تاياۋ شىعىس ەلدەرىندە قۇرىلعان رەفەرەندۋم ۋچاسكەلەرى ۋاقىتشا جۇمىس ىستەمەيدى. بۇل تۋرالى سىرتقى ىستەر مينيسترلىگىنىڭ ءباسپاسوز قىزمەتىنە حابارلادى, دەپ جازادى Egemen.kz.
«تاياۋ شىعىستا قالىپتاسقان جاعدايعا بايلانىستى, بىرىككەن اراب امىرلىكتەرىندە, يزرايل مەملەكەتىندە, يوردانيا حاشيميت كورولدىگىندە, يران يسلام رەسپۋبليكاسىندا, قاتار مەملەكەتىندە, كۋۆەيت مەملەكەتىندە, ليۆان رەسپۋبليكاسىندا جانە ومان سۇلتاناتىنداعى قازاقستان رەسپۋبليكاسىنىڭ شەت ەلدەردەگى مەكەمەلەرى جانىنان قۇرىلعان رەفەرەندۋم ۋچاسكەلەرى ۋاقىتشا جۇمىس ىستەمەيدى», دەلىنگەن حابارلامادا.
سونىمەن قاتار قاۋىپسىزدىك سەبەپتەرگە بايلانىستى, ۋكراينا مەن ەفيوپيا فەدەراتيۆتىك دەموكراتيالىق رەسپۋبليكاسىنداعى ەلشىلىكتەرىنىڭ جانىنان قۇرىلعان رەفەرەندۋم ۋچاسكەلەرى دە ۋاقىتشا جۇمىس ىستەمەيتىن بولادى.
ايتا كەتەيىك, رەسپۋبليكالىق رەفەرەندۋمعا شەتەلدە جۇرگەن قازاقستان ازاماتتارى قاتىسا الادى.
قازاقستان رەسپۋبليكاسى پرەزيدەنتىنىڭ 2026 جىلعى 11 اقپانداعى № 1170 جارلىعىنا سايكەس, 2026 جىلعى 15 ناۋرىزدا قازاقستاندا جاڭا كونستيتۋتسيانىڭ جوباسى بويىنشا رەسپۋبليكالىق رەفەرەندۋم وتەدى.
قازاقستاننىڭ شەت ەلدەردەگى مەكەمەلەرىنىڭ جانىنان 54 شەت مەملەكەتتە 71 رەفەرەندۋم ۋچاسكەسى قۇرىلدى. داۋىس بەرۋگە قاتىسۋ ءۇشىن بەلسەندى سايلاۋ قۇقىعى بار, ءتيىستى شەت مەملەكەتتە تۇراتىن نەمەسە جەكە, قىزمەتتىك, وقۋ, ىسكەرلىك پەن تۋريستىك ماقساتپەن جۇرگەن جانە قر ازاماتىنىڭ جارامدى پاسپورتى بار قازاقستان رەسپۋبليكاسىنىڭ ازاماتتارى رەفەرەندۋم ۋچاسكەسى قۇرىلعان قازاقستاننىڭ ديپلوماتيالىق نەمەسە كونسۋلدىق وكىلدىگىنە جۇگىنە الادى.
كونستيتۋتسيا كۇنى 15 ناۋرىزدا اتالىپ ءوتۋى مۇمكىن
قازاقستاننىڭ شەت ەلدەردەگى مەكەمەلەرىندە داۋىس بەرۋ «قازاقستان رەسپۋبليكاسىنداعى سايلاۋ تۋرالى» قر كونستيتۋتسيالىق زاڭى 38-ءشى بابىنىڭ 1-ءشى تارماعىنا سايكەس رەفەرەندۋم وتكىزىلەتىن كۇنى (2026 جىلعى 15 ناۋرىز, جەكسەنبى) جەرگىلىكتى ۋاقىت بويىنشا ساعات 07:00-دەن 20:00-گە دەيىن وتكىزىلەتىن بولادى.