استاناداعى تاۋەلسىزدىك سارايىندا وتكەن بارلىق دەڭگەيدەگى ءماسليحات دەپۋتاتتارىنىڭ ءىىى رەسپۋبليكالىق فورۋمىندا مەملەكەت باسشىسى قاسىم-جومارت توقاەۆ الەمدەگى كۇردەلى گەوساياسي احۋالعا قاراماستان قازاقستان ەكونوميكاسى تۇراقتى دامىپ كەلە جاتقانىن ايتتى, دەپ جازادى Egemen.kz.
پرەزيدەنتتىڭ سوزىنشە, قازىرگى تاڭدا جاھاندىق ساياسي-ەكونوميكالىق جاعداي كۇردەلەنە تۇسكەن. اسكەري قاقتىعىستار مەن «ساۋدا سوعىستارىنىڭ» ۋشىعۋى مەملەكەتتەر اراسىنداعى ءوزارا سەنىمنىڭ السىرەۋىنە اكەلىپ وتىر.
«قازىر الەمدەگى ساياسي-ەكونوميكالىق احۋال اسا كۇردەلى. اسكەري قاقتىعىستار, «ساۋدا سوعىسى» جىلدان جىلعا ۋشىعىپ بارادى. بۇل – ءىرى مەملەكەتتەر اراسىنداعى سەنىم داعدارىسىنىڭ جانە ولاردىڭ حالىقارالىق قاۋىمداستىق الدىنداعى جاۋاپكەرشىلىكتى ەسكەرمەۋىنىڭ سالدارى. مۇنىڭ ءبارى ەلىمىزدىڭ مۇمكىندىكتەرىن شەكتەپ وتىر», دەدى پرەزيدەنت.
توقاەۆ: الەمدەگى اسا كۇردەلى احۋالعا قاراماستان, ۇلتتىق ستراتەگيامىزدى بىرتىندەپ جۇزەگە اسىرىپ جاتىرمىز
سوعان قاراماستان قازاقستان ۇلتتىق دامۋ ستراتەگياسىن كەزەڭ-كەزەڭىمەن جۇزەگە اسىرىپ, تۇراقتى ءوسىمدى ساقتاپ وتىرعانىن ايتتى.
«بىلتىر قازاقستاننىڭ ىشكى جالپى ءونىمى 306 ميلليارد دوللار بولدى. بۇل – تاۋەلسىز مەملەكەتتەر دوستاستىعى ەلدەرى اراسىنداعى ەكىنشى ورىن جانە ايماقتاعى ەڭ جوعارى كورسەتكىشتەردىڭ ءبىرى. سونىڭ ناتيجەسىندە ءبىز الەمدەگى ەكونوميكاسى اسا ءىرى 50 ەلدىڭ قاتارىنا قوسىلدىق. بيىل بۇل كورسەتكىش 320 ميلليارد دوللارعا جەتەدى دەپ بولجانىپ وتىر», دەدى مەملەكەت باسشىسى.
پرەزيدەنتتىڭ ايتۋىنشا, قازاقستان ورتالىق ازيادا شەتەلدىك ينۆەستيتسيا تارتۋ بويىنشا دا كوش باستاپ تۇر. ەل ەكونوميكاسىنا 150 ميلليارد دوللاردان استام تىكەلەي ينۆەستيتسيا تارتىلعان. بۇل – وڭىردەگى بارلىق ينۆەستيتسيانىڭ 69 پايىزى.
بىلتىر اۋىل شارۋاشىلىعى سالاسىندا 250 ءوندىرىس اشىلدى
سونىمەن قاتار ەلدىڭ التىن-ۆاليۋتا قورى 74 ميلليارد دوللارعا جەتكەن. ال ۇلتتىق قوردى قوسا ەسەپتەگەندەگى جالپى جيناقتالعان رەزەرۆ كولەمى 139 ميلليارد دوللاردى قۇرايدى.
ء«بىر سوزبەن ايتقاندا, ۇلتتىق ەكونوميكامىز تۇراقتى ءوسىپ كەلەدى. ەڭ باستىسى – بۇل ساپالى ءوسىم», دەدى قاسىم-جومارت توقاەۆ.
پرەزيدەنت ەكونوميكاداعى قۇرىلىمدىق ماسەلەلەرگە دە توقتالدى. ونىڭ ايتۋىنشا, ۇزاق جىلدار بويى ەكونوميكانىڭ بىرجاقتى دامۋى, ءوندىرىس پەن اۋىل شارۋاشىلىعىنىڭ باياۋ قارقىنى, سونداي-اق ينفراقۇرىلىمنىڭ توزۋى ەل دامۋىنا كەدەرگى بولعان.
«كوممۋنالدىق شارۋاشىلىق, ەنەرگەتيكا, سۋ جانە جول ينفراقۇرىلىمىنىڭ توزىعى جەتتى. الايدا ۇكىمەتتىڭ ناقتى ماقساتتارعا باعىتتالعان جۇمىسىنىڭ ارقاسىندا احۋال بىرتىندەپ وزگەرىپ جاتىر», دەدى مەملەكەت باسشىسى.
پرەزيدەنتتىڭ ايتۋىنشا, قازاقستان جاڭا يندۋستريالىق, ەنەرگەتيكالىق جانە ينفراقۇرىلىمدىق نەگىز قالىپتاستىرۋعا كىرىسكەن. سونىڭ ناتيجەسىندە وڭدەۋ ونەركاسىبى سوڭعى ەكى جىلدا 6 پايىزدان استام ءوسىم كورسەتكەن.
پرەزيدەنت: 2025 جىلى 1500 شاقىرىم تەمىر جول سالىنىپ, جوندەۋدەن ءوتتى
وتكەن جىلى ەلىمىزدىڭ ءار وڭىرىندە جالپى قۇنى 1,5 تريلليون تەڭگە بولاتىن 190 ءوندىرىس ورنى ىسكە قوسىلعان. سونىڭ ارقاسىندا 22 مىڭنان استام تۇراقتى جۇمىس ورنى اشىلدى.
بيىل دا بۇل ءۇردىس جالعاسادى. ۇكىمەتتىڭ بولجامى بويىنشا قۇنى 1,7 تريلليون تەڭگە بولاتىن 200 جاڭا كاسىپورىن ىسكە قوسىلىپ, 20 مىڭعا جۋىق جۇمىس ورنى اشىلادى.
«وسىلايشا قازاقستاننىڭ يندۋستريالىق الەۋەتى قايتا جاندانا تۇسەدى. ونەركاسىپتىڭ جاڭا سالالارى قالىپتاسادى. مىسالى, ماشينا جاساۋ جانە ەلەكتر تەحنيكاسى جابدىقتارىن ءوندىرۋ باعىتتارى قارقىندى دامىپ كەلەدى», دەدى پرەزيدەنت.