الەۋمەتتىك جەلىدە Kaspi Gold كارتالارىنان بەلگىسىز تولەمدەر الىنىپ جاتقانىن ايتىپ, شاعىمدانۋشىلار كوبەيدى. تۇتىنۋشىلار ەشقانداي جازىلىم قوسپاسا دا Google نەمەسە Telegram قوسىمشالارىنىڭ سىيلىقتارىن پايدالانعانى ءۇشىن اقشا ۇستالىپ جاتىر, دەپ حابارلايدى Egemen.kz.
الەۋمەتتىك جەلىدە تاراعان جازبالاردىڭ بىرىندە قولدانۋشى الدىمەن كارتاسىنان «0 تەڭگە» كولەمىندە تەستىلىك وپەراتسيا جۇرگىزىلگەنىن, كەيىن تسيفرلىق ساتىپ الۋلار ءۇشىن ناقتى سومالار شەگەرىلە باستاعانىن ايتقان. پىكىرلەردە وسىنداي جاعدايعا تاپ بولعاندار از ەمەس ەكەنى بەلگىلى بولدى.
زارداپ شەككەندەردىڭ ايتۋىنشا, ادەتتە الدىمەن سىناق تولەمى جاسالىپ, ارتىنان Telegram جەلىسىندەگى «سىيلىقتار», «پرەميۋم» قىزمەتى نەمەسە باسقا دا تسيفرلىق ونىمدەر ءۇشىن قاراجات الىنادى. ال بانك كوشىرمەسىندە تولەم «Google» رەتىندە كورسەتىلىپ, بۇل جاعداي تۇسىنبەۋشىلىك تۋعىزادى.
Kaspi.kz وكىلدەرى بانك جۇيەسىندە مۇنداي ەشقانداي دەرەكتەر بولماعانىن مالىمدەدى. ولاردىڭ تۇسىندىرۋىنشە, ينتەرنەت ارقىلى تولەم جاساۋ ءۇشىن كارتا ءنومىرى, جارامدىلىق مەرزىمى جانە CVV-كود سەكىلدى بارلىق دەرەكتەردى قولمەن ەنگىزۋ قاجەت. كارتا دەرەكتەرى ءۇشىنشى تۇلعالاردىڭ قولىنا ءتۇسۋى مۇمكىن. بانك كارتاسىنىڭ قاۋىپسىزدىگىنە جاۋاپكەرشىلىك كارتا يەسىنىڭ وزىنە جۇكتەلەدى.
ەگەر كارتا دەرەكتەرى جاريا بولىپ كەتكەن بولسا, ونى قايتا شىعارۋ ۇسىنىلادى. الايدا جارامدىلىق مەرزىمى اياقتالماعان كارتانى قايتا شىعارۋ قۇنى – 1 995 تەڭگە. بۇل جاعداي دا الەۋمەتتىك جەلىدە نارازىلىق تۋدىرعان.
Kaspi Gold كارتاسىنىڭ جىلدىق قىزمەت كورسەتۋ اقىسى قىمباتتاي ما؟
كيبەرقاۋىپسىزدىك ماماندارىنىڭ ايتۋىنشا, الاياقتار ۇرلانعان كارتا دەرەكتەرىن Google اككاۋنتىنا تىركەپ, كەيىن سول ارقىلى Telegram ىشىندەگى ساتىپ الۋلاردى تولەيدى. ناتيجەسىندە تولەم Google اتاۋىمەن كورىنگەنىمەن, قاراجات شىن مانىندە مەسسەندجەرگە جىبەرىلەدى.
بانكتەر تۋرالى جاڭا زاڭعا بايلانىستى دەپوزيتتەرگە كەپىلدىك بەرۋدە نە وزگەرەدى؟
سوندىقتان كۇدىكتى تولەمدەر انىقتالعان جاعدايدا ءموبيلدى قوسىمشا ارقىلى ينتەرنەت-تولەمدەردى بىردەن ءوشىرىپ, بەلسەندى جازىلىمداردى تەكسەرىپ, قاجەتسىزدەرىن الىپ تاستاۋ كەرەك. قاجەت بولعان جاعدايدا كارتانى قايتا شىعارعان ءجون.