استانا. 26 ناۋرىز. بۇرناعى كۇنى نەمىستىڭ Germanwings كومپانياسىنىڭ Airbus A320 ۇشاعىمەن بىرگە وپات بولعان قازاقستاندىق وتباسى مۇشەلەرى باسىندا باسقا رەيسپەن ۇشپاقشى بولىپتى. بۇل تۋرالى مارقۇمداردىڭ جاقىندارى سوزدەرىنە سىلتەمە جاساعان «حابار» تەلەارناسى حابارلادى.
«وسكەمەندە ارىپتەستەرى ايجان ەسەنعاليەۆا مەن ونىڭ جاقىندارىنىڭ ۇشاق اپاتىندا قازا تابۋلارىنا قاتتى قايعىرىپ جاتىر. «كازتسينك» كومپانياسى مارقۇمداردىڭ دەنەلەرىن جەتكىزۋ مەن جەرلەۋگە كەتەتىن شىعىنداردىڭ ءبارىن وزىنە الۋعا دايىن», - دەلىنگەن حابارلامادا.
وتباسىنىڭ قايعىلى جاعدايعا قازا تاپقان ءۇش مۇشەسىنىڭ دە وسى كاسىپورىنعا قاتىستارى بار ەكەن.
بۇگىن جۇمىسقا شىعۋعا ءتيىس بولعان ايجان ەسەنعاليەۆانىڭ كابينەتى ەندى قاڭىراپ تۇر. ول ۇلىنىڭ دەنساۋلىعىن تۇزەتۋ ءۇشىن مەرەكە كۇندەرى ەۋروپاعا بەس كۇنگە ۇشىپ كەتكەن ەكەن. ارىپتەستەرى ونىمەن 5 كۇنگە عانا قوشتاسىپ تۇرمىز دەپ ەسەپتەگەن. ال شىن مانىندە... ماڭگىلىككە بولىپ شىققان.
كاسىپورىندا قىزمەت ەتەتىن باقىت سماعۇلوۆا ءوزىنىڭ باسشىسىنان وسى 5 كۇنگە عانا قوشتاسىپ تۇرعاندارىن ەستىگەن. ولار كوپ جىلدار بويى ءبىر جەردە قاتار جۇمىس ىستەر كەلە جاتقاندارىندا ارىپتەستىك شەڭبەرىنەن دە شىعىپ, ءوزارا جاقسى دوس بولىپ كەتكەن.
ەندى باقتى بۇدان بىلاي ايجاننىڭ كابينەتىنە كىرىپ كەلمەيتىنىنە سەنە الار ەمەس.
«ماعان بۇل وتە اۋىر قايعى! مەن ەشتەڭە ايتا الار ەمەسپىن. ايتا المايمىن... ماعان ءتىپتى ايتاتىن ءسوز دە جوق... ءبىزدىڭ ونى جوعالتىپ العانىمىزعا سەنە الار ەمەسپىن. مۇنىڭ ءبارى قانداي جامان!», - دەدى «كازتسينك» جشس بوس ۋاقىت جانە سپورت كەشەنىنىڭ باس مامانى ب.سماعۇلوۆا.
ايجان ەسەنعاليەۆا اينالاسىنداعى جۇرتقا شۋاعىن شاشىپ جۇرەتىن قامقور ادام بولىپتى. سپورت سارايىنىڭ, بالالار لاگەرلەرى مەن دەمالىس جاعدايلارى تىكەلەي ونىڭ قامقورلىعى ارقاسىندا جولعا قويىلىپ كەلگەن كورىنەدى. ارىپتەستەرى ايجاننىڭ كۇيەۋى مەن ۇلى تۋرالى دا وتە جاقسى پىكىرلەر بىلدىرگەن. ءادىل كاسىپورىندا مىرىش ءوندىرىسىنىڭ اپپاراتشىسى بولعان, ال ەربول يمانقۇلوۆ «جاڭا مەتاللۋرگيا» جوباسىنىڭ باسىندا تۇرعان, «كازتسينكتىڭ» مىس بالقىتۋ زاۋىتىنىڭ ديرەكتورى بولىپ ىستەپتى. ونىڭ كرەمني ءوندىرىسىن كوتەرمەكشى بولىپ قاراعاندىعا كەتكەنىنە ءبىر جىلدان ەندى اسىپ بارادى ەكەن.
«بىزدەردىڭ وتباسىمىزبەن بىرگە دەمالىپ تۇراتىن كەزدەرىمىز دە بولۋشى ەدى. ولار شىن مانىندە ناعىز جايساڭ, ومىرگە قۇشتار جاندار ەدى. ەربولدىڭ ءازىل-قالجىڭى تاۋسىلمايتىن, دومبىرا دا تارتاتىن. مىنا جاعداي ءبىزدى تەڭسەلتىپ كەتتى», - دەدى «كازتسينك» جشس ديرەكتورى يۋري گۋسەۆ.
دوستارى مەن تۋعان-تۋىستارى بۇل وتباسى مۇشەلەرىنىڭ نەگە مىنا رەيسكە تاپ كەلگەندەرىن ءالى تۇسىنبەيدى. ايتۋلارىنشا, ولار ۇيگە باسىندا فرانكفۋرت ارقىلى قايتىپ كەلمەكشى بولىپتى. شاماسى, بيلەتتى ەڭ سوڭعى ساتتە اۋىستىرىپ العان سياقتى.
بۇلاردىڭ قايعىلى قازاعا ۇشىراعاندارىنا ەربول يمانقۇلوۆتىڭ ۇيدە قالعان اناسى مەن ولاردىڭ قىزى دانا ءالى سەنەر ەمەس. ەندى بۇلار فرانتسياعا شۇعىل ۇشىپ كەتكەن ايجاننىڭ سىڭلىسىنەن حابار كۇتىپ وتىر. ول جاقىندارىن تانۋ ءۇشىن شاقىرىلعان ەكەن.
مۇرات ايتقوجا.