋحاني دەم بەرەدى.
كورىسۋ كۇنى – حالقىمىزدىڭ ەجەلدەن كەلە جاتقان داستۇرلەرىنىڭ ءبىرى. بۇل كۇنى ادامدار ءبىر-بىرىمەن اماندىق سۇراسىپ, ۇلكەندەرگە قۇرمەت كورسەتەدى. 5451 اسكەري ءبولىمىنىڭ ۇلاندىقتارى دا وسى ءداستۇردى جالعاستىرىپ, اتا-انالارىنا العىستارىن ايتىپ, ولاردىڭ قولداۋى مەن باتاسىنىڭ ماڭىزدىلىعىن جەتكىزدى.
«ناۋرىزناما»: ەلوردادا كورىسۋ كۇنى قالاي اتاپ وتىلەدى؟
اتا-انالار ءوز كەزەگىندە بالالارىنا اق باتاسىن بەرىپ, ەل تىنىشتىعىن كۇزەتىپ جۇرگەن ۇلدارىنا ريزاشىلىقتارىن ءبىلدىردى. ولار ساربازداردىڭ وتان الدىنداعى بورىشىن ابىرويمەن ورىنداپ جۇرگەنىنە ماقتانىشتارىن جاسىرمادى.
ايتا كەتەيىك, 5451 اسكەري ءبولىمىنىڭ اسكەري قىزمەتشىلەرى تەك قوعامدىق قاۋىپسىزدىكتى قامتاماسىز ەتىپ قانا قويماي, ۇلتتىق داستۇرلەردى دارىپتەۋگە دە ەرەكشە ءمان بەرەدى. وسىنداي يگى شارالار ساربازداردىڭ رۋحىن كوتەرىپ, تۋعان-تۋىسپەن بايلانىسىن نىعايتا تۇسەدى.
ەلىمىزدە جالپىحالىقتىق ناۋرىزناما ونكۇندىگى باستالدى