باقىت نۇرمۇحانوۆ: جاڭا كونستيتۋتسيانىڭ جوباسىنا تەڭگەنى ۇلتتىق ۆاليۋتا رەتىندە بەكىتەتىن نورما ەنگىزىلدى

ونىڭ ايتۋىنشا, جاڭا كونستيتۋتسيا جوباسى جاريالانعان ساتتەن باستاپ ءارتۇرلى ارنالار ارقىلى 4 مىڭنان استام ۇسىنىس كەلىپ تۇسكەن. باقىت نۇرمۇحانوۆ اتاپ وتكەندەي, كونستيتۋتسيالىق كوميسسيا بارلىق ۇسىنىستار, پىكىرلەر مەن ەسكەرتۋلەردى مۇقيات زەردەلەپ جاتىر.

«تالداۋ كورسەتكەندەي, ولاردىڭ بىرقاتارى نازار اۋدارۋعا تۇرارلىق جانە باپتاردىڭ مازمۇنىن تولىقتىرادى, كەپىلدىكتەردى كۇشەيتەدى, قۇقىقتىق نورمالاردىڭ تۇجىرىمداماسىن جاقسارتادى, سونداي-اق ايقىندىق پەن قۇقىقتىق ناقتىلىقتى ارتتىرادى», دەدى باقىت نۇرمۇحانوۆ كونستيتۋتسيالىق كوميسسيانىڭ كەزەكتى وتىرىسىندا.

دالىرەك ايتقاندا, تەڭگەنى ۇلتتىق ۆاليۋتا رەتىندە كونستيتۋتسيالىق تۇرعىدا بەكىتۋ ۇسىنىسىن جۇزەگە اسىرۋ ءۇشىن 2-باپ جاڭا تارماقپەن تولىقتىرىلدى. قازاقستان رەسپۋبليكاسىنىڭ ۇلتتىق ۆاليۋتاسى (اقشا بىرلىگى) – تەڭگە.

تەڭگەنى ەميسسيالاۋدىڭ ايرىقشا قۇقىعى قازاقستان رەسپۋبليكاسىنا تيەسىلى. سپيكەردىڭ ايتۋىنشا, ازاماتتاردىڭ وتىنىشتەرىندە دە وسىنداي ۇسىنىستار بولعان.

بۇل باپتىڭ 6-تارماعى 7-تارماق بولىپ وزگەرتىلىپ, جوبا رەداكتسياسىندا مىناداي مازمۇندا ساقتالادى: «قازاقستان رەسپۋبليكاسىنىڭ ەگەمەندىگى, تاۋەلسىزدىگى, ۋنيتارلىعى, اۋماقتىق تۇتاستىعى مەن باسقارۋ ۇلگىسى وزگەرمەيدى».

«6-باپتا مەملەكەتتىك ورگاندا ساياسي پارتيا ۇيىمىن قۇرۋعا جول بەرىلمەيتىنى تۋرالى نورمانى 1-تارماقتان 2-تارماققا وزگەرىسسىز اۋىستىرۋ ۇسىنىلىپ وتىر. بۇل نورما اتالعان باپتىڭ 2-تارماعىنىڭ ەرەجەلەرىن لوگيكالىق تۇرعىدان تولىقتىرادى, وندا مەملەكەتتىڭ قوعامدىق بىرلەستىك ىسىنە, ال قوعامدىق بىرلەستىكتىڭ مەملەكەت ىسىنە زاڭسىز ارالاسۋىنا جانە قوعامدىق بىرلەستىككە مەملەكەتتىك ورگان فۋنكتسيالارىن جۇكتەۋگە جول بەرىلمەيتىنى جازىلعان», دەپ حابارلادى باقىت نۇرمۇحانوۆ.

كونستيتۋتسيا جوباسىنىڭ ازاماتتىق ماسەلەلەرىنە ارنالعان 12-بابى دا ناقتىلاۋدى قاجەت ەتەدى دەگەن ۇسىنىستار ايتىلدى. اتاپ ايتقاندا, 3-تارماققا قازاقستان رەسپۋبليكاسىنىڭ ازاماتى قوس ازاماتتىققا نەمەسە كوپ ازاماتتىققا يە بولا المايتىنى, ال وزگە ازاماتتىقتىڭ بولۋى زاڭدا كورسەتىلگەن ءتارتىپ پەن شارتتارعا سايكەس, قازاقستان رەسپۋبليكاسىنىڭ ازاماتتىعىن توقتاتۋعا نەگىز بولاتىنى تۋرالى نورما ەنگىزىلەدى.

ەنگىزىلگەن ۇسىنىستار ىشىندە كونستيتۋتسيادا ءاربىر ادامنىڭ مەملەكەتتىك بيلىك ورگاندارى مەن ولاردىڭ قىزمەتشىلەرىنىڭ زاڭسىز ارەكەتتەرى سالدارىنان كەلگەن زالالدىڭ وتەمىن الۋعا قۇقىعىن بەكىتۋ دە ەرەكشە قىزىعۋشىلىق تۋدىرعان.

«قىلمىستىق-پروتسەستىك كودەكستە قىلمىستىق پروتسەستى جۇرگىزەتىن ورگاننىڭ زاڭسىز ارەكەتتەرىنەن كەلتىرىلگەن زالالدى وتەۋ ءتارتىبىن رەتتەيتىن 4-تاراۋ قاراستىرىلعان. ونداعى ەرەجەلەرگە سايكەس, زاڭسىز ۇستاۋ, قاماۋدا ۇستاۋ, ۇيقاماققا الۋ, قىزمەتىنەن ۋاقىتشا شەتتەتۋ, ارناۋلى مەديتسينالىق ۇيىمعا ورنالاستىرۋ, سوتتاۋ, مەديتسينالىق سيپاتتاعى ماجبۇرلەۋ شارالارىن قولدانۋ سالدارىنان كەلتىرىلگەن زالال قىلمىستىق پروتسەستى جۇرگىزەتىن ورگاننىڭ كىناسىنە قاراماستان تولىق كولەمدە بيۋدجەت قاراجاتى ەسەبىنەن وتەلەدى», دەپ اتاپ ءوتتى سپيكەر.

جاڭا كونستيتۋتسيادا تەڭگەنى ۇلتتىق ۆاليۋتا رەتىندە بەكىتۋ ۇسىنىلدى

سونىمەن بىرگە ول كونستيتۋتسيا جوباسىنىڭ 18-بابى ناقتىلانعانىن ايتتى. جاڭا رەداكتسياعا سايكەس, سوت شەشىمىنسىز ادامدى زاڭدا كوزدەلگەن مەرزىمدەردەن ارتىق ۇستاۋعا بولمايدى. ءسوز سوڭىندا باقىت نۇرمۇحانوۆ جاڭا كونستيتۋتسيا جوباسىن جەتىلدىرۋ جۇمىستارى جالعاسىپ جاتقانىن جەتكىزدى.

ايتا كەتەيىك, بۇگىن كونستيتۋتسيالىق كوميسسيانىڭ كەزەكتى توعىزىنشى وتىرىسى ءوتىپ جاتىر.