ەلىمىزدە كەڭ قولدانىلعان انتيبيوتيكتەردىڭ ءبىرى – «سترەپتوتسيد» پرەپاراتىنىڭ بەلگىلى ءبىر سەرياسىن ساتۋعا جانە مەديتسينالىق ماقساتتا قولدانۋعا تىيىم سالىندى. ءتيىستى شەشىمدى دەنساۋلىق ساقتاۋ مينيسترلىگى قابىلدادى, دەپ جازادى Egemen.kz.
رەسمي اقپاراتقا سايكەس, تىيىم «حيمفارم» اكتسيونەرلىك قوعامى وندىرگەن «سترەپتوتسيد» ءدارىسىنىڭ 25080430 سەرياسىنا قاتىستى. پرەپاراتتىڭ جارامدىلىق مەرزىمى 2030 جىلدىڭ تامىزىنا دەيىن دەپ كورسەتىلگەن. تابلەتكا تۇرىندەگى ءدارى 300 مگ دوزادا شىعارىلعان, ءبىر قاپتامادا 10 تابلەتكادان, كارتون قوراپشادا بەس قاپتاما بولعان.
ءدارى-دارمەك نەگە تەز تاۋسىلىپ جاتىر؟
مينيسترلىك شەشىمى دەنساۋلىق ساقتاۋ سالاسىنداعى قولدانىستاعى زاڭناماعا جانە دارىلىك زاتتاردى قولدانۋدى شەكتەۋ قاعيدالارىنا سايكەس قابىلدانعان. وسىعان بايلانىستى اتالعان سەرياداعى پرەپاراتتى ساتۋ, تاراتۋ جانە ەمدەۋ ىسىندە پايدالانۋ توقتاتىلدى.
ءدارىحانالار نەگە الەۋمەتتىك ماڭىزى بار دارىلەردى ساتىپ الۋدان باس تارتىپ وتىر؟
ءدارىنى نارىقتان تولىق الىپ تاستاۋ بارىسىن مەديتسينالىق جانە فارماتسەۆتيكالىق باقىلاۋ كوميتەتى باقىلاپ وتىر. بۇيرىققا قول قويىلعاننان كەيىن ءبىر جۇمىس كۇنى ىشىندە كوميتەتتىڭ اۋماقتىق بولىمشەلەرى, دارىلىك زاتتار اينالىمى سالاسىنداعى مەملەكەتتىك ساراپتاما ۇيىمى, الەۋمەتتىك مەديتسينالىق ساقتاندىرۋ قورى جانە سك-فارماتسيا كومپانياسى حاباردار ەتىلگەن.
جارامدىلىق مەرزىمى وتكەن 750-دەن استام ءدارى ساتىلعان
مينيسترلىكتىڭ مالىمەتىنشە, بۇل ءتارتىپ پرەپاراتتىڭ ەل اۋماعىنداعى بارلىق ءدارىحانا مەن مەديتسينالىق ۇيىمداردان دەر كەزىندە ءارى تولىق الىنۋىن قامتاماسىز ەتۋگە باعىتتالعان. مۇنداي شارا ازاماتتاردىڭ دەنساۋلىعىن قورعاپ, ءدارىنى قولدانۋعا بايلانىستى ىقتيمال قاۋىپتەردىڭ الدىن الۋعا مۇمكىندىك بەرەدى.