زامان تالابىنا جاۋاپ بەرەدى

قولدانىستاعى اتا زاڭ قابىلدانعالى 30 جىلدان استام ۋاقىت ءوتتى, ەل ەسەيدى, قوعام وزگەردى, توڭىرەگىمىزدەگى جاعداي كۇردەلەنىپ, الەمدىك ءتارتىپ كۇيزەلىسكە ءتۇستى… ونىڭ ءبارىن كوزى اشىق, كوكىرەگى وياۋ وتانداستارىمىز تەرەڭ ءتۇسىنىپ, جۇمىلۋعا ۇمتىلىپ وتىر.

وسىناۋ تامىرلى تۇيتكىلدەر جاۋاپ­سىز قالماسى انىق ەدى. كوپ كۇرسىنىپ, ءبىر كوتەرگەن جۇگىمىز بۇل. جاڭا جوبا ەل ىشىندەگى كوپجىلعى ماسەلەلەردىڭ شەشىمى رەتىندە ۇسىنىلدى. وتكەننىڭ كەرەگى قالىپ, بۇگىنگىگە قاجەتتىسى تىڭ جاڭالىق بولىپ ەنىپ جاتىر. ىشكى سۇرانىس پەن اينالاداعى جاعدايدىڭ اراسىنداعى تەڭگەرىمدى ءارى سالماقتى جول قۇجات تاراۋلارىنا ءتۇستى. بۇل قۇجات – ۋاقىتتىڭ ءوزى قويعان تالاپقا بەرىلگەن جاۋاپ.

سول سۇرانىستىڭ بىرەگەيى ادىلدىك ەدى. ادىلەتتى قازاقستان تۇجىرىمى, زاڭ مەن ءتارتىپ قاعيداتتارى نەگىزگى زاڭ جوباسى­نىڭ باسىندا-اق تايعا تاڭبا باسقانداي شەگەلەندى.

راس, ادىلدىك, زاڭدىلىق پەن ءتارتىپ بۇگىن قوعام ءۇشىن دە, ازامات ءۇشىن دە, مەملەكەت ءۇشىن دە كەزەك كۇتتىرمەيتىن ماسەلە. تۇراقسىز الەمدە تۇراقتى ەل بولىپ قالۋ وڭاي شارۋا ەمەس. ءجۇز قۇبىلعان قۇرلىقتىڭ ورتاسىنداعى ەل ءۇشىن 95 باپ­تىڭ اراسىندا ۇلت مۇراتىن ورنەكتەۋ دە جەڭىل بولدى دەي المايمىن. وتكەلدە بۇگىن تۇرعان ۇلت مۇددەسىنىڭ ءبىر كورىنىسى دەسە دە بولادى مۇنى. وسى جەردە ويشىل ابايدىڭ «اقىرىن ءجۇرىپ, انىق باس, ەڭبەگىڭ كەتپەس دالاعا…» دەگەن ولەڭ جولدارى ەسكە تۇسەدى.

بۇل تۇرعىدا ۇرپاق تاربيەسى ماسەلە­سى وزەكتىلىگىن انىق بايقاتادى. كونستيتۋ­تسيا جوباسىندا تاريحي-مادەني مۇرانى ساقتاۋعا, مادەنيەت پەن بىلىمگە, عىلىم مەن يننوۆاتسياعا باسىمدىق بەرىلگەنىن كوردىك. بۇل باپتار ءبىز مۇرات ەتكەن كەلە­شەكتى جاس ۇرپاقتىڭ بويىنا بارىنشا سىڭىرۋگە جول اشاتىن زور مۇمكىندىك. ولاي بولسا, كەلەر بۋىن ءوز زامانىندا نىق ءجۇرىپ, وزىق دامۋى­نا بەرىك ىرگە قالاۋىمىز شارت.

ءوز باسىم ۇسىنىلعان قۇجاتتى قادام­داپ تۇرىپ العا باس­تايتىن مەجە دەپ قابىلدايمىن. وسى­ناۋ جولدىڭ ءساتىن سالار ءبىر عانا دۇنيە بار – بەكەم بىرلىك. اسىل بابالارىمىز ايت­پاقشى, اۋىزبىر­شىلىگىمىزگە بەرىك بولساق, الىنبايتىن اسۋ, باعىندىرمايتىن بيىك بولمايدى.

ابزال نۇكەنوۆ,

الماتى قالاسى اكىمىنىڭ ورىنباسارى