مەملەكەت باسشىسى قىزىلوردادا وتكەن ۇلتتىق قۇرىلتايدا «ەلىمىزدىڭ رۋحاني-مادەني مۇراسىن الەمگە تانىتۋ تۋرالى باستامالار كوتەرىلدى. سوعان سايكەس جوسپارلى جۇمىس جۇرگىزىلىپ جاتىر» دەگەنى بەلگىلى. سونىڭ ايعاعىنداي, قازاقتىڭ ءتول مادەنيەتى مەن تانىمىن كورسەتەتىن ءداستۇرلى ويۋ-ورنەگى رەسمي تۇردە يسەسكو-نىڭ يسلام الەمى مۇرالارى تىزىمىنە ەندى. بۇل تۋرالى كەشە مەملەكەتتىك كەڭەسشى ەرلان قارين الەۋمەتتىك جەلىدەگى پاراقشاسىندا جاريالادى.
قازاقتىڭ ءتول مادەني ەرەكشەلىگىنە جاتاتىن قوشقارمۇيىز, بوتامويىن, تۇلكىباس, قۇسقانات جانە تاعى باسقا ويۋلارى – كوشپەلىلەر وركەنيەتىنىڭ بىردەن-ءبىر كورسەتكىشى. زەر سالىپ قاراعان جان ويۋ-ورنەكتەردەن ءوسىپ كەلە جاتقان, ۇشىپ بارا جاتقان نەمەسە العا جىلجۋشى قۇبىلىستى اڭعارادى. دەمەك, بۇلار دامۋدىڭ بەلگىسى دەسەك قاتەلەسە قويمايمىز. حالقىمىزدىڭ ۇلتتىق كودى ويۋ-ورنەكتەردىڭ مازمۇنىندا دەۋگە تولىق نەگىز بار.
«قازىر قازاقستان ماتەريالدىق ەمەس مادەني مۇرالار تىزىمىنە ءوز نىساندارىن بەلسەندى تۇردە ەنگىزىپ جاتقان 25 ەلدىڭ قاتارىنا كىرەدى. بىراق مۇنىمەن توقتاپ قالۋعا بولمايدى. ءتول تاريحىمىزدى زەردەلەۋ, ونەرىمىز بەن مادەنيەتىمىزدى وركەندەتۋ ءۇشىن ءالى دە كوپ جۇمىس ىستەلۋگە ءتيىس. بۇل شارالار الداعى ۋاقىتتا دا جالعاسا بەرەدى» دەگەن پرەزيدەنت ءسوزىنىڭ دالەلى وسى شىعار.
قازاقتىڭ ءداستۇرلى ويۋ-ورنەگى يسەسكو-نىڭ يسلام الەمى مۇرالارى تىزىمىنە ەنگەنى تۋرالى شەشىم 11 اقپاندا وتكەن يسەسكو يسلام الەمى مۇرالارى كوميتەتىنىڭ 13-سەسسياسىندا قابىلدانىپتى. مەملەكەتتىك كەڭەسشى ەرلان قارين بۇل تۋرالى:
«ويۋ-ورنەك – مادەني بىرەگەيلىگىمىز بەن تاريحي ساباقتاستىعىمىزدى نىعايتۋعا ىقپال ەتەتىن نەگىزگى ەتنومادەني كود.
ويۋ-ورنەكتىڭ يسەسكو-نىڭ بەدەلدى تىزىمىنە ەنۋى – قازاقستاننىڭ ماتەريالدىق ەمەس مادەني مۇراسىن حالىقارالىق دەڭگەيدە ىلگەرىلەتۋدەگى ماڭىزدى قادام.
بۇعان دەيىن, ياعني 2023 جىلى يسەسكو تىزىمىنە تۇركى وركەنيەتىنىڭ باستى نىشاندارىنىڭ بىرىنە اينالعان ءداستۇرلى «توعىزقۇمالاق» ويىنى قوسىلعان ەدى.
پرەزيدەنتتىڭ ۇلتتىق قۇرىلتاي وتىرىستارىندا بەرگەن تاپسىرمالارىنا سايكەس, قازاقستاننىڭ مادەني مۇرا نىساندارىن يۋنەسكو جانە يسەسكو تىزىمدەرىنە ەنگىزۋ جۇمىسى جالعاسادى», دەپ مالىمدەدى.
ماسەلەن, قوشقارمۇيىز ويۋى قازاق حالقىنىڭ بۇكىل تىنىس-تىرشىلىگىن تانىتادى. كەي قولدانىستا ول قىرىقمۇيىز, ءسىڭارمۇيىز, ارقارمۇيىز بولىپ تۇرلەنىپ وتىرادى. قوشقارمۇيىز ءتورت تارماقتان قۇرالىپ, ورتاسىنداعى ايقىش دۇنيە تەپە-تەڭدىگىن كورسەتەدى. بۇلاردىڭ قۇپياسىن اشىپ, تەحنولوگيالىق جەتىستىكتەرمەن قابىستىرا الساق, ۇتارىمىز كوپ.