وتاندىق كوللەدج پەداگوگتەرى حالىقارالىق «ETF Green Skills Awards 2025» جوباسىنىڭ جەڭىمپازدارى اتاندى. اتالعان بايقاۋ ەۋروپالىق وقىتۋ قورىنىڭ (European Training Foundation – ETF) ۇيىمداستىرۋىمەن ءوتتى, دەپ حابارلايدى Egemen.kz.
وقۋ-اعارتۋ مينيسترلىگىنىڭ حابارلاۋىنشا, ن.بەكبوسىنوۆ اتىنداعى ماڭعىستاۋ ەنەرگەتيكالىق كوللەدجىنىڭ ارنايى ءپان وقىتۋشىلارى دوسان قاراشاەۆ پەن اينۇر ونداحانوۆا حالىقارالىق دەڭگەيدەگى بەدەلدى «ETF Green Skills Awards 2025» جوباسىنان جەڭىسپەن ورالدى.
پەداگوگتەر كونكۋرسقا «زاماناۋي ءبىلىم بەرۋ باعدارلامالارىنىڭ جاسىل تەحنولوگيالاردى دامىتۋداعى ءرولى» تاقىرىبىنداعى اۆتورلىق جوبالارىن ۇسىنىپ, جاڭارتىلاتىن ەنەرگيا كوزدەرىن وقۋ ۇدەرىسىنە ءتيىمدى ەنگىزۋ, سونداي-اق بولاشاق مامانداردىڭ ەكولوگيالىق قۇزىرەتتىلىگىن ارتتىرۋ باعىتىنداعى وزەكتى ماسەلەلەردى جان-جاقتى نەگىزدەدى.
حالىقارالىق جوباعا الەمنىڭ 50-دەن استام ەلىنەن 250-دەن اسا ۇمىتكەر قاتىسىپ, ىرىكتەۋ بىرنەشە كەزەڭ بويىنشا جۇرگىزىلدى. بارلىق كەزەڭدەردەن ءساتتى وتكەن ماڭعىستاۋلىق پەداگوگتەر ءوز جوبالارىن حالىقارالىق ساراپشىلار الدىندا جوعارى كاسىبي دەڭگەيدە قورعاپ, ناتيجەسىندە ەڭ ۇزدىك بەس جوبانىڭ قاتارىنا ەندى.
جەڭىمپازداردى ماراپاتتاۋ ءراسىمى يتاليانىڭ تۋرين قالاسىندا ءوتتى. سالتاناتتى شارا تۋرين پوليتەحنيكالىق ۋنيۆەرسيتەتىندە ۇيىمداستىرىلعان «ەو – يتاليا ەنەرگەتيكا كۇندەرى: ەنەرگەتيكالىق اۋىسۋدى قامتاماسىز ەتۋ جانە نىعايتۋ بويىنشا جاڭا ءىس-قيمىلدار» اتتى حالىقارالىق كونفەرەنتسيا اياسىندا وتكىزىلدى. بيىلعى ءراسىم «Green Skills» سىيلىعىنىڭ بەس جىلدىق مەرەيتويىنا ارنالدى.