ۇلىتاۋ وبلىسىندا «ادىلەتتى جانە پروگرەسسيۆتى قازاقستاننىڭ حالىقتىق كونستيتۋتسياسى ءۇشىن!» وڭىرلىك كواليتسيا جۇمىسىن باستادى, دەپ حابارلايدى Egemen.kz.
بۇل – كونستيتۋتسيالىق رەفورمالاردى حالىققا كەڭىنەن تۇسىندىرۋگە باعىتتالعان جۇيەلى جۇمىستىڭ كەزەكتى ءارى ماڭىزدى كەزەڭى. ۇلىتاۋ وبلىسىنىڭ وڭىرلىك كواليتسياسىنىڭ قۇرامىنا بەس ساياسي پارتيانىڭ, سونداي-اق كاسىپوداق ۇيىمدارىنىڭ, ارداگەرلەر كەڭەسىنىڭ, ءوڭىردىڭ نەگىزگى قوعامدىق كۇشتەرىنىڭ وكىلدەرى كىردى.
وڭىرلىك كواليتسيانىڭ اشىلۋىنا ۇلىتاۋ وبلىستىق ءماسليحاتىنىڭ توراعاسى, وبلىستىق كواليتسيا توراعاسى, كونستيتۋتسيالىق رەفورمالار جونىندەگى كوميسسيا مۇشەسى باۋىرجان شىڭعىسوۆ, ۇلىتاۋ وبلىسى اكىمىنىڭ ورىنباسارى, وڭىرلىك كواليتسيا توراعاسىنىڭ ورىنباسارى زينا اقىلبەكوۆا, پارتيا توراعالارى مەن كواليتسيا مۇشەلەرى قاتىستى.
باۋىرجان شىڭعىسوۆ كونستيتۋتسيالىق رەفورما جونىندەگى كەڭەستىڭ 12 وتىرىسى وتكەندىگىن, 10 مىڭنان استام ءوتىنىش كەلىپ تۇسكەندىگى جايىندا ايتىپ ءوتتى. مودەراتور, «AMANAT» پارتياسى ۇلىتاۋ وبلىستىق فيليالىنىڭ اتقارۋشى حاتشىسى ەرلان مىرزابەكوۆ ءبىر ايعا سوزىلاتىن تۇسىندىرمە جۇمىستارىنىنىڭ جوسپارىمەن ءبولىستى.
«اۋىل» پارتياسى ۇلىتاۋ وبلىستىق فيليالىنىڭ توراعاسى ابزال جيەنباەۆ, «اق جول» پارتياسى ۇلىتاۋ وبلىستىق فيليالىنىڭ توراعاسى الىبەك يسين, «قازاقستان حالىق پارتياسى» ۇلىتاۋ وبلىستىق فيليالىنىڭ توراعاسى ورازالى باقىرباەۆ بىرلەسە جۇمىس ىستەۋگە دايىن ەكەندىكتەرىن جەتكىزدى.
جاڭا كونستيتۋتسيا جوباسى بويىنشا رەفەرەندۋمدا قانشا ادام داۋىس بەرە الادى؟
وڭىرلىك كواليتسيا مۇشەلەرى جاڭا كونستيتۋتسيا جوباسى مەملەكەتتىڭ ساياسي جۇيەسىن ودان ءارى جاڭعىرتۋعا, الەۋمەتتىك كەپىلدىكتەردى نىعايتۋعا, كاسىپكەرلىكتى قولداۋعا, عىلىمدى, مادەنيەتتى جانە ۇلتتىق قۇندىلىقتاردى دامىتۋعا باعىتتالعان ستراتەگيالىق باعدارعا تولىق سايكەس كەلەتىنىن اتاپ ءوتتى.
15-ناۋرىزعا بەلگىلەنگەن رەفەرەندۋمعا ازاماتتاردىڭ سانالى تۇردە قاتىسۋىن قامتاماسىز ەتۋ ماقساتىندا ەڭبەك ۇجىمدارىمەن, ساراپشىلار قاۋىمىمەن جانە تۇرعىندارمەن كواليتسيا مۇشەلەرى ءتۇسىندىرۋ جۇمىسىن باستاۋدى جوسپارلاپ وتىر. سونىڭ ىشىندە شالعاي ەلدى مەكەندەر دە بار. سەبەبى ءاربىر قازاقستاندىق ازاماتتىڭ داۋىسى اسا ماڭىزدى.