«حابار» مەن 24KZ ارنالارى كوكتەمگى ماۋسىمدا كونتەنت ستراتەگياسىن جاڭارتىپ, تىڭ تەلەونىمدەر توپتاماسىن كورەرمەن نازارىنا ۇسىنعالى وتىر. بۇل جولى ارنالار ەڭ الدىمەن كورەرمەن سەنىمىنە, سالماقتى تالداۋ مەن ساراپتاماعا جانە قوعاممەن اشىق اڭگىمەگە باسىمدىق بەرمەك. ماقساتى – اقپاراتتى جەتكىزۋ عانا ەمەس, ونىڭ ءمانىن اشىپ, ەل كوكەيىندەگى ساۋالدارعا جاۋاپ بەرۋ, دەپ حابارلايدى Egemen.kz.
«حابار» اگەنتتىگى» اق باسقارما توراعاسى كەمەلبەك ويشىباەۆ قازىرگى تاڭدا كورەرمەن كۇردەلى ماسەلەلەردىڭ انىق تا ءادىل تالدانۋىن كۇتەتىنىن اتاپ ءوتتى.
«قوعامدىق حابار تاراتۋشى رەتىندە ءبىز كورەرمەننىڭ سۇرانىسىن ءجىتى اڭعارىپ, كونتەنتىمىزدى اشىق پىكىر الماسۋ مەن قوعاممەن ءوزارا ىقپالداستىق قاعيداتىنا نەگىزدەپ قۇرىپ وتىرمىز», دەيدى ول.
«حابار» ارناسىنىڭ ەفير كەستەسى جان-جاقتى جاڭارتىلعان. ستۋديا دەكوراتسياسى, باعدارلامالاردىڭ بەرىلۋ ءتاسىلى دە وزگەردى. بۇرىننان تانىس جوبالار جاڭا رەڭككە يە بولدى. ء«ومىر ورنەگى», ء«ححى عاسىر كوشباسشىسى», «ازامات», «قوعام پىكىرى», «كوزقاراس», «وزەكتى», «جەتى كۇن», «ويناIQ» سەكىلدى باعدارلامالار مازمۇندىق وزەگىن ساقتاي وتىرىپ, جاڭاشا ۇلگىدە كورەرمەنگە جول تارتادى. پىكىر الماسۋعا كوبىرەك ورىن بەرىلىپ, كورەرمەنمەن بايلانىس نىعايا تۇسپەك. سونىمەن قاتار ەل ومىرىندەگى ەلەۋلى وقيعالار مەن ايتۋلى داتالارعا ارنالعان دەرەكتى فيلمدەر كورسەتىلەدى. بۇل تۋىندىلار وتكەن مەن بۇگىندى ساباقتاستىرىپ, ۋاقىت تىنىسىن سەزۋگە باعىتتالعان.
24KZ ارناسى دا كورەرمەنگە بىرقاتار جاڭا تەلەجوبالاردى ۇسىنادى. سولاردىڭ ءبىرى – «ەل الدىندا» ساياسي توك-شوۋى. بۇل – دانەكەرسىز, تىكەلەي ەفيردە وتەتىن اشىق الاڭ. وندا مەملەكەتتىك ورگانداردىڭ ءبىرىنشى باسشىلارى باق وكىلدەرىمەن بىرگە ازاماتتاردىڭ ساۋالىنا تىكەلەي ەفيردە جاۋاپ بەرەدى.
«پريوريتەتى» – تانىمال تەلەجۋرناليست اسقار مەڭدىباەۆ جۇرگىزەتىن اۆتورلىق ساراپتامالىق جوبا. باعدارلاما ەل ىشىندەگى جانە الەمدەگى ۇدەرىستەردىڭ ءمان-ماڭىزىن ءتۇسىندىرىپ, وقيعانىڭ استارىنا ۇڭىلۋگە مۇمكىندىك بەرەدى. ال «Alem Talk» حالىقارالىق ۇدەرىستەر مەن ولاردىڭ قازاقستانعا ىقپالىن كەڭ اۋقىمدا تالدايتىن تەلەجوبا. «انىق Time» – اقيقات پەن جالعان اقپاراتتىڭ ارا-جىگىن اجىراتۋعا باعىتتالعان اپتالىق فاكتچەكينگ جوباسى. قازاق جانە ورىس تىلدەرىندە شىعاتىن باعدارلامادا رەزونانستى تاقىرىپتار سارالانىپ, ناقتى كەيستەر تالدانادى, كورەرمەنگە اقپاراتتى ءوز بەتىنشە تەكسەرۋدىڭ پراكتيكالىق جولدارى ۇسىنىلادى.
سونىمەن قاتار ەفيرگە اپتا سايىن «تەڭ مۇمكىندىك / رازنىە-راۆنىە» الەۋمەتتىك تەلەجوباسى شىعادى. ءار شىعارىلىمدا اتا-انالاردىڭ شىنايى تاعدىرى, ەرەكشە بالالاردىڭ ءومىر جولى, مەملەكەت تاراپىنان كورسەتىلەتىن قولداۋ شارالارى جانە ينكليۋزيۆتى دامۋدىڭ ناتيجەلى تاجىريبەلەرى كەڭىنەن ءسوز بولادى. باعدارلامادا كەدەرگىسىز ورتا قالىپتاستىرۋدىڭ ناقتى قادامدارى كورسەتىلىپ, تەڭ مۇمكىندىككە نەگىزدەلگەن قوعام قۇرۋ جولى جان-جاقتى اڭگىمەلەنەدى. بۇعان قوسا «President», ء«تۇيىن», ء«ماجىلىس Life» باعدارلامالارى دا ەفيردە ءوز جۇمىسىن جالعاستىرا بەرەدى.
ايتا كەتەيىك, جاڭا ماۋسىمدا تسيفرلىق كونتەنتكە ەرەكشە كوڭىل بولىنەدى. «حابار» اگەنتتىگى الەۋمەتتىك جەلىلەر ەن YouTube پلاتفورماسىندا بەلسەندىلىكتى ارتتىرىپ, جاس اۋديتورياعا ارنالعان فورماتتاردى دامىتۋدى جوسپارلاپ وتىر. قازىرگى تاڭدا مەدياحولدينگتىڭ YouTube ارناسىندا شامامەن 8 ميلليون جازىلۋشى بار, ال الەۋمەتتىك جەلىلەردەگى اۋديتورياسى 3 ميلليونعا جۋىق. الداعى ۋاقىتتا 4 پودكاست, 2 Instagram-سەريال جانە «قوناقجاي» جوباسى ىسكە قوسىلادى.
«قوناقجاي» باعدارلاماسى قازاقستاننىڭ تابيعاتىن, ايماقتاردىڭ تىنىس-تىرشىلىگىن جانە قازاق حالقىنىڭ ءداستۇرلى قوناقجايلىعىن تانىستىرۋعا ارنالعان. جوبا ارقىلى كورەرمەن ەلىمىزدىڭ ءار ءوڭىرىنىڭ ەرەكشەلىگى مەن سالت-ءداستۇر الۋاندىعىن جاقىنىراق تاني الادى.
وسىلايشا, «حابار» مەن 24KZ ارنالارى كوكتەمگى ماۋسىمدا مازمۇنى تەرەڭ, قوعام سۇرانىسىنا جاۋاپ بەرەتىن, جارقىن ەموتسيالارعا تولى تەلەجوبالار ۇسىنىپ, مەدياكەڭىستىكتەگى 31-ءشى ماۋسىمىن اشقالى وتىر.