وبلىستىق حالىق شىعارماشىلىعى ورتالىعىندا اقتوبەلىك جاس جىرشىلار «قىرىمنىڭ قىرىق باتىرى: ەرلىك پەن ەلدىك داستانى» اتتى كەشتە ونەر كورسەتتى.
التىن وردا, نوعايلى داۋىرىنەن جەتكەن تاريحي داستاندى ەرەكشە دايىندىقپەن جىرلاعان بالالاردىڭ ونەرىنە زال تولى كورەرمەن ريزا بولدى. ارنايى بەزەندىرىلگەن ساحنا تورىندە سول زاماننىڭ ۇلگىسىنە ساي كيىم كيىپ, ۇكىلى دومبىرالارىمەن ونەر كورسەتكەن 40 ۇل مەن قىز بەس جىل بۇرىن اشىلعان «ەر ەدىگە» جىر مەكتەبىنىڭ تاربيەلەنۋشىلەرى. وڭىردەگى مادەنيەت جانە ونەر سالاسىنىڭ ارداگەرلەرى, ۋنيۆەرسيتەت وقىتۋشىلارى مەن ولكەتانۋشىلار, ءداستۇرلى انشىلەر مەن تەرمەشىلەر بەس جىلدا ۇلكەن بەلەستى باعىندىرعان بالالار مەن ولاردىڭ ۇستازى, مادەنيەت سالاسىنىڭ ۇزدىگى, جىراۋ ادىلبەك ءساريننىڭ ولشەۋسىز ەڭبەگىن اتاپ ءوتتى.
2021 جىلى اقتوبە وبلىستىق حالىق شىعارماشىلىعى ورتالىعى جانىنان اشىلعان «ەر ەدىگە» مەكتەبىنىڭ تابالدىرىعىن يمەنە اتتاعان جاس جەتكىنشەكتەر جىر-تولعاۋلار مەن تەرمە-داستانداردى جاتتاپ, كونە سوزدەردىڭ قۇپياسىن مەڭگەرىپ, تىنباي ىزدەندى. ادىلبەك سارين ءجيى-ءجيى «جىراۋ شايى», «جىر ساعاتى» ساباقتارىن كوپشىلىك اراسىندا وتكىزىپ, بالالاردى ساحناعا ۇيرەتتى. بەس جىل وقىپ-ۇيرەنۋگە, تاجىريبە جيناۋعا از ۋاقىت ەمەس. وسى كەزەڭدە ونەرلى ۇلاندار وبلىستىق, رەسپۋبليكالىق, حالىقارالىق دەڭگەيدە وتكىزىلگەن جىر بايقاۋلارىندا توپ جاردى. ءوز باستامالارىمەن وبلىستىق مادەنيەت باسقارماسىنىڭ قولداۋىمەن «ەدىگە دەگەن ەر ەكەن...», «قوبىلاندى دەگەن ەرى بار...», «تولعاۋدا تولعاۋ سوزدەر بار» سايىستارىن وتكىزدى.
ەڭ باستىسى – وسى ورتادان ءۇزىلىپ قالعان اقتوبە ءوڭىرىنىڭ جىراۋلار مەكتەبى ءداستۇرىن جالعاستىرۋدى نيەت ەتكەن جاستار شىعىپ جاتىر. وزىندىك ورىنداۋشىلىق ءداستۇرى قالىپتاسقان اقتوبەلىك جىراۋلار مەكتەبى ورىنداۋشىلارىنىڭ جىر-ماقامىن ساقتاپ كەلگەن قۇيماقۇلاق قارتتار كەلمەستىڭ كەمەسىنە كەتكەن سوڭ يگى ءداستۇر ءۇزىلىپ قالعانداي ەدى.
ء«بىز ءحىV–حVىى عاسىرلارداعى التىن وردا مەن نوعاي ورداسىنداعى تاريحي وقيعالاردى سۋرەتتەپ, 41 باتىردىڭ ەرلىگىن ناسيحاتتايتىن 36 جىردان تۇراتىن مۇرىن سەڭگىربەك ۇلىنىڭ «قىرىمنىڭ قىرىق باتىرىن» ساحناعا شىعاردىق. 41 باتىرعا قاتىستى جىر ۇزىندىلەرىن 40 شاكىرتىم جەكە-دارا ورىنداپ شىقتى. داستاندى وقيعا جەلىلەرى مەن تاريحي حرونولوگيالىق جۇيەلىلىكپەن ءۇش توپقا ءبولىپ جىرلادىق. بۇل اكادەميك قانىش ساتباەۆتىڭ باسشىلىعىمەن اقىن ءماريام حاكىمجانوۆا 1942 جىلى مۇرىن جىراۋدان جازىپ العان 36 داستانداعى اڭشىباي باتىر مەن ونىڭ ۇرپاقتارى, قارادوڭ باتىر مەن ۇرپاقتارى, قوبىلاندى, قازتۋعان, ەر قوساي, ەر كوكشە, ەر كەڭەس, تەلاعىس سىندى باتىرلار. جۇرت باعاسىن بەرىپ جاتىر. بىراق ءالى دە كوپ ىزدەنىس كەرەك, ورىنداۋشىلىق شەبەرلىكتى شىڭداۋىمىز كەرەك», دەيدى ۇستاز-جىراۋ ادىلبەك سارين.
اقتوبە وبلىسى