مادەنيەت جانە اقپارات مينيسترلىگى 20 مىڭعا جۋىق قوعامدىق ۇيىم قىزمەتىن تالداپ, تەكسەرۋ جۇرگىزگەن. تەكسەرۋ ناتيجەسىندە 2025 جىلعى 24 جەلتوقساندا الماتىداعى ۇلتتىق كىتاپحانادا بىرقاتار ازاماتقا باۋىرجان مومىش ۇلى اتىنداعى «نامىس», «باتىر شاپاعاتى», «ەل جاناشىرى» توسبەلگىلەرى, «التىن ادام» جىل سەرتيفيكاتى مەن ستاتۋەتكاسى تابىستالعانى انىقتالدى. بۇل تۋرالى پرەمەر-ءمينيستردىڭ ورىنباسارى سەرىك جۇمانعاريننىڭ ءماجىلىس دەپۋتاتتارىنا بەرگەن جاۋابىندا ايتىلعان, دەپ جازادى Egemen.kz.
«ەل جاناشىرى» توcبەلگىسىن ساتۋ جانە تاراتۋ فاكتىسى بويىنشا ديدار قۇيقاباەۆقا ايىپپۇل سالىنعان. سونداي-اق قازىر «Qazaqstan ardagerleri» زاڭدى تۇلعالار بىرلەستىگى 2025 جىلعى 25 جەلتوقساندا تابىستاعان باۋىرجان مومىش ۇلى اتىنداعى «نامىس» توcبەلگىسىنە گەرالديكالىق ساراپتاما جۇمىستارى جۇرگىزىلىپ جاتىر.
بۇگىندە مادەنيەت جانە اقپارات مينيسترلىگى حالىقارالىق جانە تمد ەلدەرىنىڭ تاجىريبەسىن زەردەلەۋگە كىرىسكەن. «قوعامدىق بىرلەستىكتەر تۋرالى» جانە «كوممەرتسيالىق ەمەس ۇيىمدار تۋرالى» زاڭدارعا وزگەرىستەر مەن تولىقتىرۋلار ەنگىزۋ ءۇشىن زاڭ جوباسىن ازىرلەپ, پىسىقتاپ جاتىر. ونداعى نورمالار قوعامدىق بىرلەستىكتەردىڭ, قوعامدىق قورلاردىڭ, باسقا دا ۇكىمەتتىك ەمەس ۇيىمداردىڭ ناگرادالارىنا قويىلاتىن تالاپتاردى كۇشەيتۋگە باعىتتالماق. زاڭ قابىلدانعان جاعدايدا قوعامدىق بىرلەستىكتەر ەلىمىزدىڭ جانە شەتەل ازاماتتارىن قوعامدىق ۇيىمدارعا سىڭىرگەن ەڭبەكتەرى ءۇشىن عانا وزدەرىنىڭ ناگرادالارىمەن ماراپاتتاۋعا قۇقىلى بولادى.
قىرعىزستان بيلىگى ەكس-پرەزيدەنت اتامباەۆتى مەملەكەتتىك ناگرادالارىنان ايىردى
«بۇدان بولەك ەلىمىزدە «قازاقستان رەسپۋبليكاسىنىڭ مەملەكەتتىك ناگرادالارىنىڭ اقپاراتتىق جۇيەسى» پلاتفورماسى جۇمىس ىستەيدى. سونداي-اق اسكەري, ارناۋلى مەملەكەتتىك, قۇقىق قورعاۋ جانە ورتالىق اتقارۋشى ورگانداردىڭ ۆەدومستۆولىق ناگرادالارىن ەسەپكە الۋ جانە سالانى جۇيەلەۋ ماقساتىندا پرەزيدەنت ءىس باسقارماسىمەن بىرلەسە وتىرىپ, «ۆەدومستۆولىق ناگرادالاردىڭ اقپاراتتىق جۇيەسى» پلاتفورماسى جاسالدى. اقپاراتتىق جۇيەدە ءاربىر مەملەكەتتىك ورگاننىڭ وزىنە تيەسىلى مەدالدارى مەن توسبەلگىلەرىنىڭ جالپى سانى, تابىستالعان ادامدار جانە ولاردى بەرۋ نەگىزدەمەلەرى تۋرالى اقپاراتتار, ۆەدومستۆولىق ناگرادالاردى تابىستاۋ جونىندەگى كوميسسيا تۋرالى مالىمەتتەر قامتىلادى», دەلىنگەن سەرىك جۇمانعاريننىڭ جاۋابىندا.
بۇعان دەيىن ءماجىلىس دەپۋتاتى ماقسات تولىقباي بەيمالىم ۇيىمداردىڭ وڭدى-سولدى مەدال, وردەن تابىستاپ جاتقانىن ايتىپ, ماسەلە كوتەرگەن ەدى.