مادريدتىك «رەالدىڭ» شابۋىلشىسى ۆينيسيۋس جۋنيور 10 مامىر كۇنى «كامپ نوۋدا» وتەتىن يسپانيا چەمپيوناتىنداعى «بارسەلوناعا» قارسى ماتچتا العاش رەت كوماندانىڭ كاپيتانى رەتىندە الاڭعا شىعادى. بۇل شەشىم نەگىزگى جانە ۆيتسە-كاپيتانداردىڭ جوق بولۋىنا بايلانىستى قابىلدانعان, دەپ حابارلايدى Egemen.kz.
كوماندانىڭ رەسمي كاپيتانى داني كارۆاحال جاراقاتىنان ءالى تولىق ايىقپاعان. ال ۆيتسە-كاپيتان فەدەريكو ۆالۆەردە جاتتىعۋ كەزىندە ورەلەن تچۋامەنيمەن بولعان جانجالدان كەيىن العان جاراقاتىنا بايلانىستى الداعى ويىنعا قاتىسپايدى.
فۋتبولدان ەل كۋبوگىنىڭ شيرەك فينالىنا قاي كلۋبتار شىقتى؟
وسىلايشا, كاپيتاندىق يەرارحيا بويىنشا كەلەسى ويىنشى رەتىندە ۆينيسيۋس جۋنيور «بارسەلوناعا» قارسى وتەتىن ماڭىزدى ەل-كلاسيكو ماتچىندا كوماندانى الاڭعا باستاپ شىعادى.
كلۋب ىشىندە اتالعان وقيعاعا بايلانىستى ىشكى تەكسەرىس جۇرگىزىلىپ جاتقانى دا ايتىلۋدا.
ۆينيسيۋس جۋنيور ءۇشىن كوماندانى كاپيتان رەتىندە الاڭعا باستاپ شىعۋ – اسا تاڭسىق جاعداي ەمەس. برازيليالىق شابۋىلشى العاش رەت بۇل مىندەتتى 2025 جىلدىڭ اقپانىندا اتقارعان, ول كەزدە كوماندا يسپانيا كۋبوگىنىڭ جارتىلاي فينالىندا «رەال سوسەدادتى» جەڭگەن بولاتىن.
سونىمەن قاتار, ول چەمپيوندار ليگاسىنىڭ ماتچتارىندا دا كاپيتان بولدى. اتاپ ايتقاندا, 2025 جىلدىڭ قىركۇيەگىندە الماتىداعى «ورتالىق» ستاديونىندا وتكەن «قايراتقا» قارسى ويىندا ءدال وسى مارتەبەمەن الاڭعا شىققان.
ايتا كەتەيىك, يسپانيا چەمپيوناتىندا «بارسەلونا» – «رەال» كەزدەسۋى تۋرنيرلىك تۇرعىدان ۇلكەن ماڭىزعا يە: كاتالوندىقتار جەڭسە, چەمپيوندىقتى مەرزىمىنەن بۇرىن راسىمدەي الادى, ال مادريدتىكتەر جەڭىسكە جەتسە, چەمپيوندىق ءۇشىن كۇرەستى جالعاستىرادى.
«بارسەلونا» مەن «رەال» 10 مامىر كۇنى «كامپ نوۋدا» كەزدەسەدى. مادريدتىك كلۋب ءۇشىن بۇل ماتچتاعى جەڭىس — لا ليگاداعى چەمپيوندىققا تالاستى جالعاستىرۋدىڭ باستى شارتى.
نۇربولات امانبەك