اقمولا وبلىسىنداعى رودينا اۋىلىندا قازاقستان قارۋلى كۇشتەرى ۇلتتىق اسكەري-پاتريوتتىق ورتالىعى اسكەري-تاريحي مۋزەيىنىڭ جاڭا فيليالى اشىلدى. سالتاناتتى شارا ۇلى وتان سوعىسى باتىرلارىنا ارنالعان ەسكەرتكىشكە گۇل قويۋ راسىمىمەن باستالدى. ەسكەرتكىشتە سوعىس جىلدارى جەڭىسكە ۇلەس قوسقان 130-دان استام اقمولالىقتىڭ ەسىمى جازىلعان, دەپ حابارلايدى Egemen.kz.
ءىس-شاراعا قورعانىس ءمينيسترى داۋرەن قوسانوۆ, وبلىس اكىمى مارات احمەتجانوۆ, حالىق قاھارمانى باقىتجان ەرتاەۆ, ارداگەرلەر مەن اۋىل تۇرعىندارى قاتىستى.
جاڭا مۋزەي جاستارعا پاتريوتتىق تاربيە بەرىپ, تاريحي جادىنى ساقتاۋعا باعىتتالعان. مۇندا سوعىس كەزەڭىندەگى قارۋ-جاراقتار, اسكەري تەحنيكا, ارحيۆ قۇجاتتارى, جاۋىنگەرلىك تۋلار جانە اقمولا ءوڭىرىنىڭ تاريحىنا قاتىستى ءتۇرلى جادىگەرلەر قويىلعان. جالپى مۋزەيدە 100-دەن استام ەكسپونات بار, ونىڭ ىشىندە 1939-1944 جىلدارى شىعارىلعان 16 اسكەري تەحنيكا ۇسىنىلعان.
مۋزەي «رودينا» اگروفيرماسىنىڭ باسشىسى يۆان ساۋەردىڭ باستاماسىمەن جانە قورعانىس مينيسترلىگىنىڭ قولداۋىمەن اشىلدى. جوبانى جۇزەگە اسىرۋعا اسكەري مۋزەي قىزمەتكەرلەرى, ىزدەستىرۋ جاساقتارى مەن جەرگىلىكتى تۇرعىندار اتسالىسقان.
سالتاناتتى جيىندا سويلەگەن داۋرەن قوسانوۆ مۇنداي مۋزەيلەر جاستاردىڭ وتان تاريحىن تەرەڭ تۇسىنۋىنە جانە اعا بۋىن ەرلىگىن قۇرمەتتەۋىنە ىقپال ەتەتىنىن ايتتى. ال ۇلتتىق اسكەري-پاتريوتتىق ورتالىقتىڭ باستىعى ارمان اسەنوۆ وسىنداي مۋزەيلەردى بولاشاقتا ەلىمىزدىڭ باسقا اۋىلدارىندا دا اشۋ جوسپارلانىپ وتىرعانىن جەتكىزدى.
شارا شىعارماشىلىق كونتسەرتتىك باعدارلامامەن اياقتالدى.