Instagram جەلىسىندە سوڭعى كۇندەرى جاپپاي «تازارتۋ» ءجۇرىپ جاتقانى بايقالدى. الەم بويىنشا كوپتەگەن قولدانۋشىلار ءبىر ءتۇننىڭ ىشىندە جازىلۋشىلار سانى كۇرت ازايىپ كەتكەنىن ايتىپ شاعىمدانۋدا. بۇل جاعداي قاراپايىم ادامداردىڭ اككاۋنتتارىنا عانا ەمەس, تانىمال جۇلدىزدارعا دا اسەر ەتكەن. مىسالى, كريشتيانۋ رونالدۋ شامامەن 8 ميلليون, ال كايلي دجەننەر 14 ميلليونعا جۋىق وقىرمانىنان ايىرىلعان, دەپ حابارلايدى Egemen.kz.
العاش بولىپ بۇل تۋرالى Threads قولدانۋشىلارى جازا باستادى. كەي ادامداردىڭ ايتۋىنشا, ولار بىرنەشە مىڭنان اسا وقىرمانىن جوعالتقان. ەڭ قىزىعى – بۇل ستاتيستيكادا كورىنبەيدى, تەك پاراقشانى جاڭارتقان كەزدە اۋديتوريا سانى ازايىپ كەتەدى.
كوپشىلىك مۇنى Instagram-نىڭ بوتتار مەن جالعان اككاۋنتتاردى جاپپاي وشىرۋىمەن بايلانىستىرۋدا. پايدالانۋشىلاردىڭ پىكىرىنشە, مۇنداي ء«ولى» اككاۋنتتار ستاتيستيكانى بۇزىپ, قارالىم مەن بەلسەندىلىككە كەرى اسەر ەتەدى. سوندىقتان كەيبىرەۋلەر بۇل تازارتۋدى پايدالى وزگەرىس دەپ قابىلداعان.
Meta كومپانياسى بۇل جاعدايعا رەسمي تۇسىنىكتەمە بەرمەگەنىمەن, شەتەلدىك باق مۇنداي وزگەرىسكە 2026 جىلى ەنگىزىلگەن جاڭا جاساندى ينتەللەكت جۇيەلەرىنىڭ قاتىسى بولۋى مۇمكىن ەكەنىن جازدى. اتالعان تەحنولوگيا كۇماندى پروفيلدەردى, جالعان بەلسەندىلىكتى, الاياقتىق سحەمالاردى جانە اتاقتى ادامداردىڭ اتىن جامىلعان اككاۋنتتاردى انىقتاۋعا كومەكتەسەدى.
كومپانيا مالىمەتىنشە, 2025 جىلدىڭ وزىندە Facebook پەن Instagram-نان 159 ميلليوننان استام كۇماندى اككاۋنت وشىرىلگەن. ولاردىڭ كوبى قولدانۋشىلار شاعىمدانباي تۇرىپ-اق بۇعاتتالعان.
ايتا كەتەيىك, الەۋمەتتىك جەلىلەردە, اسىرەسە Threads پلاتفورماسىندا, «جار ىزدەيمىن», «كۇيەۋ ىزدەيمىن», «بايىپتى قارىم-قاتىناس ىزدەپ ءجۇرمىن» دەگەن تانىسۋعا شاقىراتىن جازبالار جيىلەپ كەتكەندىكتەن پوليتسيا جەلىدەگى تانىستىقتان ساق بولۋعا شاقىرعان ەدى.