بيىل ەلىمىزدە شامامەن 47 مىڭ وقۋشىعا ارنالعان 90 جاڭا مەكتەپتىڭ قۇرىلىسى جوسپارلانعان. جوسپار وقۋ-اعارتۋ مينيسترلىگىنىڭ اپاتتى جانە ءۇش اۋىسىمدا وقىتاتىن مەكتەپتەردىڭ ماسەلەسىن كەزەڭ-كەزەڭىمەن شەشۋ باعىتىندا اتقارىپ جاتقان جۇيەلى جۇمىستارى اياسىندا جۇزەگە اسادى, دەپ حابارلايدى Egemen.kz.
مينيسترلىكتىڭ مالىمدەۋىنشە جاڭا ءبىلىم وشاقتارىن ىسكە قوسۋ ارنايى مەملەكەتتىك قور, ءبىلىم بەرۋ ينفراقۇرىلىمىن قولداۋ قورى, جەرگىلىكتى بيۋدجەت قاراجاتى جانە جەكە ينۆەستيتسيالار ەسەبىنەن قارجىلاندىرىلادى.
«مەكتەپتەردىڭ باسىم بولىگى استانا مەن شىمكەنت قالالارىندا, سونداي-اق اقتوبە وبلىسى, اتىراۋ وبلىسى, شىعىس قازاقستان وبلىسى, جامبىل وبلىسى, جەتىسۋ وبلىسى, باتىس قازاقستان وبلىسى جانە تۇركىستان وبلىسى اۋماقتارىندا بوي كوتەرىپ جاتىر. سونىمەن قاتار ءبىلىم بەرۋ ساپاسىن ارتتىرۋ ماقساتىندا حيميا, فيزيكا, بيولوگيا, روبوتوتەحنيكا جانە STEM باعىتتارى بويىنشا 1000 زاماناۋي پاندىك كابينەت ساتىپ الىنىپ, مەكتەپتەرگە ورناتىلدى. سوڭعى ءۇش جىل ىشىندە 4320 پاندىك كابينەتپەن قامتاماسىز ەتىلدى.
مەملەكەت باسشىسىنىڭ تاپسىرماسىنا سايكەس, 2029 جىلعا دەيىن بىرىڭعاي زاماناۋي مەكتەپ ينفراقۇرىلىمىنا كوشۋ ءۇشىن 1300 ءبىلىم بەرۋ ۇيىمىن جاڭعىرتۋ كوزدەلگەن. ونىڭ 900-ءى اۋىل مەكتەپتەرى. وتكەن جىلى 209 مەكتەپتە جاڭارتۋ جۇمىستارى اياقتالسا, 2026 جىلى تاعى 98 مەكتەپتە رەنوۆاتسيا جالعاسىپ جاتىر», دەلىنگەن ۆەدومستۆو حابارلاماسىندا.
مەكتەپتەردە ەسەپ بەرۋ ءۇشىن وتكىزىلەتىن فورۋمدار مەن جيىندار سانى قىسقارادى
جاڭعىرتۋ اياسىندا مەكتەپ عيماراتتارىن كۇردەلى جوندەۋ, پاندىك كابينەتتەرمەن جابدىقتاۋ, جيھازداردى جاڭارتۋ, كىتاپحانا مەن اسحانالاردى مودەرنيزاتسيالاۋ, سپورت زالدارىن سالۋ نەمەسە قايتا جوندەۋ, قوعامدىق كەڭىستىكتەردى اباتتاندىرۋ جانە قاۋىپسىزدىك جۇيەلەرىن ورناتۋ قاراستىرىلعان.
ەلىمىزدە 200-دەن استام جاڭا مەكتەپ سالىنادى
ايتا كەتەيىك, 2025 جىلدىڭ قورىتىندىسى بويىنشا ەل كولەمىندە 236 مىڭ وقۋشىعا ارنالعان 162 مەكتەپ پايدالانۋعا بەرىلدى. جالپى سوڭعى ءۇش جىلدا 746 مىڭ وقۋشى ورنى بار 584 مەكتەپتىڭ قۇرىلىسى اياقتالعان.
جامبىل وبلىسىندا ءۇش اۋىسىمدى مەكتەپ ماسەلەسى شەشىلدى