سەناتورلار اۋىل-ايماق حالقىمەن كەزدەسىپ, جاڭا كونستيتۋتسيانىڭ نەگىزگى ەرەجەلەرىنەن ءتۇسىندىرىپ جاتىر.
سەنات دەپۋتاتى باۋىرجان قانيەۆ اقتوبە وبلىسىنىڭ تەمىر, مۇعالجار اۋداندارىندا بولىپ, جەرگىلىكتى تۇرعىنداردىڭ سۇراقتارىنا جاۋاپ بەردى, سونداي-اق وڭىرلىك دامۋدىڭ وزەكتى ماسەلەلەرىن ءسوز ەتكەن تۇرعىنداردىڭ ۇسىنىستارىن تىڭدادى.
«بۇگىنگى تاڭدا ءاربىر ازاماتتىڭ پىكىرىن ەستۋ وتە ماڭىزدى, ويتكەنى قوعاممەن اشىق ديالوگ ءتيىمدى مەملەكەتتىك ساياساتتى قالىپتاستىرۋعا, مەملەكەت پەن قوعام اراسىنداعى سەنىمدى نىعايتۋعا مۇمكىندىك بەرەدى», دەدى سەناتور.
دەپۋتات ەرنۇر ايتكەنوۆ تە پاۆلودار وبلىسى اقتوعاي اۋدانىنىڭ اۋەلبەك, حاركوۆ اۋىلدارىنىڭ حالقىمەن كەزدەستى.
«جاڭا كونستيتۋتسيانىڭ جوباسى نەگىزگى زاڭنىڭ نورمالارىن تۇزەتۋ عانا ەمەس, بۇدان مەملەكەت پەن قوعامنىڭ ءوزارا ءىس-قيمىلىنىڭ جاڭارتىلعان ۇلگىسى قالىپتاستاسادى. ءبىز ادام قۇقىقتارى, الەۋمەتتىك ادىلەتتىلىك, ەلدىڭ ورنىقتى دامۋى باسىمدىق بولىپ قالاتىن نەعۇرلىم اشىق, جاۋاپتى ءارى ازاماتتاردىڭ مۇددەلەرىنە باعدارلانعان باسقارۋ جۇيەسىن قۇرۋعا ۇمتىلىپ وتىرمىز», دەدى ە.ايتكەنوۆ.
سونداي-اق اينۇر ارعىنبەكوۆا مەن قايرات تاستەكەەۆ اباي وبلىسىنىڭ كۋرچاتوۆ قالاسىندا بولىپ, ۇلتتىق يادرولىق ورتالىق قىزمەتكەرلەرىمەن, قالانىڭ مەديتسينالىق قوعامداستىق وكىلدەرىمەن جۇزدەستى. ولار الەۋمەتتىك كەپىلدىكتەر, مەملەكەتتىك ورگانداردىڭ جاۋاپكەرشىلىگىن ارتتىرۋ, ادىلەتتىلىك قاعيداتتارىن نىعايتۋ مەن زاڭ ۇستەمدىگىن قامتاماسىز ەتۋ ماسەلەلەرىن ءسوز ەتتى.
سەنات دەپۋتاتتارى امانگەلدى ەسباي مەن عالياسقار سارىباەۆ جەتىسۋ وبلىسىنداعى الاكول اۋدانىندا «كوكتۋما» مەكتەبى, «الاكول سۋ» شجق مكك, سونداي-اق «قازترانسويل» اق ءۇشارال فيليالىنىڭ ۇجىمدارىمەن كەزدەستى. وندا كونستيتۋتسيالىق وزگەرىستەردىڭ نەگىزگى ەرەجەلەرى, زاڭناما يننوۆاتسيالارى مەن قوعاممەن كەرى بايلانىستى نىعايتۋ ماسەلەلەرى تالقىلاندى.
سونىمەن قاتار ءۇشارال قالاسىندا «ەسىكتەن ەسىككە» ءىس-شاراسى ۇيىمداستىرىلىپ, تۇرعىندارمەن اتاۋلى كەزدەسۋلەر وتكىزىلدى. وندا دەپۋتاتتار ازاماتتارعا جاڭا كونستيتۋتسيا جوباسى مەن جۇرگىزىلىپ جاتقان رەفورمالاردىڭ ءمانىن ءتۇسىندىرىپ, سۇراقتارعا جاۋاپ بەردى.
تۇركىستان وبلىسىندا اتا زاڭنىڭ جاڭا جوباسىن تالقىلاۋعا ارنالعان اقپاراتتىق-ءتۇسىندىرۋ جۇمىستارى جالعاسىپ جاتىر. سەنات دەپۋتاتتارى ءالي بەكتاەۆ, مۇرات قادىربەك پەن الىشەر ساتۆالديەۆ تۇلكىباس اۋدانىنىڭ تۇرعىندارىمەن كەزدەستى. ولار «تۇلكىباس يننوۆاتسيالىق كەشەنى» جشس وندىرىستىك الاڭىنىڭ جۇمىسشىلارىمەن ديالوگ بارىسىندا ازاماتتاردىڭ قۇقىقتارى مەن بوستاندىقتارىنىڭ كەپىلدىكتەرى, ەڭبەك ادامىنىڭ مارتەبەسىن كوتەرۋ, ونى الەۋمەتتىك قورعاۋ شارالارىنا توقتالدى. اتاپ ايتقاندا, ەڭبەك ەتۋ قۇقىعىن, ماماندىقتى ەركىن تاڭداۋ, قاۋىپسىز ەڭبەك جاعدايىن, سونداي-اق جۇمىس ۋاقىتى مەن دەمالىس ماسەلەلەرىن بەكىتەتىن كونستيتۋتسيالىق نورمالاردى ساراپتاپ بەردى.