استانا. 26 ناۋرىز. شەشەنستان پارلامەنتى مەكسيكاعا اقش باسىپ العان تەرريتورياسىن قورعاۋى ءۇشىن قارۋ-جاراق جەتكىزىپ بەرۋ قۇقىعىن وزىندە قالدىراتىنىن مالىمدەدى. بۇل تۋرالى LifeNews سايتى حابارلادى.
شەشەنستان پارلامەنتى اقش-تى ءوزىنىڭ وكتەمدىگى مەن ءبارىن جاساي بەرۋگە قۇقىلىعىن تانىتاتىن يمپەرياليستىك كوزقاراستان باس تارتىپ, رەسەيمەن تەڭ قۇقىقتى دارەجەدە ديالوگ جۇرگىزۋگە شاقىردى. پارلامەنت سپيكەرى دۋكۋۆاحا ابدۋراحمانوۆ اقش كونگرەسىنىڭ باراك وبامانى ۋكرايناعا قارۋ-جاراق بەرۋگە شاقىرۋ جونىندەگى قارارىن ءسوز ەتە وتىرىپ, مۇنى شەشەنستانعا تاپ وسىنداي تىرلىكتەر جاساۋعا – ەڭ جاڭا قارۋلاردى مەكسيكاعا جەتكىزىپ بەرۋگە قۇقىق بەرەتىنىن مالىمدەدى.
«اقش-تىڭ رەسەيگە وزىمەن دوستاس حالىقپەن قانداي قارىم-قاتىناس جاساۋعا كەڭەس بەرەتىندەي ەشقانداي قۇقىعى جوق. ۋكرايناعا قارۋ-جاراق بەرۋ بىزگە ءدال سونداي ارەكەتتى جاساۋعا بەلگى بەرەدى, ءبىز اقش جاۋلاپ العان تالاستى تەرريتورياسىن قايتارىپ الۋ جولىندا كۇرەسۋى ءۇشىن مەكسيكاعا قارۋ-جاراق جەتكىزىپ بەرەتىن بولامىز. ال بۇل تەرريتوريالارعا كاليفورنيا, نيۋ-مەكسيكا, اريزونا, نەۆادا, يۋتا, كولورادا شتاتتارى مەن ۆايومينگتىڭ ءبىر بولىگى جاتادى, - دەلىنگەن شەشەنستان پارلامەنتىنىڭ سايتىندا جاريالانعان حابارلامادا. – ءبىز رەسەيدە, مەكسيكادا, امەريكادا جوعارىدا اتالعان شتاتتاردى اقش-تان ءبولىپ الۋ جانە ولاردا پارتيزان سوعىستارىن جۇرگىزۋ جونىندە ماسەلە كوتەرەتىن كونفەرەنتسيالار وتكىزۋ قۇقىعىن ءوز موينىمىزدا قالدىرامىز».
مۇرات ايتقوجا.
مانبە, سۋرەت: LifeNews.