بىلتىر وبلىسىمىزدا ابايدىڭ 180 جىلدىعىنا وراي مەملەكەت باسشىسى قاسىم-جومارت توقاەۆتىڭ قولداۋىمەن «ابايعا قۇرمەت» اكتسياسى باستالدى, دەپ حابارلايدى Egemen.kz.
بۇگىن سەمەيدەگى بەيبىتشىلىك ارالىندا سولتۇستىك قازاقستان وبلىسىنىڭ تارتۋى رەتىندە سالىناتىن رامىزدەر الاڭىنىڭ ىرگەتاسىن قالاۋ ءراسىمى ءوتتى.
شاراعا وبلىس اكىمى بەرىك ءۋالي, سولتۇستىك قازاقستان وبلىسى اكىمىنىڭ ورىنباسارى نۇرلان كەڭەسوۆ قاتىستى.
رامىزدەر الاڭىنىڭ ىرگەتاسىن قالاۋ راسىمىندە ءسوز سويلەگەن ايماق باسشىسى بۇل جوبانىڭ ايرىقشا ماڭىزعا يە ەكەنىن اتاپ ءوتتى. مەملەكەت باسشىسىنىڭ باستاماسىن قولداپ, وڭىرگە رامىزدەر الاڭىن سىيعا تارتقالى وتىرعان سولتۇستىك قازاقستان حالقىنا, وبلىستىڭ اكىمى عاۋەز نۇرمۇحامەتبەتوۆكە ءوڭىر جۇرتشىلىعى اتىنان العىس ايتتى.
«مەملەكەت باسشىسىنىڭ باستاماسىمەن حاكىم ابايدىڭ 180 جىلدىق مەرەيتويىنا وراي ەلىمىزدىڭ ءار ءوڭىرى وبلىسىمىزعا ءبىر نىساننان سالماق. پرەزيدەنتىمىزدىڭ وسى يگى باستاماسى «ابايعا قۇرمەت» اتالىپ, جاقىندا ۇكىمەتتىڭ ارنايى قاۋلىسى شىققانىن بىلەسىزدەر. بۇل ءوڭىرىمىز ءۇشىن ۇلكەن قولداۋ, تۇتاس قازاق جۇرتىنىڭ, ايبىندى مەملەكەتىمىزدىڭ حاكىم اباي رۋحىنا, ونىڭ تۋعان وڭىرىنە دەگەن ىزگى ءىلتيپاتى دەپ بىلەمىز. بۇگىنگى يگى شارا ەلىمىزدىڭ قوس قيىرىنىڭ بىرلىگى مەن ۇلتتىق بىرەگەيلىگىنىڭ جارقىن كورىنىسى دەپ بىلەمىن. سولتۇستىك قازاقستان مەن اباي وبلىسى سولتۇستىك پەن شىعىس شەكارادا جاتقان شالعاي ايماق بولسا دا, نيەتى ورتاق, تىلەۋى ءبىر ەكەنىن كورسەتتى. وزدەرىڭىز كورىپ وتىرعانداي, رامىزدەر الاڭى بەيبىتشىلىك ارالىندا بوي كوتەرەدى. ەجەلگى تۇيەمويناق, قازىرگى بەيبىتشىلىك ارالى تاريحقا باي, تاعدىردىڭ تەزىن كوپ كورگەن كيەلى ورىندارىمىزدىڭ ءبىرى ەكەنى سىزدەرگە ايان. بۇل ارالدا قىرىق جىل بويى دالامىزعا ۋىن شاشقان اتومدىق سىناقتاردىڭ توقتاۋىنا وراي بيىكتىگى 20 مەترلىك «ولىمنەن دە كۇشتى» مونۋمەنتى تۇرعىزىلسا, يادرولىق پوليگوننىڭ جابىلعانىنا 20 جىل تولعاندا بيىكتىگى 25 مەتر بولاتىن بەيبىتشىلىك ستەللاسى تۇرعىزىلدى. ەندى مىنە اباي وبلىسى قايتادان شاڭىراق كوتەرگەن تۇستا بيىكتىگى 35 مەتر بولاتىن رامىزدەر الاڭى بوي كوتەرمەك. ەلىمىزدىڭ تاۋەلسىزدىگىنىڭ 35 جىلدىعىمەن دە تۇسپا تۇس كەلىپ وتىر. بۇل ءۇش تاعان قاسيەتتى بەيبىتشىلىك ارالىنا ەندى تولىق ماعىنا بەرىپ, قالانىڭ كوركى مەن تاريحىن بايىتا تۇسپەك. مۇنداي رامىزدەر الاڭى تاريحىمىزدا ءبىرىنشى رەت سالىنعالى جاتقانىن دا ماقتانىشپەن ايتا كەتكەن ءجون. الداعى رامىزدەر كۇنىنە دەيىن الاڭنىڭ قۇرىلىسى اياقتالىپ, پايدالانۋعا بەرىلمەك», دەدى بەرىك ءۋالي.
