قىزىلشا – بالالار اراسىندا ەڭ جۇقپالى اۋرۋلاردىڭ ءبىرى. سوڭعى جىلدارى الەمنىڭ بىرقاتار ەلىندە ۆاكتسيناتسيا دەڭگەيىنىڭ تومەندەۋىنە بايلانىستى قىزىلشا اۋرۋىنىڭ ءورشۋى بايقالىپ وتىر, دەپ جازادى Egemen.kz.
اۋرۋدىڭ بەلگىلەرىن قالاي بىلۋگە جانە بالانى قالاي قورعاۋعا بولاتىنى تۋرالى الماتىداعى №36 قالالىق ەمحانانىڭ ينفەكتسيونيست دارىگەرى, مەديتسينا عىلىمدارىنىڭ كانديداتى جانات دوسباەۆا ايتىپ بەردى. مامانىڭ ايتۋىنشا, ناۋقاسپەن بايلانىستا بولعان جاعدايدا ەكپە الماعان ادامنىڭ جۇقتىرۋ ىقتيمالدىعى شامامەن 100 پايىزعا جۋىق.
ناۋقاسپەن بايلانىستان كەيىن العاشقى بەلگىلەر پايدا بولعانعا دەيىن 7-21 كۇنگە دەيىن ينكۋباتسيالىق كەزەڭ وتەدى. اۋرۋ بىرنەشە كەزەڭمەن داميدى. بىرنەشە كۇنگە سوزىلاتىن پرودرومالدى كەزەڭدە بالانىڭ دەنە قىزۋى 38-40°C-قا دەيىن كوتەرىلەدى, السىزدىك بايقالادى, مۇرىننان سۋ اعىپ, قۇرعاق جوتەل پايدا بولادى, كوز قىزارىپ, جارىققا سەزىمتالدىق ارتادى. قىزىلشاعا ءتان نەگىزگى بەلگىلەردىڭ ءبىرى – ۇرتتىڭ شىرىشتى قابىعىندا پايدا بولاتىن بەلسكي-فيلاتوۆ-كوپليك داقتارى, ياعني قىزىل جيەكتى ۇساق اق نۇكتەلەر.
كەلەسى كەزەڭدە بورتپە پايدا بولادى. الدىمەن ول بەتتە جانە قۇلاقتىڭ ارتىنا شىعىپ, كەيىن بىرتىندەپ بۇكىل دەنەگە تارايدى. بۇل كەزدە دەنە قىزۋى 39-40 °C-قا دەيىن كوتەرىلۋى مۇمكىن, ۋلانۋ بەلگىلەرى كۇشەيەدى. ساۋىعۋ كەزەڭىندە بورتپە بىرتىندەپ جوعالادى, الايدا تەرىدە ۋاقىتشا پيگمەنتاتسيا مەن قابىرشاقتانۋ ساقتالۋى مۇمكىن. اۋرۋدان كەيىن ەكى-ءۇش اپتا بويى يممۋنيتەت السىرەيدى, سوندىقتان اعزا باسقا ينفەكتسيالارعا وسال بولادى.
قىزىلشا اۋىر اسقىنۋلارعا اكەلۋى مۇمكىن. ولاردىڭ قاتارىندا وسى اۋرۋدان بولاتىن ءولىم-ءجىتىمنىڭ نەگىزگى سەبەپتەرىنىڭ ءبىرى سانالاتىن پنەۆمونيا, مي قابىنۋى — ەنتسەفاليت, ەستۋ قابىلەتىنىڭ تومەندەۋىنە اكەلۋى مۇمكىن وتيت, سونداي-اق لارينگيت, تراحەيت جانە برونحيت سياقتى تىنىس جولدارىنىڭ اۋرۋلارى بار.
قىزىلشا ۆيرۋستىق ينفەكتسيا بولعاندىقتان, وعان قارسى ارنايى ءدارى جوق. ەمدەۋ نەگىزىنەن اۋرۋ بەلگىلەرىن جەڭىلدەتۋگە جانە اسقىنۋلاردىڭ الدىن الۋعا باعىتتالادى. دارىگەرلەر بالانىڭ توسەكتە تىنىعۋىن قامتاماسىز ەتۋگە, بولمەنى ءجيى جەلدەتۋگە, اۋانى ىلعالداندىرۋعا جانە سۋدى كوپ ىشكىزۋگە كەڭەس بەرەدى. جارىققا سەزىمتالدىق بولعان جاعدايدا بولمەدە جارىقتى باسەڭدەتكەن ءجون. دارىگەردىڭ نۇسقاۋىمەن قىزۋ تۇسىرەتىن دارىلەر, انتيگيستاميندىك پرەپاراتتار جانە ا دارۋمەنى قولدانىلۋى مۇمكىن. انتيبيوتيكتەر قىزىلشا ۆيرۋسىنا اسەر ەتپەيدى جانە تەك باكتەريالىق اسقىنۋلار پايدا بولعان جاعدايدا عانا تاعايىندالادى.
