جەتىسۋ وبلىسىندا ەكولوگيالىق ءتۋريزمدى دامىتۋدا «التىنەمەل» جانە «جوڭعار الاتاۋى» ۇلتتىق پاركتەرى نەگىزگى باعىتقا اينالدى. ينفراقۇرىلىمنىڭ جاقسارۋى ناتيجەسىندە بۇل نىساندارعا كەلۋشىلەر سانى ايتارلىقتاي وسكەن: 2024 جىلى 27 مىڭ تۋريست تىركەلسە, وتكەن جىلى كورسەتكىش 39,5 مىڭعا جەتتى, دەپ حابارلايدى Egemen.kz.
تۋريستەرگە قولايلى جاعداي جاساۋ ماقساتىندا سوڭعى جىلدارى بىرقاتار جۇمىستار اتقارىلدى. «التىنەمەلدە» جەكە ينۆەستيتسيا ەسەبىنەن ۆيزيت-ورتالىق سالىندى, تۋريستىك باعىتتارداعى اقپاراتتىق بەلگىلەر جاڭارتىلدى. «بەسشاتىر» ساق قورعاندارى اۋماعىندا جوندەۋ جۇرگىزىلىپ, «جاڭاتوعاي» مەن «تاڭبالىتاس» كوردوندارىندا ارنايى الاۋ جاعۋ ورىندارى جابدىقتالدى.
ال سارقان اۋدانىنداعى توپولەۆكا اۋىلىندا ۆيزيت-ورتالىق اشىلدى. «جوڭعار الاتاۋى» ۇلتتىق پاركىندە دەمالىس ايماقتارى مەن اۆتوتۇراقتار ورناتىلىپ, ونداعان اقپاراتتىق ستەندتەر مەن تاقتايشالار, كىرەبەرىس اركالار, سانيتارلىق توراپتار جانە قوقىس كونتەينەرلەرى قويىلدى.
ەلىمىزدە تۋريزمگە سالىنعان ينۆەستيتسيا كولەمى 1,2 ترلن تەڭگەدەن استى
جاسىلكولگە باراتىن باعىتتاعى جولدىڭ ءبىر بولىگى جوندەلىپ, نەگىزگى جول قۇرىلىسى بيىل اياقتالماق. سونىمەن قاتار ەلىمىزدەگى ەڭ بيىك بۇرقانبۇلاق سارقىراماسىنا اپاراتىن 31 شاقىرىم جول قايتا جاڭعىرتىلىپ جاتىر.
وڭىردە ءتۋريزمدى ىلگەرىلەتۋ ماقساتىندا جىل سايىن يميدجدىك فەستيۆالدەر ۇيىمداستىرىلادى. «سيۆەرس الما اعاشىنىڭ گۇلدەنۋى», «الاكول تولقىنى», «التىنەمەل – قۇلاندار مەكەنى» شارالارى 2026 جىلعا ارنالعان رەسپۋبليكالىق مادەني-تۋريستىك كۇنتىزبەگە ەندى. سونىڭ ناتيجەسىندە 2025 جىلعى دەرەك بويىنشا وبلىسقا كەلگەن تۋريستەر سانى 11%-عا, شەتەلدىك قوناقتار 60%-عا ارتقان.
2026 جىلى قايدا بارامىز؟ تۋريزم مينيسترلىگى مادەني-تۋريستىك ءىس-شارالار كۇنتىزبەسىن جاريالادى
ايتا كەتەيىك, جەتىسۋ اۋماعىندا ۇلتتىق پاركتەردەن بولەك, الاكول مەملەكەتتىك تابيعي قورىعى دا بار.