الماتىدا ۇلتتىق ويۋ-ورنەك داستۇرىنە ارنالعان كورمە اشىلدى

كورمە ەكسپوزيتسياسى ورتالىق مۋزەيدىڭ ەتنوگرافيالىق قورىندا ساقتالعان سيرەك ءارى قۇندى جادىگەرلەر نەگىزىندە ۇيىمداستىرىلعان. مۇندا جۇننەن باسىلىپ جانە توقىلىپ جاسالعان ءداستۇرلى توقىما بۇيىمدارى – «تۇسكيىز», «تەكەمەت», «سىرماق», «الاشا», «قورجىن», «بوعجاما», سونداي-اق ماتادان تىگىلگەن, كەستەمەن بەزەندىرىلگەن «تۇسكىلەم», «قاراقاس», «جەم دوربا» سياقتى بۇيىمدار ۇسىنىلعان. سونىمەن قاتار اعاش پەن تەرىدەن جاسالعان تۇرمىستىق جانە شارۋاشىلىققا ارنالعان «ساندىق», «كەبەجە», «تورسىق», كەسەقاپتار, سىقىرلاۋىق (اعاش ەسىك) سەكىلدى ەتنوگرافيالىق ەكسپوناتتار دا ەكسپوزيتسيانىڭ ەلەۋلى بولىگىن قۇرايدى.

«كورمەدەگى بۇيىمداردىڭ كوركەمدىك ەرەكشەلىگى ويۋ-ورنەكتەردىڭ ءارتۇرلى تاسىلمەن ورىندالۋىنان كورىنەدى. كيىز بۇيىمداردا ورنەك باسۋ, ويىپ قيۋ, جاپسىرۋ جانە سىرۋ, قيۋلاستىرۋ ادىستەرى ارقىلى ايقىن كومپوزيتسيالار جاسالعان. توقىما بۇيىمداردا ءورىپ توقۋ, تەرمە, باسقۇر توقۋ تاسىلدەرى قولدانىلىپ, ورنەك ءجىپتىڭ ءتۇسى مەن قۇرىلىمى ارقىلى كورىنىس تابادى. ماتادان تىگىلگەن تۇسكيىزدەر مەن تۇسكىلەمدەردە ويۋ-ورنەك كەستەلەۋ, زەرلەۋ, التىن جانە كۇمىس جىپپەن تىگۋ ارقىلى بەينەلەنىپ, جيەكتەرى ماتا, اڭ تەرىلەرىمەن جۇرىندالعان. ال, اعاش پەن تەرى بۇيىمدارىندا ورنەك ويۋ, كۇيدىرۋ جانە بەدەرلەۋ تاسىلدەرىمەن ءتۇسىرىلىپ, ولاردىڭ تەك تۇرمىستىق ەمەس, ەستەتيكالىق ماڭىزىن دا ايقىندايدى», دەيدى ۇلتتىق ورتالىق مۋزەي انتروپولوگيا جانە ەتنولوگيا ءبولىمىنىڭ كىشى عىلىمي قىزمەتكەرى سافيا ايازباەۆا.

قازاقتىڭ ويۋ-ورنەگى يسەسكو-نىڭ مۇرالار تىزىمىنە ەندى

ەكسپوزيتسيادا قازاق ويۋ-ورنەك ونەرىنە ءتان زوومورفتىق, گەومەتريالىق جانە وسىمدىك تەكتەس ورنەك تۇرلەرى كەڭىنەن قامتىلعان. اسىرەسە مولشىلىق پەن بەرەكەنىڭ, ومىرشەڭدىكتىڭ نىشانى سانالاتىن «قوشقار ءمۇيىز» ويۋى كوپتەگەن بۇيىمداردىڭ كوركەمدىك وزەگىنە اينالعان. ويۋ-ورنەكتەردىڭ عاسىرلار بويى وزگەرمەي, ۇرپاقتان-ۇرپاققا جالعاسىپ كەلە جاتقانى ۇلتتىق شەبەرلىك ونەرىمىزدىڭ رۋحاني ساباقتاستىعىنىڭ دالەلى دەيدى ونەرتانۋشىلار.

ستەفاني باۋەرلە: قازاقتىڭ ويۋ-ورنەكتەرىنەن ءومىردىڭ ءوزىن كوردىم