سەناتتا حالىقارالىق ايەلدەر كۇنىنە ارنالعان سالتاناتتى ءىس-شارا ءوتتى. باسقوسۋدا پالاتا توراعاسى ماۋلەن اشىمباەۆ ارىپتەستەرىن قۇتتىقتاپ, ولارعا ەلىمىزدىڭ ءوسىپ-وركەندەۋىنە قوسقان جاسامپاز ۇلەسى مەن جوعارى كاسىبي بىلىكتىلىگى ءۇشىن بەرىلگەن مەملەكەتتىك ناگرادالاردى تاپسىردى.
م.اشىمباەۆ ايەلدەردىڭ مەملەكەتتىلىكتى نىعايتۋ مەن ەلدىڭ دامۋىنا قوسقان ەلەۋلى ۇلەسىن ەرەكشە اتاپ ءوتتى. سونداي-اق ول قازىرگى كەزدە ايەلدەردىڭ ءرولى وتباسىمەن عانا شەكتەلمەيتىنىن, ولار ەلدەگى قوعامدىق-ساياسي ۇدەرىستەردىڭ ماڭىزدى قوزعاۋشى كۇشىنە اينالعانىن ايتتى. سەنات توراعاسى مۇنداي وزگەرىستەر مەملەكەت باسشىسىنىڭ باستاماسىمەن جۇزەگە اسىرىلىپ جاتقان اۋقىمدى رەفورمالار مەن جۇيەلى قولداۋدىڭ ناقتى ناتيجەسى ەكەنىن دە جەتكىزدى.
«پرەزيدەنت قاسىم-جومارت توقاەۆتىڭ باستاماسىمەن كەيىنگى جىلداردا ەلىمىزدە اۋقىمدى جاڭعىرتۋلار جۇزەگە اسىرىلىپ كەلەدى. سول وزگەرىستەردىڭ دايەكتى جالعاسى رەتىندە كونستيتۋتسيالىق رەفورما قولعا الىندى. بۇل شەشىم ەلىمىز ءۇشىن تاريحي قادام بولدى. كونستيتۋتسيالىق رەفورمانىڭ ستراتەگيالىق ماقساتى – ادىلەتتى, دەموكراتيالىق, الەۋمەتتىك, يننوۆاتسيالىق جانە پروگرەسسيۆتى قازاقستان قۇرۋ. وسى رەتتە وتباسى ينستيتۋتىن نىعايتۋعا, ۇلتتىق قۇندىلىقتاردى قورعاپ, دارىپتەۋگە, اعا بۋىنعا قامقورلىق كورسەتۋگە باعىتتالعان جاڭا كونستيتۋتسيالىق نورمالاردىڭ ماڭىزى ايرىقشا زور. جاڭا كونستيتۋتسيا جوباسى ايەلدەردىڭ قۇقىقتارى مەن مۇمكىندىكتەرىن كەڭەيتۋ, ولاردىڭ قوعامدىق, كاسىبي, ساياسي ومىرگە بەلسەندى قاتىسۋىنا جول اشۋ, سونداي-اق ءوز الەۋەتىن جان-جاقتى جۇزەگە اسىرۋىنا جاعداي جاساۋ تۇرعىسىنان دا ەرەكشە مانگە يە», دەدى م.اشىمباەۆ.
سونىمەن قاتار ول مەرەكە قارساڭىندا مەملەكەت باسشىسىنىڭ جارلىعىمەن سەنات توراعاسىنىڭ ورىنباسارى ولگا پەرەپەچيناعا «قازاقستاننىڭ ەڭبەك سىڭىرگەن قايراتكەرى» قۇرمەتتى اتاعى بەرىلگەنىن, ال سەناتور اينۇر ارعىنبەكوۆا «قۇرمەت» وردەنىمەن ماراپاتتالعانىن اتاپ ءوتتى.
مەملەكەتتىك جانە قوعامدىق قىزمەتتەگى ەڭبەگى, ەلدىڭ الەۋمەتتىك-ەكونوميكالىق جانە مادەني دامۋىنا قوسقان ەلەۋلى ۇلەسى ءۇشىن سەناتور اسەم راحمەتوۆا مەن سەنات اپپاراتىنىڭ ءبولىم مەڭگەرۋشىسى ايگۇل بيبولوۆا دا «قۇرمەت» وردەنىمەن ناگرادتالدى. سونداي-اق اپپارات قىزمەتكەرى ەلەنا بەردنيكوۆيچ, بايان ولجاباەۆا, گۇلسىم يسكاكوۆا مەن پەريزات ساپاربەكوۆاعا «ەرەن ەڭبەگى ءۇشىن» مەدالى تابىس ەتىلدى.
م.اشىمباەۆ ماراپات يەلەرىن قۇتتىقتاي كەلە, مەملەكەتتىك ناگرادالار ەلىمىزدىڭ دامۋىنا ايەلدەردىڭ قوسقان ايرىقشا ۇلەسىنىڭ جارقىن كورىنىسى ەكەنىن اتاپ ءوتتى. ول دەپۋتاتتاردىڭ كاسىبي بىلىكتىلىگى مەن سەنات اپپاراتى قىزمەتكەرلەرىنىڭ جۇيەلى ءارى جاۋاپتى جۇمىسىنىڭ ناتيجەسىندە پالاتانىڭ قىزمەتى تۇراقتى ءارى ءتيىمدى جۇرگىزىلىپ وتىرعانىن ايتتى. پالاتا توراعاسى ارىپتەستەرىنە ءوز ىسىنە ادالدىقتىڭ وزىق ۇلگىسىن كورسەتىپ كەلە جاتقانى ءۇشىن العىس ءبىلدىرىپ, زور دەنساۋلىق, باق-بەرەكە, جاڭا جەڭىستەر مەن جەتىستىكتەر تىلەدى.