قاتار استاناسى دوحا قالاسىندا قازاقستاننىڭ مادەنيەت كۇندەرى سالتاناتتى تۇردە اشىلدى. اۋقىمدى مادەني ءىس-شارانىڭ ءوتۋى پرەزيدەنت قاسىم-جومارت توقاەۆتىڭ قاتار مەملەكەتىنە جاساعان مەملەكەتتىك ساپارى بارىسىندا ەكى ەل باسشىلارى قول جەتكىزگەن ۋاعدالاستىقتاردىڭ ناتيجەسىندە جۇزەگە اسىرىلدى.
قازاقستان دەلەگاتسياسىن پرەمەر-ءمينيستردىڭ ورىنباسارى – مادەنيەت جانە اقپارات ءمينيسترى ايدا بالاەۆا باستاپ باردى. مادەنيەت كۇندەرى اياسىندا ۆيتسە-پرەمەر قاتار مەملەكەتىنىڭ مادەنيەت ءمينيسترى شەيح ءابدىراحمان بەن حاماد بەن دجاسيم ءال تانيمەن ەكىجاقتى كەزدەسۋ وتكىزدى.
كەلىسسوزدەر بارىسىندا تاراپتار مادەنيەت پەن ونەر سالاسىنداعى ەكىجاقتى ىنتىماقتاستىقتى كەڭەيتۋ كەلەشەگىن تالقىلاپ, بىرلەسكەن جوبالاردى جۇزەگە اسىرۋعا قىزىعۋشىلىق ءبىلدىردى.
«قازاقستان رەسپۋبليكاسىنىڭ مادەنيەت كۇندەرىنىڭ قاتار مەملەكەتىندە ءوتۋى ءبىز ءۇشىن زور مارتەبە. قازاقستان مەن قاتار حالىقتارىن جاقىنداستىراتىن ورتاق تاريحي جانە رۋحاني قۇندىلىقتار بار. ەكى ەل دە باي كوشپەلى وركەنيەت مۇراسىن ساقتاپ, ءداستۇرلى مادەنيەتتى قادىرلەۋگە ايرىقشا ءمان بەرەدى. وسى ورتاق قۇندىلىقتار الداعى ۋاقىتتا دا حالىقتارىمىزدى ودان ءارى جاقىنداستىرىپ, جاڭا بىرلەسكەن مادەني جوبالاردى ىسكە اسىرۋعا بەرىك نەگىز بولادى دەپ سەنەمىن», دەدى ايدا بالاەۆا.
ءوز كەزەگىندە قاتار مەملەكەتىنىڭ مادەنيەت ءمينيسترى شەيح ءابدىراحمان بەن حاماد بەن دجاسيم ءال ءتاني ەكى ەل قارىم-قاتىناستارىنىڭ دامۋ الەۋەتى جوعارى ەكەنىن اتاپ ءوتىپ, بىرلەسكەن مادەني جوبالار ىنتىماقتاستىقتى ودان ءارى كەڭەيتۋدىڭ بەرىك نەگىزىنە اينالاتىنىنا سەنىم ءبىلدىردى.
كەزدەسۋ بارىسىندا كرەاتيۆتى سەكتورداعى ءوزارا ىقپالداستىققا ەرەكشە نازار اۋدارىلدى. ايدا بالاەۆا قاتار مەملەكەتىندە كرەاتيۆتى يندۋستريالاردىڭ قارقىندى دامىپ كەلە جاتقانىن, ەلىمىزدە دە بۇل باعىتتىڭ باسىمدىققا يە ەكەنىن اتاپ ءوتتى. رەسپۋبليكادا كرەاتيۆتى يندۋستريالاردى دامىتۋ قورى قۇرىلعان. وسىعان بايلانىستى ءبىزدىڭ تاراپ بىرلەسكەن جوبالاردى جۇزەگە اسىرۋعا جانە اتالعان سالادا پراكتيكالىق ىنتىماقتاستىقتى كەڭەيتۋگە دايىن ەكەنىن جەتكىزدى.
سونىمەن قاتار ءوزارا ىقپالداستىقتىڭ وزگە دە كەلەشەگى زور باعىتتارى ايقىندالدى. اتاپ ايتقاندا, بىرلەسكەن كىتاپتار شىعارۋ, ەكى ەل اۆتورلارىنىڭ شىعارمالارىن قازاق جانە اراب تىلدەرىنە اۋدارۋ, سونداي-اق سۋرەتشىلەردى قولداۋ تەتىكتەرى بويىنشا تاجىريبە الماسۋ ماسەلەلەرى تالقىلاندى.
پراكتيكالىق قادام رەتىندە اتالعان باعىتتاردىڭ بارلىعىن قامتيتىن ۆەدومستۆوارالىق ءىس-شارالار جوسپارىنا قول قويۋ ۇسىنىلدى.
كەزدەسۋ سوڭىندا دەلەگاتسيا باسشىلارى ەلىمىزدىڭ ونەر شەبەرلەرىنىڭ مەرەكەلىك گالا-كونتسەرتىن تاماشالادى. كونتسەرت باعدارلاماسىندا قازاق حالقىنىڭ كلاسسيكالىق مۇرالارىنان باستاپ, حالىق كۇيلەرى مەن اندەرى, سيمفونيالىق وڭدەۋدەگى زاماناۋي تۋىندىلار, سونداي-اق اراب اندەرى ورىندالدى.
سونداي-اق دەلەگاتسيا باسشىلارى مادەنيەت كۇندەرىنىڭ نەگىزگى ءىس-شارالارى ءوتىپ جاتقان دوحا قالاسىنداعى «دارب ءال-ساعي» مادەني-تاريحي ورتالىعىنا باردى. مۇندا تاقىرىپتىق كونتسەرتتەر, ساندىك-قولدانبالى ونەر كورمەلەرى, ۇلتتىق ناقىشتى زاماناۋي ۇلگىدە تانىتاتىن ديزاينەرلەردىڭ تۋىندىلارى ۇسىنىلعان.
باعدارلامادا ەلىمىزدىڭ ۇلتتىق مۋزەيى دايىنداعان ەكسپوزيتسياعا ەرەكشە ورىن بەرىلدى. سونىمەن قاتار ۇلتتىق داستۇرلەر مەن سپورت تۇرلەرىن كەڭىنەن ناسيحاتتاۋعا ايرىقشا ءمان بەرىلىپ, ونىڭ ىشىندە ءداستۇرلى ساداق اتۋ ونەرى, ساياتشىلىق, سونداي-اق تازى يتپەن اڭ اۋلاۋ تۇرلەرى تانىستىرىلدى.
ايتا كەتەيىك, ەلىمىزدىڭ مادەنيەت كۇندەرىنىڭ ءتورت كۇندىك باعدارلاماسى قازاقستان – قاتار مادەني- گۋمانيتارلىق ىنتىماقتاستىعىن ودان ءارى نىعايتۋعا جانە ەلدىڭ ۇلتتىق مادەنيەتىن حالىقارالىق دەڭگەيدە كەڭىنەن تانىتۋعا باعىتتالعان. سونداي-اق الداعى ۋاقىتتا ءبىزدىڭ ەلدە قاتار مەملەكەتىنىڭ مادەنيەت كۇندەرى وتەدى.