كەزىندە سپورتتىڭ قاي تۇرىنەن بولسا دا, كسرو-نىڭ سپورت شەبەرى ءنورماتيۆىن ورىنداۋ وتە قيىن ەدى. ونداي ۇلكەن ءىستى تەك جالىقپاي ەڭبەك ەتىپ, جاتتىعۋ زالىندا شەلەكتەپ تەر توگىپ, ءدۇبىرلى دودالاردا ايانباي ايقاسىپ, بارلىق قيىندىققا توزە بىلگەن ساڭلاقتاردىڭ عانا قولىنان كەلەدى, دەپ حابارلايدى Egemen.kz.
سونداي دارىنى اسقان جاستاردىڭ ءبىرى قايرات ءابىلوۆ ەدى. 1971 جىلى قوستاناي وبلىسىنىڭ قامىستى اۋدانىندا دۇنيەگە كەلگەن ول بالاۋسا كەزىنەن بالۋاندىق ونەردىڭ سيقىرىنا اربالىپ, ەركىن كۇرەسكە مىقتاپ دەن قويدى. اۋدان ورتالىعىندا ۋۆايس دۋباەۆتىڭ قول استىندا جاتتىقتى. زەرەك بالانىڭ بويىندا بۇلا كۇشتىڭ بۇلقىنىپ جاتقانىن بايقاعان باپكەرى ونى ارناۋلى وقۋ ورنىنا جىبەرۋدى ءجون كوردى. ءسويتىپ, بوزبالا قاراعاندى قالاسىندا قونىس تەپكەن ايگىلى ءاليا مولداعۇلوۆا اتىنداعى №3 سپورت سالاسىنداعى وليمپيادالىق مەكتەپ-ينتەرناتتان ءبىر-اق شىقتى.
تالاي دارىندى سپورتشىلاردى تۇلەك ۇشىرعان قارا شاڭىراقتا قايرات كوپتىڭ ءبىرى بولىپ قالعان جوق. ول ءوز قاتارىنىڭ الدى بولدى. 1985-86 جىلدارى ءوزى قۇرىپتاس بالالاردىڭ اراسىندا الماتى مەن ارقالىقتا وتكەن رەسپۋبليكا بىرىنشىلىگىندە قارسىلاس شاق كەلتىرمەدى. 1987 جىلى قاراعاندىدا ۇيىمداستىرىلعان مەكتەپ وقۋشىلارىنىڭ سپارتاكياداسىندا كۇمىس مەدالدى موينىنا ءىلىپ, بىشكەكتەگى بۇكىلوداقتىق تۋرنيردە توپ جاردى. 1988 جىلى تالدىقورعاندا قازاقستاننىڭ جاسوسپىرىمدەر ويىندارىنىڭ جەڭىمپازى اتانىپ, دۋشانبەدە مەكتەپ-ينتەرناتتار اراسىنداعى كسرو بىرىنشىلىگىنىڭ باس جۇلدەسىن ولجالادى.
ال 1989 جىلى تبيليسيدە «ا» ساناتىنداعى تۋرنيردە بارلىق باسكەلەستەرىنەن باسىم ءتۇسىپ, كسرو-نىڭ سپورت شەبەرىنىڭ كۇمىس بەلگىسىن كەۋدەسىنە تاقتى.
اۋەلى 69 كگ سالماق دارەجەسىندە كۇرەسىپ, ۋاقىت وزا 74 كگ سالماققا اۋىسقان ءابىلوۆتىڭ جولىنا مايتالمان ماماندار ۇلكەن ۇمىتپەن قارادى. بىراق جالىندى جاستىڭ دارىنى اسسا دا, باعى جانبادى. ءتۇرلى جارىستاردا العان جاراقاتتارى قايراتتىڭ كەڭىنەن كوسىلۋىنە مۇمكىندىك بەرمەدى. سودان ول ناعىز جالىنداپ تۇرعان شاعىندا بوزكىلەممەن قوش ايتىستى. الايدا كەيىپكەرىمىز ۇلكەن سپورتتان الىستاعان جوق. ءوزى بيزنەسپەن اينالىسسا دا, دارىندى جاستارعا ۇنەمى قامقور قولىن سوزىپ ءجۇردى. دەمەۋشى بولدى. قايرات قۇباي ۇلىنىڭ قامقورلىعىن كورگەن تالاي جاس ورەن كەيىننەن ەل سپورتىنداعى ەلەۋلى تۇلعاعا اينالدى. الايدا ءابىلوۆتىڭ ءومىرى كەلتە بولدى. ول نەبارى 36 جاسىندا باقيلىق بولدى. قامىستىدا جىل سايىن ايتۋلى ازاماتتى ەسكە الۋعا ارنالعان رەسپۋبليكالىق تۋرنير ۇزدىكسىز ءوتىپ تۇرادى.
لاۋرا الماعانبەتوۆا مەن زەينەپ بايانوۆا البانياداعى رەيتينگتىك تۋرنيردە توپ جاردى
بۇل كۇندەرى قامىستىدا جاسقى سپورت كەشەنى سالىنىپ جاتىر. بۇيىرتسا, بيىل پايدالانۋعا بەرىلەدى دەپ جوسپارالانىپ وتىر. وسى ءوڭىر تۇرعىندارىنىڭ اتالعان نىسانعا كەزىندە قازاقستان مەن كسرو قۇراما كومانداسىنىڭ مۇشەسى بولعان بەلگىلى بالۋان قايرات ءابىلوۆتىڭ ەسىمىن بەرسە دەگەن تىلەگى بار...
«ستراندجا كۋبوگى»: بەس بوكسشىمىز ۇتىپ, تورتەۋى ۇتىلدى