ل.ن. گۋميلەۆ اتىنداعى ەۋرازيا ۇلتتىق ۋنيۆەرسيتەتىندە لۋ بان شەبەرحاناسى بازاسىندا جاساندى ينتەللەكت بويىنشا قاناتقاقتى كۋرستى ءساتتى اياقتاعان جوعارى وقۋ ورىندارىنىڭ وقىتۋشىلارى مەن ماماندارىنا سەرتيفيكات تابىستاۋ ءراسىمى ءوتتى.
وقۋ باعدارلاماسىنا ەلىمىزدىڭ 10 جەتەكشى جوعارى وقۋ ورنىنان 30-عا جۋىق وقىتۋشى قاتىستى. كۋرس جاساندى ينتەللەكتىنى وقىتۋعا ارنالعان ونلاين-ءمودۋلدى جانە ءۇش كۇندىك تاجىريبەلىك سەميناردى قامتىدى. قاتىسۋشىلار زاماناۋي قۇرال-جابدىقتارمەن جۇمىس ىستەۋدى مەڭگەرىپ, ءوز ۋنيۆەرسيتەتتەرىنىڭ ءبىلىم باعدارلامالارىنا جي تەحنولوگيالارىن ەنگىزۋگە ارنالعان پراكتيكالىق شەشىمدەر ازىرلەدى.
تسيفرلاندىرۋ جونىندەگى پرورەكتور گۇلميرا بەكمانوۆانىڭ ايتۋىنشا, بۇل شەبەرحانا ەكى ەل اراسىنداعى سەرىكتەستىكتىڭ جەمىسى. بىلتىر مەملەكەت باسشىسى قاسىم-جومارت توقاەۆ پەن قىتاي پرەزيدەنتى سي ءتسزينپيننىڭ قاتىسۋىمەن اشىلعان بۇل بازا جاساندى ينتەللەكت سالاسىنداعى ءبىلىمدى تەرەڭدەتۋگە ارنالعان.
«قىتايدا ءبىر ايلىق وقۋ بارىسىندا ءبىز ءتورت نەگىزگى ءمودۋلدى مەڭگەردىك. اتاپ ايتساق, روبوتتەحنيكا جانە اۆتوماتتاندىرۋ, LLM, درون تەحنولوگيالارى, سونداي-اق قاۋىپسىزدىك جۇيەلەرى. LLM-ءدى قاراپايىم تىلمەن تۇسىندىرسەك, ول ءماتىندى ۇعىنىپ, سوعان سايكەس جاۋاپ قۇراستىرا الاتىن تىلدىك مودەل. كۋرستان كەيىن فاكۋلتەتىمىزدە ارىپتەستەرىمىز بەن ستۋدەنتتەرگە تاجىريبەمىزدى بولىستىك. قازىر ولار العان ءبىلىمىن تاجىريبەدە قولدانىپ, ناقتى ناتيجە كورسەتىپ ءجۇر. بۇگىن ەلىمىزدىڭ ءار وڭىرىنەن كەلگەن 28 پروفەسسورعا وسى باعىتتار بويىنشا سەرتيفيكات تابىستالدى», دەيدى اقپاراتتىق جۇيەلەر كافەدراسىنىڭ PhD مانسيا حانتورەەۆا.
ال ە.ا.بوكەتوۆ اتىنداعى قاراعاندى ۇلتتىق زەرتتەۋ ۋنيۆەرسيتەتىنىڭ قاۋىمداستىرىلعان پروفەسسورى رايحان مۇراتحان ۇلى كۋرس اياسىندا ەكولوگياعا باعىتتالعان جي-قوسىمشالاردىڭ الەۋەتى ايقىن كورىنگەنىن جەتكىزدى.
–تەوريالىق ءبىلىمدى ەۋرازيا ۇلتتىق ۋنيۆەرسيتەتىنىڭ جاپپاي ونلاين-پلاتفورماسىندا الدىق. بۇل بىزگە جاساندى ينتەللەكت نەگىزدەرىنە تەرەڭ بويلاپ, زاماناۋي الگوريتمدەردىڭ جۇمىس قاعيدالارىن تۇسىنۋگە كومەكتەستى. اسىرەسە روبوتتەحنيكالىق شەشىمدەردى پايدالانا وتىرىپ, قالدىقتاردى سۇرىپتاۋ باعىتىنداعى زەرتتەۋلەر قىزىقتىردى. بۇل – جي تەحنولوگيالارىنىڭ ناقتى ەكولوگيالىق ماسەلەلەردى شەشۋدەگى جارقىن مىسالى. جوباعا تەك وقىتۋشىلار عانا ەمەس, ستۋدەنتتەردىڭ دە تارتىلعانى قۋانتادى, دەدى ول.
ۇيىمداستىرۋشىلاردىڭ ايتۋىنشا, وسىنداي كۋرستار الداعى ۋاقىتتا جالعاسىن تاۋىپ, قاتىسۋشىلار سانى ارتا تۇسپەك.