تەلەفون ارقىلى جاسالاتىن الاياقتىق كۇن ساناپ تۇرلەنىپ, پسيحولوگيالىق ايلا-تاسىلدەرگە كوبىرەك سۇيەنە باستادى. مامانداردىڭ ايتۋىنشا, كۇماندى قوڭىراۋلارعا جاۋاپ بەرۋ, ءتىپتى قالجىڭداپ سويلەسۋ دە ادامدى تاۋەكەلگە يتەرمەلەيدى. FinGramota ساراپشىلارى مۇنداي ارەكەتتىڭ نەلىكتەن قاۋىپتى ەكەنىن ءتۇسىندىردى, دەپ حابارلايدى Egemen.kz.
ساراپشىلاردىڭ پايىمىنشا, قازىرگى الاياقتار كوبىنە بانك جۇيەسىن ەمەس, ادامنىڭ ءوزىن «بۇزۋعا» تىرىسادى. العاشقى قوڭىراۋ – بارلاۋ كەزەڭى. وسى ساتتە قىلمىسكەر قارسى جاقتىڭ مىنەز-قۇلقىن, قىسىمعا قالاي جاۋاپ بەرەتىنىن جانە شەشىمدى قانشالىقتى تەز قابىلدايتىنىن اڭعارادى.
ء«بىر-ەكى اۋىز ءسوزدىڭ ءوزى قىلمىسكەرگە ادامنىڭ «بانك», «پوليتسيا», «قارىز», «نەسيە» دەگەن سوزدەرگە قالاي قارايتىنىن, ديالوگتى جالعاستىرۋعا دايىن ەكەنىن, ەموتسياعا قانشالىقتى تەز بەرىلەتىنىن اڭعارۋعا جەتكىلىكتى. ولار ءۇشىن جاۋاپتىڭ مازمۇنى ەمەس, ادامنىڭ تۇتقانى قويا سالماۋى ماڭىزدى. بۇل – بايلانىس ورنادى دەگەن بەلگى. دەمەك, بۇل نومىرگە قايتا ورالۋعا بولادى», دەلىنگەن ساراپشىلاردىڭ تۇسىندىرمەسىندە.
كەي جاعدايدا الاياقتارعا تەلەفون ءنومىرىنىڭ بەلسەندى ەكەنىن, يەسىنىڭ ينتەرنەت-بانكينگ قولداناتىنىن جانە جانىندا بوگدە ادامدار جوق ەكەنىن انىقتاۋ جەتكىلىكتى. كەلەسى قوڭىراۋدا ولار ءوزىن بانك قىزمەتكەرى, قاۋىپسىزدىك مامانى نەمەسە تانىس ادام رەتىندە تانىستىرىپ, اڭگىمەنى الدەقايدا سەنىمدى جۇرگىزەدى. ويتكەنى الدىڭعى بايلانىس كەزىندە ادامنىڭ ءالسىز تۇستارى بەلگىلى بولىپ قالادى.
الاياقتىقتىڭ جولىن كەسەتىن باعدارلاما
ماماندار الاياقتاردىڭ شاعىن سومالار ارقىلى دا ادامدى تەكسەرەتىنىن ايتادى.
«300 تەڭگە «جەتكىزۋ ءۇشىن», 1000 تەڭگە «تەكسەرۋ ماقساتىندا» دەگەندەي ۇساق تولەمدەر – كوبىنە سىناۋ ءۇشىن جاسالادى. مۇندا ماڭىزدىسى ادامنىڭ قانشا جوعالتقانى ەمەس, ول بۇل وپەراتسيانى بايقادى ما, بانككە حابارلاستى ما, الدە «بولماشى نارسە» دەپ ءمان بەرمەدى مە؟ ەگەر ادام ءۇنسىز قالسا, بۇل – جالعاستىرۋعا بولادى دەگەن بەلگى. ادەتتە مۇنداي «ۇساق-تۇيەكتەن» كەيىن قايتالاناتىن تولەمدەر, جاسىرىن جازىلىمدار, «قايتارىم» دەگەن جەلەۋمەن جاڭا اۋدارىمدار, ءتىپتى نەسيە راسىمدەۋگە تالپىنىس جاسالادى», دەيدى ساراپشىلار.
مەملەكەت باسشىسى الاياقتىققا قارسى كۇرەستىڭ جاڭا تاسىلدەرىن ويلاستىرۋدى تاپسىردى
تاعى ءبىر قاۋىپ – الاياقتاردىڭ ابونەنتتىڭ داۋىسىن وزگە سحەمالاردا قولدانۋ مۇمكىندىگى. ماسەلەن, تۋىستارىنا قوڭىراۋ شالىپ, سول ادامنىڭ اتىنان سويلەپ, سەنىمگە كىرۋى ىقتيمال. نە ىستەۋ كەرەك؟ساراپشىلار كۇماندى قوڭىراۋلارعا جاۋاپ بەرمەۋگە جانە ازىلدەسپەۋگە كەڭەس بەرەدى. كەز كەلگەن كۇدىك تۋعان جاعدايدا:
- اڭگىمەنى بىردەن توقتاتۋ;- بانككە تەك رەسمي ءنومىر ارقىلى ءوزىڭىز قوڭىراۋ شالۋ;- ەڭ از كۇماننىڭ وزىندە كارتانى بۇعاتتاۋ;- بارلىق وپەراتسيالار مەن حابارلامالاردى مۇقيات تەكسەرۋ;- مۇنداي جاعدايلاردى جاقىندارمەن تالقىلاۋ قاجەت.
مامانداردىڭ ايتۋىنشا, تەلەفوندى دەر كەزىندە قويا سالۋ – كەيدە ەڭ ءتيىمدى قورعانىس.
ستالكينگ پەن الاياقتىق قاتاڭ جازالانادى