ەلورداداعى MEGA Silk Way ساۋدا-ويىن-ساۋىق ورتالىعىندا «باقىت دەگەن» اتتى مۋزىكالىق فلەشموب ءوتتى. ءىس-شارا مەرەكەلىك كۇنگە وراي ۇيىمداستىرىلىپ, قازاقستاننىڭ جاڭا كونستيتۋتسياسى جوباسىن قولداۋ ماقساتىندا وتكىزىلدى. اكتسيا بارىسىندا قاتىسۋشىلار تانىمال «باقىت دەگەن» ءانىن جاندى داۋىستا ورىنداپ, قاراپايىم كەزدەسۋدى اسەرلى قوعامدىق پەرفورمانسقا اينالدىردى, دەپ حابارلايدى Egemen.kz.
فلەشموبتىڭ سيۋجەتى العاشىندا قاراپايىم كورىنىستەن باستالدى: جاس جىگىت سۇيىكتىسىن قولىنا گۇل شوعىن ۇستاپ قارسى الىپ, گيتارامەن باياۋ اۋەن ويناي باستايدى. الايدا ءاننىڭ العاشقى قايىرماسىنان باستاپ ساۋدا ورتالىعىنداعى ءتۇرلى بۋتيكتەردەن قاتىسۋشىلار شىعىپ, انگە كۇتپەگەن جەردەن قوسىلا باستايدى.
ءاربىر قايىرما سايىن ورىنداۋشىلار سانى كوبەيىپ, كورەرمەندەر ءۇشىن توسىن اسەرگە تولى كورىنىس قالىپتاستى. وسىلايشا قاراپايىم مۋزىكالىق باستاما بىرتىندەپ اۋقىمدى حورمەن ورىندالاتىن اسەرلى قويىلىمعا ۇلاسىپ, ساۋدا ورتالىعىنىڭ كەڭىستىگىن قۋانىش پەن مەرەكەلىك كوڭىل-كۇيگە بولەدى.
فلەشموبتىڭ شارىقتاۋ شەگى فينالدىق قايىرمانىڭ ءبارى بىرگە ورىندالعان ساتىندە بولدى. سول كەزدە جاس جىگىت سۇيىكتىسىنە جاقىنداپ, گۇل شوعىن ۇسىنىپ, ءبىر تىزەرلەپ وتىرىپ, ءوزىنىڭ سەزىمىن اشىق ءبىلدىردى.
ۇيىمداستىرۋشىلاردىڭ ايتۋىنشا, «باقىت دەگەن» اكتسياسى شىنايى سەزىم, قۋانىش پەن قوعامدىق بىرلىكتىڭ سيمۆولى رەتىندە ويلاستىرىلعان. مۋزىكا مەن ادامداردىڭ بەلسەندى قاتىسۋى ارقىلى جوبا قوعامداعى ادامگەرشىلىك قۇندىلىقتاردى, ءبىر-بىرىنە قولداۋ كورسەتۋدىڭ ماڭىزىن ەسكە سالۋدى ماقسات ەتەدى.
سونىمەن قاتار ۇيىمداستىرۋشىلار بۇل شارا جاڭا كونستيتۋتسيا جوباسىن قولداۋدىڭ تاعى ءبىر ماڭىزدى قوعامدىق بەلگىسىنە اينالعانىن اتاپ ءوتتى.
رەفەرەندۋم: تاياۋ شىعىس ەلدەرىندەگى ۋچاسكەلەر ۋاقىتشا جۇمىس ىستەمەيدى
ايتا كەتەيىك, قازاقستاندا جاڭا كونستيتۋتسيا بويىنشا رەسپۋبليكالىق رەفەرەندۋم 15 ناۋرىزدا وتەدى.
الماتىداعى رەفەرەندۋمعا دايىندىق بارىسى