استانادا مەملەكەت باسشىسىنىڭ باستاماسىمەن تاعايىندالعان پرەزيدەنتتىك ارناۋلى ادەبي سىيلىق پەن «ايبوز – 2025» ۇلتتىق ادەبي بايقاۋى لاۋرەاتتارىن ماراپاتتاۋ ءراسىمى ءوتتى. جۇلدەگەرلەر اراسىندا گازەتىمىزدىڭ بۇگىنگى ءتىلشىسى, جازۋشى قانات ابىلقايىر مەن بۇرىنعى ءتىلشىسى, اقىن حاميت ەسامان دا بار. ارىپتەسىمىزدىڭ باعى ۇلتتىق سىيلىقتىڭ «ۇزدىك بالالار ادەبيەتى» اتالىمى بويىنشا جانىپ وتىر.
سالتاناتتى ءىس-شارا قازاق ادەبيەتىنىڭ بۇگىنگى تىنىسىن تانىتىپ قانا قويماي, رۋحاني جاڭعىرۋ مەن كونستيتۋتسيالىق رەفورمالار اياسىنداعى مادەني ساياساتتىڭ ماڭىزىن ايقىنداعان ماڭىزدى جيىنعا اينالدى. ماراپاتتاۋ راسىمىنە پرەمەر-ءمينيستردىڭ ورىنباسارى – مادەنيەت جانە اقپارات ءمينيسترى ايدا بالاەۆا, پارلامەنت دەپۋتاتتارى, قازاقستان جازۋشىلار وداعىنىڭ توراعاسى مەرەكە قۇلكەنوۆ, سونداي-اق زيالى قاۋىم وكىلدەرى قاتىستى.
جەڭىمپازداردى قۇتتىقتاعان ايدا بالاەۆا قالامگەرلەردىڭ ۇلتتىق ادەبيەتتى دامىتۋعا قوسقان ۇلەسىن ەرەكشە اتاپ ءوتىپ, قوعامدىق سانانى جاڭعىرتۋ كەزەڭىندە ادەبيەتتىڭ اتقاراتىن رولىنە توقتالدى. ونىڭ ايتۋىنشا, مەملەكەت باسشىسىنىڭ تاپسىرماسىنا سايكەس ەلىمىزدە اقىن-جازۋشىلاردى قولداۋعا باعىتتالعان جۇيەلى مەملەكەتتىك ساياسات جۇزەگە اسىرىلىپ كەلەدى.
«مەملەكەت باسشىسىنىڭ ادىلدىك پەن بىرتۇتاستىققا, زاڭ مەن تارتىپكە نەگىزدەلگەن اۋقىمدى رەفورمالارى ەل دامۋىنىڭ جاڭا باعدارىنا اينالىپ وتىر. كونستيتۋتسيالىق رەفورمالار – تەك قۇقىقتىق وزگەرىس ەمەس, ەلدىڭ بولاشاعىن ايقىندايتىن, قوعامدىق سانانى جاڭعىرتاتىن تۇبەگەيلى بەتبۇرىس», دەدى ايدا بالاەۆا. ونىڭ سوزىنشە, تاريحي مۇرانى ساقتاۋ مەن ءتول مادەنيەتتى قولداۋ – بارشاعا ورتاق مىندەت. بۇل ۇستانىم العاش رەت كونستيتۋتسيا جوباسىندا ناقتى كورىنىس تاۋىپ, مادەنيەت پەن رۋحانيات مەملەكەت دامۋىنىڭ ماڭىزدى تىرەكتەرىنىڭ ءبىرى رەتىندە ايقىندالعان.
سونداي-اق جاڭا كونستيتۋتسيادا ءبىلىم مەن عىلىمعا, مادەنيەت پەن يننوۆاتسيالىق دامۋعا باسىمدىق بەرىلۋى ەلدىڭ ستراتەگيالىق باعىتىن كورسەتەتىن ماڭىزدى قادام ەكەنى اتاپ ءوتىلدى. بۇل – ادام الەۋەتىن دامىتۋعا, شىعارماشىلىق وي مەن جاڭا تەحنولوگيالاردى قولداۋعا باعىتتالعان تاڭداۋ. وسىنداي جاۋاپتى كەزەڭدە قوعامنىڭ رۋحاني باعدارىن ايقىنداۋدا قالامگەرلەر قاۋىمىنىڭ ورنى ايرىقشا.
