قاراعاندى وبلىسىنىڭ تۇرعىندارىنا كوممۋنالدىق قىزمەتتەر ءۇشىن 3,1 ملرد تەڭگەدەن استام قاراجات قايتارىلادى. اتالعان قارجىنى تابيعي مونوپوليا سۋبەكتىلەرى تاريف ارقىلى جيناعانىمەن, جوسپارلانعان جۇمىستار مەن شىعىندارعا تولىق پايدالانىلماعان, دەپ حابارلايدى Egemen.kz.
قاراعاندى وبلىسى بويىنشا تابيعي مونوپوليالاردى رەتتەۋ كوميتەتى دەپارتامەنتى 2024 جىلعا ارنالعان ەسەپتەردى تالداۋ قورىتىندىسىن جاريالادى.
دەپارتامەنت ماماندارى 73 تابيعي مونوپوليا سۋبەكتىسى ۇسىنعان 200 ەسەپتى زەردەلەگەن. ونىڭ ىشىندە تاريفتىك سمەتالاردىڭ ورىندالۋى مەن ينۆەستيتسيالىق باعدارلامالاردىڭ جۇزەگە اسىرىلۋىنا قاتىستى قۇجاتتار بار.
تالداۋ ناتيجەسىندە 18 تابيعي مونوپوليا سۋبەكتىسى بەكىتىلگەن تاريفتىك سمەتالاردا قاراستىرىلعان جۇمىستار مەن شىعىنداردى تولىق ورىنداماعانى انىقتالعان.
قولدانىستاعى زاڭناماعا سايكەس, مۇنداي جاعدايدا تۇتىنۋشىلارعا قاراجاتتى قايتارۋ ءۇشىن وتەمدىك تاريف ەنگىزىلەدى. وسى تەتىك ارقىلى وبلىس تۇرعىندارىنا ۇلتتىق بانكتىڭ قايتا قارجىلاندىرۋ مولشەرلەمەسى ەسكەرىلە وتىرىپ, 3,1 ملرد تەڭگە قايتارىلادى.
وتەمدىك تاريفتەر 2026 جىلعى 1 قاڭتاردان 2027 جىلعى 1 ناۋرىزعا دەيىن قولدانىلادى.
شىمكەنتتىڭ كوممۋنالدىق قىزمەتى شەتەلدىك كومپانياعا بەرىلە مە؟
قاراجات قالاي بولىنەدى؟قايتارىلاتىن قاراجات كوممۋنالدىق قىزمەت تۇرلەرى بويىنشا مىناداي كولەمدە بولىنەدى:
− سۋمەن جابدىقتاۋ جانە سۋ بۇرۋ قىزمەتتەرى – 2,27 ملرد تەڭگە;− ەلەكتر ەنەرگياسىن جەتكىزۋ قىزمەتتەرى – 669,6 ملن تەڭگە;− جىلۋمەن جابدىقتاۋ قىزمەتتەرى – 107,7 ملن تەڭگە;− كىرمە جولدار قىزمەتتەرى – 3,7 ملن تەڭگە;− گازبەن جابدىقتاۋ قىزمەتتەرى – 55,6 ملن تەڭگە.
مامانداردىڭ ايتۋىنشا, بۇل شارا تاريف ارقىلى جينالعان, بىراق جوسپارلانعان باعىتتارعا جۇمسالماعان قاراجاتتى تۇتىنۋشىلارعا قايتارۋعا مۇمكىندىك بەرەدى.
دەپارتامەنت وكىلدەرى تاريفتىك سمەتالار مەن ينۆەستيتسيالىق باعدارلامالاردىڭ ورىندالۋىن باقىلاۋ جۇمىستارى الداعى ۋاقىتتا دا جالعاساتىنىن مالىمدەدى.
الماتىدا كوممۋنالدىق قىزمەتكەرلەردىڭ ەڭبەكاقىسى ەكى ەسە ارتتى