نىسان دوڭگەلەك پىشىندە جوبالانعان, ديامەترى – 28 مەتر. جالپى بيىكتىگى – 35 مەتر. رامىزدەر الاڭى زاماناۋي تالاپتارعا ساي سالىنىپ, اينالاسىنىڭ بارلىعى اباتتاندىرىلىپ, تۇرعىندار مەن قالا قوناقتارىنىڭ سۇيىكتى ورىندارىنىڭ بىرىنە اينالماق.
ايماق باسشىسى شارا بارىسىندا بەيبىتشىلىك ارالىندا پرەزيدەنتتىڭ ارنايى تاپسىرماسىمەن قالا تۇرعىندارىنىڭ سەرۋەندەۋىنە ارنالعان كولەمى 56 گەكتار بولاتىن ەكولوگيالىق ساياباق سالىناتىنىن ايتتى.
شارا بارىسىندا ءسوز سويلەگەن سولتۇستىك قازاقستان وبلىسى اكىمىنىڭ ورىنباسارى نۇرلان كەڭەسوۆ بۇل باستامانىڭ ەل بىرلىگىن ايشىقتايتىن رۋحاني ماڭىزىنا توقتالدى.
«ەرتىس جاعاسىنداعى ەڭسەلى سەمەيدە ەلدىڭ رۋحىن اسقاقتاتاتىن تاريحي ءساتتىڭ باستاۋىنا كۋا بولىپ وتىرمىز. مەملەكەتتىك رامىزدەر الاڭى مەن ستەللا قۇرىلىسىنىڭ كاپسۋلا سالۋ – بۇل جاي عانا قۇرىلىس ەمەس, بۇل – جۇرەكتەگى وتانعا دەگەن سۇيىسپەنشىلىكتىڭ ناقتى كورىنىسى. بۇل جوبا – سولتۇستىك قازاقستان وبلىسىنىڭ ۇلى ويشىل اباي قۇنانباي ۇلىنىڭ ءجۇز سەكسەن جىلدىق مەرەيتويىنا وراي اباي ەلىنە, قاسيەتتى سەمەيگە جاساعان تارتۋى. بۇل – اعايىننىڭ اق نيەتى, ەلدىڭ ەلگە دەگەن قۇرمەتى», دەدى ول.
ايتا كەتەيىك, «ابايعا قۇرمەت» اكتسياسى اياسىندا ەلىمىزدىڭ بىرنەشە ءوڭىرى سەمەي قالاسىنا ءبىر نىساننان سالىپ بەرۋگە ءوز ۇسىنىستارىن بەردى. ماڭعىستاۋ وبلىسى دوستىق ءۇيىنىڭ قۇرىلىسىن باستادى. شىمكەنت قالاسى شىعارماشىلىق ورتالىعى مەن مادەنيەت ءۇيىن, تۇركىستان وبلىسى كورمە ورتالىعىن, استانا قالاسى كەلەشەك مەكتەبىن, اقتوبە وبلىسى جەكپە جەك ورتالىعىن, پاۆلودار وبلىسى ۇستەل تەننيسى ورتالىعىن, قىزىلوردا وبلىسى «اناعا تاعزىم» ورتالىعىن, باتىس قازاقستان وبلىسى جەلىلىك ساياباق سالۋدى, شىعىس قازاقستان وبلىسى ەرتىس جاعالاۋىن اباتتاندىرۋدى جوسپارلاپ وتىر. الماتى وبلىسى بىلتىر سەمەيدەگى قاراعايلى ىقشام اۋدانىندا سالىنعان ساياباققا «التىن ادام» ەسكەرتكىشىن ورناتتى.
يتاليادا اباي قۇنانباي ۇلىنىڭ ءبيۋستى اشىلدى
اكتسيانى ءىرى ينۆەستورلار دا قولداپ وتىر. اتاپ ايتساق, «KAZ Minerals» كومپانيالار توبى سەمەيدەگى جاڭا شاعىن اۋداندا 25 مىڭ كورەرمەنگە ارنالعان جاڭا ستاديون قۇرىلىسىن باستاپ كەتتى. سونىمەن قاتار ۇلتتىق كومپانيالار دا ءوز ۇلەسىن قوساتىن بولادى. «قازاقستان حالقىنا» قورى ينكليۋزيۆتى سپورت كەشەنىن سالىپ بەرۋدى جوسپارلاپ وتىر.
تالدىقورعاندا اباي قۇنانباي ۇلىنىڭ 180 جىلدىعىنا ارنالعان پوەزيا كەشى ءوتتى