ايتا كەتەرلىگى, بيىل پرەزيدەنتتىك ارناۋلى ادەبي سىيلىققا «پروزا», «پوەزيا», «دراماتۋرگيا» جانە «بالالار ادەبيەتى» اتالىمدارى بويىنشا 49 جاس اۆتور قاتىسىپ, مەملەكەت باسشىسىنىڭ جارلىعىمەن جەڭىمپازدار انىقتالدى. اتاپ ايتقاندا, «پروزا» اتالىمى بويىنشا ارمان المەنبەت «تەرگەۋشى» شىعارماسى ءۇشىن, «پوەزيا» اتالىمى بويىنشا سايان ەسجان «قۇمداعى حيكايا» جيناعى ءۇشىن, «دراماتۋرگيا» اتالىمى بويىنشا باۋىرجان مۇستافيەۆ «اق كيىز» تۋىندىسى ءۇشىن, ال «بالالار ادەبيەتى» اتالىمى بويىنشا اسىلان تىلەگەنوۆ «جازدا اتامنىڭ اۋىلىندا…» شىعارماسى ءۇشىن ماراپاتتالدى.
كەيىنگى جىلدارى «ايبوز» ۇلتتىق ادەبي سىيلىعى رۋحاني ورتاعا ەرەكشە سەرپىلىس بەرىپ كەلەدى. بيىل بايقاۋعا جەتى اتالىم بويىنشا 180-گە جۋىق ءوتىنىم كەلىپ ءتۇستى. قازىلار القاسى شىعارمالاردىڭ اۆتورىن بىلمەي, ءادىل ءارى جاسىرىن داۋىس بەرۋ ارقىلى ۇزدىكتەردى انىقتاعان.
وتكەن جىلعى «ايبوز» ۇلتتىق ادەبي سىيلىعىنىڭ جەڭىمپازدارى رەتىندە «ۇزدىك پوەزيا» – حاميت ەساماننىڭ «ايشا ءبيبى» شىعارماسىنا, «ۇزدىك پروزا» جازۋشى داۋرەن قۋاتتىڭ «برۋكلين كوپىرىندەگى كەزدەسۋ» اتتى تۋىندىسىنا, «ۇزدىك دراماتۋرگيا» ادىلبەك ىبىرايىم ۇلىنىڭ «كەنەسارى حان» اتتى ەڭبەگىنە, «ۇزدىك ادەبي اۋدارما» اسەم ەرەجەقىزىنىڭ «كۇن قارماعان بالا» اتتى اۋدارماسىنا, «ۇزدىك بالالار ادەبيەتى» «Egemen Qazaqstan» گازەتىنىڭ ءتىلشىسى قانات ابىلقايىردىڭ «التىن بالا» شىعارماسىنا, «ۇزدىك ادەبي سىن» بويىنشا امانگەلدى كەڭشىلىك ۇلىنىڭ «مۇقاعالي مەن ەنحە. اقىن مەن ادامنىڭ دراماسى» اتتى سىن-زەرتتەۋ ماقالاسىنا, ال «ۇزدىك كوميكس» جانرى بويىنشا يلدار سانسىزباي ۇلىنىڭ «تابۋ. جوعالعان ءۇمىتتىڭ ءىزى» اتتى تۋىندىسىنا بەرىلدى.
ماراپاتتاۋ راسىمىندە سويلەگەن ايدا بالاەۆا «ايبوز» ۇلتتىق ادەبي سىيلىعى جاڭا ەسىمدەردى تانىتۋعا, شىعارماشىلىق ەركىندىكتى قولداۋعا جانە ءسوز ونەرىنىڭ قوعامدىق ماڭىزىن ارتتىرۋعا باعىتتالعان ماڭىزدى جوبا ەكەنىن اتاپ ءوتتى. ۇلتتىق ادەبيەتتىڭ دامۋىنا سەرپىن بەرەتىن بۇل بايقاۋلار – رۋحاني ساياساتتىڭ ناقتى ناتيجەسى. ادەبيەتكە كورسەتىلگەن قۇرمەت – ۇلتتىڭ بولاشاعىنا جاسالعان ينۆەستيتسيا ەكەنى تاعى ءبىر مارتە ايقىندالدى.