ۇكىمەتتىڭ كەڭەيتىلگەن وتىرىسىندا پرەزيدەنت ىشكى جالپى ءونىمنىڭ ءوسۋى ازاماتتاردىڭ ناقتى تابىسىنا تىكەلەي اسەر ەتۋى كەرەكتىگىن ايتتى. بۇل ۇستانىم الداعى كەزەڭدە ەكونوميكالىق ساياساتتىڭ باعىتىن ايتارلىقتاي وزگەرتۋى ىقتيمال.
ىشكى جالپى ءونىمنىڭ ءوسۋى ءاردايىم حالىق تابىسىنىڭ ارتۋىنا اسەر ەتە بەرمەيتىنى بەلگىلى. سول سەبەپتى الداعى ۋاقىتتا ەكونوميكالىق ساياساتتىڭ باسىمدىعى جاي عانا پايىزدىق وسىمگە ەمەس, ناقتى تابىس دەڭگەيىنە, جۇمىسپەن قامتۋدىڭ ساپاسىنا, ساتىپ الۋ قابىلەتىنە ويىسۋى مۇمكىن. مۇنداي كوزقاراس ازاماتتاردىڭ ءال-اۋقاتىن مەملەكەتتىك باسقارۋ جۇيەسىنىڭ نەگىزگى ولشەمىنە اينالدىرادى.
ءىس جۇزىندە بۇل قادام ينفلياتسياعا قارسى شارالاردى كۇشەيتۋگە يتەرمەلەيدى. سەبەبى باعانىڭ ءوسۋى نومينالدى تابىستىڭ ۇلعايۋىن تەز ارادا جوققا شىعارادى. وسىعان بايلانىستى ۇكىمەت پەن ۇلتتىق بانكتىڭ باعانى تۇراقتاندىرۋ جولىنداعى ءىس-قيمىلدارىن ۇيلەستىرۋى, ناقتى تەتىكتەردى ىسكە قوسۋى ىقتيمال. اسىرەسە كۇندەلىكتى تۇتىنۋ نارىعىنداعى باعا قىسىمى جوعارى سەگمەنتتەرگە نازار اۋدارتا تۇسەدى.
ەكونوميكالىق ساياساتتىڭ تاعى ءبىر ماڭىزدى باعىتى – مەملەكەت تاراپىنان كورسەتىلەتىن قولداۋدىڭ الەۋمەتتىك-ەكونوميكالىق قايتارىمىنا قويىلاتىن تالاپتاردى كۇشەيتۋ. سالىقتىق جەڭىلدىك پەن سۋبسيديا العان كاسىپورىندار جالاقىنى ءوسىرۋ, جۇمىس ورىندارىن اشۋ مەن ساقتاۋ, قىزمەتكەرلەردى وقىتۋعا ينۆەستيتسيا سالۋ ءتارىزدى مىندەتتەمەلەردى موينىنا الۋى مۇمكىن. مۇنداي ءتاسىل بيۋدجەتتەن بەرىلەتىن ىنتالاندىرۋ تەك تابىس پەن اينالىمدى كوبەيتىپ قويماي, ەڭبەك جاعدايىن جاقسارتۋعا, قىزمەتكەرلەر كىرىسىن ارتتىرۋعا قىزمەت ەتۋىن كوزدەيدى.
ناقتى تابىستى ءوسىرۋ مەن جۇمىسپەن قامتۋدى جاقسارتۋعا باعىتتالعان شارالاردىڭ ناتيجەسى بىردەن بايقالمايدى. بۇل – ۋاقىتتى تالاپ ەتەتىن ۇدەرىس. مەملەكەت حالىق كىرىسىن تىكەلەي كوبەيتە المايتىنىن دا ەسكەرگەن ءجون. نارىق دەربەس جۇمىس ىستەيدى, ال بيلىك قۇرىلىمدارىنىڭ مىندەتى – بيزنەستى دامىتۋعا قولايلى ورتا قالىپتاستىرىپ, تابىستىڭ وسۋىنە جول اشاتىن ىنتالاندىرۋ تەتىكتەرىن ۇسىنۋ.
رامازان ەسەنعازيەۆ,
ەكونوميكالىق زەرتتەۋلەر ينستيتۋتى ماكروەكونوميكالىق زەرتتەۋلەر جانە بولجامداۋ ورتالىعىنىڭ جەتەكشى ساراپشىسى