پرەزيدەنت قاسىم-جومارت توقاەۆ ۇكىمەتتىڭ كەڭەيتىلگەن وتىرىسىندا ينۆەستيتسيالىق كەلىسىمدەردىڭ ورىندالۋىنا قاتىستى تالاپتى كۇشەيتۋدى تاپسىردى. مەملەكەت باسشىسى شەتەلگە جاساعان ساپارلار مەن ينۆەستورلارمەن كەزدەسۋلەر بارىسىندا قول جەتكىزىلگەن ۋاعدالاستىقتاردىڭ ناقتى ىسكە اسۋىنا باسا ءمان بەرۋ قاجەت ەكەنىن اتاپ ءوتتى, دەپ حابارلايدى Egemen.kz.
پرەزيدەنتتىڭ ايتۋىنشا, بىلتىردىڭ وزىندە كوممەرتسيالىق كەلىسىمدەردىڭ جالپى قۇنى شامامەن 75 ملرد دوللارعا جەتكەن. سوندىقتان قول قويىلعان قۇجاتتاردىڭ ورىندالۋىن سوزبالاڭعا سالۋعا جول بەرىلمەيدى.
«جۇمىستى سوزبالاڭعا سالۋ جانە قول قويىلعان كەلىسىمدەردى ورىنداماۋ دەگەن ماسەلە بولماۋعا ءتيىس. بۇل جۇمىستى ورىنداۋعا پرەزيدەنت اكىمشىلىگى دە جاۋاپتى», دەدى مەملەكەت باسشىسى.
مەملەكەت باسشىسى: ينفلياتسيانى ويعا قونىمدى دەڭگەيگە ءتۇسىرۋ قاجەت
قاسىم-جومارت توقاەۆ جوعارى دەڭگەيدەگى كەلىسسوزدەردەن كەيىن جۇمىس قارقىنىنىڭ باسەڭدەپ كەتەتىنىن سىنعا الدى. ونىڭ ايتۋىنشا, كەلىسىمدەرگە دەيىن بەلسەندىلىك بايقالىپ, ودان كەيىن ۆەدومستۆولار اراسىنداعى بىتپەيتىن كەلىسۋ ۇدەرىستەرى باستالادى.
«ۇكىمەت مەيلىنشە دەربەس بولۋدى سۇرادى, دەربەستىك بەرىلدى, ەندى ءىس جۇزىندە سونى دۇرىس قولدانۋى كەرەك. مەكەمەلەر اراسىنداعى بىتپەيتىن ءوزارا كەلىسۋ ارەكەتىن دوعارۋ كەرەك», دەدى پرەزيدەنت.
توقاەۆ: دۇنيە جۇزىندەگى ەكونوميكالىق احۋالعا قاراماستان, بىلتىر ەكونوميكامىز 6,5%-عا ءوستى
مەملەكەت باسشىسى ءاربىر كەلىسىم الدىن الا ساپالى دايىندالىپ, ورىندالۋ مەرزىمى ناقتى ايقىندالۋى ءتيىس ەكەنىن قاداپ ايتتى. ناتيجە ءۇشىن ءبىرىنشى باسشىلارعا جەكە جاۋاپكەرشىلىك جۇكتەلەتىنىن دە اتاپ ءوتتى.
پرەزيدەنت ينۆەستورلار الدىنداعى مىندەتتەمەلەردى تولىق ورىنداۋ ەلدىڭ سەنىمى مەن ىسكەرلىك بەدەلىن قالىپتاستىراتىنىن ايتتى. ونىڭ سوزىنشە, ۇكىمەت قازاقستاننىڭ ينۆەستيتسيالىق الەۋەتىن كوتەرىپ, باسەكەلىك ارتىقشىلىقتارىن دامىتۋعا جۇيەلى تۇردە كوڭىل ءبولۋى ءتيىس.
پرەزيدەنت ۇكىمەتكە بيۋدجەت باعدارلامالارىنا رەۆيزيا جۇرگىزۋدى تاپسىردى
سونىمەن قاتار مەملەكەت باسشىسى مەملەكەت پەن جەكە سەرىكتەستىك تەتىگىنىڭ مۇمكىندىكتەرىنە توقتالدى. ونىڭ پىكىرىنشە, بۇل مەحانيزم ەكونوميكاعا ينۆەستيتسيا تارتۋدىڭ ماڭىزدى قۇرالدارىنىڭ ءبىرى سانالادى.
«مەملەكەت پەن جەكە سەرىكتەستىك – ينۆەستيتسيالىق تاۋەكەلدى مەملەكەت پەن بيزنەس اراسىندا ءتيىمدى بولۋگە مۇمكىندىك بەرەتىن تەتىك. بىراق ەلىمىزدە بۇل الەۋەت دۇرىس يگەرىلمەي وتىر», دەدى قاسىم-جومارت توقاەۆ.
پرەزيدەنت ينفراقۇرىلىمدىق جوبالاردىڭ باسىم بولىگى ءالى دە تىكەلەي بيۋدجەت قارجىسىنا تاۋەلدى ەكەنىن, ال جەكە كاپيتال, بانك سەكتورى مەن حالىقارالىق قارجى ۇيىمدارىنىڭ قاتىسۋى جەتكىلىكسىز ەكەنىن اتاپ ءوتتى. بيۋدجەت مۇمكىندىگىنىڭ شەكتەۋلىلىگى كوپتەگەن ينۆەستيتسيالىق جوبانى ىسكە اسىرۋعا كەدەرگى كەلتىرىپ وتىر.
مەملەكەت باسشىسىنىڭ ايتۋىنشا, مەملەكەت پەن جەكە سەرىكتەستىكتىڭ دە ءوز قۇنى بار. الايدا ول ءوزىن-ءوزى اقتاسا, ۇكىمەت بۇل مەحانيزمدى بەلسەندى قولدانۋى كەرەك. قاجەت بولعان جاعدايدا زاڭناماعا دا ءتيىستى وزگەرىستەر ەنگىزۋگە بولادى.
پرەزيدەنت ۇكىمەتكە ينۆەستيتسيالىق جوبالاردى ىسكە اسىرۋدا ناقتى ناتيجەگە باعىتتالعان, جاۋاپكەرشىلىگى ايقىن جۇيە قالىپتاستىرۋدى تاپسىردى.