ەگەر بالا قىزىلشامەن اۋىرعان اداممەن بايلانىستا بولسا, ونى بالاباقشاعا, مەكتەپكە جانە قوعامدىق ورىندارعا اپارماۋ قاجەت. دارىگەردى ۇيگە شاقىرىپ, بالانىڭ دەنە قىزۋىن جانە جالپى جاعدايىن باقىلاپ, ينفەكتسيانىڭ تارالۋىن بولدىرماۋ ءۇشىن ونى باسقا بالالاردان ۋاقىتشا وقشاۋلاۋ ماڭىزدى.
قىزىلشانىڭ الدىن الۋدىڭ ەڭ سەنىمدى جولى – ۆاكتسيناتسيا. ەكپە قىزىلشا, پاروتيت جانە قىزامىقتان قورعايتىن بىرىكتىرىلگەن ققپ ۆاكتسيناسىنىڭ قۇرامىنا كىرەدى. ۆاكتسينا بالالارعا 1 جاستا جانە 6 جاستا سالىنادى. ەكى دوزا ۆاكتسينا 97 پايىزعا دەيىن قورعانىس قالىپتاستىرىپ, تۇراقتى يممۋنيتەت بەرەدى. ەكپەدەن كەيىن كەي جاعدايدا دەنە قىزۋىنىڭ ازداپ كوتەرىلۋى نەمەسە قىسقا مەرزىمدى بورتپە سىندى اعزانىڭ جەڭىل رەاكتسيالارى بايقالۋى مۇمكىن.
ماماننىڭ ايتۋىنشا, كەيبىر اتا-انالار ءدىني كوزقاراستارعا بايلانىستى نەمەسە الەۋمەتتىك جەلىلەردەگى جالعان اقپاراتتىڭ اسەرىنەن ۆاكتسينادان باس تارتادى. سونداي-اق, ەكپە اۋتيزمگە اكەلەدى دەگەن جاڭساق پىكىر دە بار. الايدا اۋتيزم بەلگىلەرى ءاردايىم بىردەن بايقالمايدى, سوندىقتان دياگنوز كەيىن قويىلعان كەزدە كەيبىر اتا-انالار ونى بۇرىن جاسالعان ۆاكتسينامەن بايلانىستىرىپ, قاتەلەسەدى.
قازاقستانداعى ەپيدەميولوگيالىق جاعدايدى تۇراقتاندىرۋ ماقساتىندا قر باس مەملەكەتتىك سانيتاريالىق دارىگەرىنىڭ قاۋلىسى قابىلدانعان. قۇجاتقا سايكەس قىزىلشا, قىزامىق جانە پاروتيتكە قارسى ۆاكتسيناتسيا 6 ايدان 10 اي 29 كۇنگە دەيىنگى بالالارعا, ەكپە الماعان 2-5 جانە 7-18 جاستاعى بالالارعا, سونداي-اق ەكپە الماعان 30 جاسقا دەيىنگى مەديتسينا قىزمەتكەرلەرى مەن دەنساۋلىق ساقتاۋ ۇيىمدارىنىڭ قىزمەتكەرلەرىنە جۇرگىزىلەدى.
مينيسترلىك: قىزىلشاعا قاتىستى ەپيدەميولوگيالىق احۋال جاقسارماي تۇر
ۆاكتسيناتسيا ەگىلەتىن ادامنىڭ نەمەسە ونىڭ زاڭدى وكىلىنىڭ اقپاراتتاندىرىلعان كەلىسىمى الىنعاننان كەيىن عانا سالىنادى.
مامان قىزىلشا تەك بالالار اراسىندا كەزدەسەتىن جەڭىل اۋرۋ ەمەس, اۋىر اسقىنۋلارعا اكەلۋى مۇمكىن قاۋىپتى ۆيرۋستىق ينفەكتسيا ەكەنىن ەسكە سالادى. سوندىقتان بالالاردىڭ دەنساۋلىعىن قورعاۋدىڭ ەڭ ءتيىمدى جولى – ۋاقىتىلى ۆاكتسيناتسيا.
قىزىلشاعا قارسى ەكپە مەديتسينا قىزمەتكەرلەرىنە دە سالىناتىن بولدى