سىرتقى ىستەر مينيسترلىگىنىڭ رەسمي وكىلى ەرلان جەتىباەۆ تاياۋ شىعىستاعى قاقتىعىستاردىڭ تولاستاماۋىنا بايلانىستى ەل ازاماتتارىنا وڭىرگە بارۋدان باس تارتۋدى ۇسىندى, دەپ جازادى Egemen.kz.
ەرلان جەتىباەۆتىڭ ايتۋىنشا, سىرتقى ىستەر ءمينيسترىنىڭ بۇعان دەيىنگى ەسكەرتۋلەرىنە قاراماستان كەيبىر ازاماتتار ءوڭىر ەلدەرىنە ساپارىن جالعاستىرۋدى جوسپارلاعان.
سوندىقتان ۆەدومستۆو تاياۋ شىعىستا اسكەري ءىس-قيمىلداردىڭ جالعاسۋىنا جانە بىرقاتار ەلدە اۋە كەڭىستىگىنىڭ جابىلۋىنا بايلانىستى ازاماتتارعا جاعداي تولىق تۇراقتانعانعا دەيىن باحرەين, مىسىر, يزرايل, يەمەن, يوردانيا, يران, قاتار, ساۋد ارابياسى, تۇركيا, ليۆان, بىرىككەن اراب امىرلىكتەرى, ومان جانە سيريا سىندى ەلدەرگە بارۋدان باس تارتۋدى ۇسىنىپ وتىر.
سونداي-اق مينيسترلىكتىڭ رەسمي وكىلى تاياۋ شىعىستا جۇرگەن ەل ازاماتتارىنا مىنا ەرەجەلەردى قاتاڭ ساقتاۋدى ەسكەرتتى:
جەكە قاۋىپسىزدىك شارالارىن كۇشەيتۋ; قاۋىپتى ايماقتارعا بارماۋ; جەرگىلىكتى بيلىك ورگاندارىنىڭ نۇسقاۋلارىن ورىنداۋ; زىمىران سوققىسىنا قاتىستى قاۋىپ تۋىنداعان جاعدايدا دەرەۋ باسپانالارعا نەمەسە پانالاۋ ورىندارىنا بارۋ; قازاقستاننىڭ شەتەلدەگى ديپلوماتيالىق مەكەمەلەرى, تۋروپەراتورلار جانە اۋە تاسىمالداۋشىلارىمەن تۇراقتى بايلانىستا بولۋ.ايتا كەتەيىك, ەۆاكۋاتسيا جۇمىستارى باستالعالى بەرى تاياۋ شىعىس ەلدەرىنەن 8 585 قازاقستان ازاماتى ەلگە قايتارىلدى.
ەسكە سالا كەتەيىك, يزرايل 28 اقپاندا تاڭەرتەڭ يرانعا سوققى جاسادى. دۋباي, ابۋ-دابي جانە راس-ەل-حايمادا جۇرگەن قازاقستان ازاماتتارى رەيستەردىڭ توقتاتىلۋىنا بايلانىستى ەلگە قايتا الماي قالعان. ال «قازپوشتا» تاياۋ شىعىستاعى جاعدايدىڭ شيەلەنىسۋىنە بايلانىستى حالىقارالىق پوشتا جونەلتىلىمدەرىنە ۋاقىتشا شەكتەۋلەر قويىلعانىن مالىمدەدى.
بۇعان دەيىن تاياۋ شىعىستاعى قاقتىعىس سالدارىنان 13 رەيس توقتاتىلعانىن جازعان بولاتىنبىز. سونداي-اق تاياۋ شىعىستاعى احۋالدىڭ ۋشىعۋىنا بايلانىستى قازاقستاننىڭ شەت ەلدەردەگى مەكەمەلەرىنىڭ جەدەل بايلانىس جانە «جەدەل جەلى» نومىرلەرىنىڭ ىسكە قوسىلعانى حابارلانعان ەدى.
ال قازىر ەلىمىزدىڭ سىرتقى ىستەر مينيسترلىگى تاياۋ شىعىس ەلدەرىنەن ازاماتتارىمىزدى ەۆاكۋاتسيالاۋ جۇمىسىن بەلسەندى اتقارىپ جاتىر.