پرەمەر-مينيستر ولجاس بەكتەنوۆ پاۆلودار وبلىسىنا جۇمىس ساپارى بارىسىندا مەملەكەت باسشىسىنىڭ ەنەرگەتيكالىق قاۋىپسىزدىكتى نىعايتۋ, كومىر گەنەراتسياسىن دامىتۋ جانە ەكونوميكا مەن حالىقتىڭ ءوسىپ كەلە جاتقان قاجەتتىلىكتەرىن جابۋ ءۇشىن جاڭا قۋاتتاردى ىسكە قوسۋ جونىندەگى تاپسىرمالارىنىڭ ورىندالۋىن تەكسەردى. تىرشىلىكتى قامتاماسىز ەتۋ جۇيەلەرىنىڭ تۇراقتى جۇمىسىن جانە ەنەرگەتيكا مەن كومىر وندىرۋدە تسيفرلىق شەشىمدەر ەنگىزۋ ماسەلەلەرىنە ەرەكشە نازار اۋدارىلدى, دەپ جازادى Egemen.kz.
ساپار اياسىندا ولجاس بەكتەنوۆ ءوڭىردىڭ ەنەرگەتيكالىق ينفراقۇرىلىمىنىڭ دامۋىمەن تانىستى. 2025 جىلى ءوڭىر ەلدەگى جالپى ەنەرگيا كورسەتكىشىنىڭ 42%-ىن ءوندىردى.
پرەمەر-مينيسترگە ەلىمىزدەگى قاتتى وتىنمەن جۇمىس ىستەيتىن ەڭ ءىرى ستانسا – بولات نۇرجانوۆ اتىنداعى ەكىباستۇز مەملەكەتتىك ايماقتىق ەلەكتر ستانساسى – 1 (ماەس) الاڭىندا نىساندى جاڭعىرتۋ بارىسى تۋرالى باياندالدى.
سونداي-اق وڭىردەگى گەنەراتسيالىق جانە جەلىلىك ينفراقۇرىلىمدى دامىتۋ جونىندەگى جوبالار, ونىڭ ىشىندە قۋاتى 325 مۆت اقسۋ ماەس-تەگى №7 ەنەرگوبلوكتى رەكونسترۋكتسيالاۋ, جەكەلەگەن ەنەرگيا كوزدەرىن جاڭعىرتۋ, سونداي-اق زاماناۋي تەحنولوگيالارعا نەگىزدەلگەن جاڭا جوبالاردى ازىرلەۋ جانە بالامالى ەنەرگيانى دامىتۋ جوبالارى تانىستىرىلدى.
ەنەرگەتيكا ءمينيسترى ەرلان اقكەنجەنوۆتىڭ ايتۋىنشا, بيىل قازاقستاندا شامامەن 2,6 گۆت جاڭا قۋات كوزىن, ونىڭ ىشىندە 2 427,6 مۆت گاز جوبالارىن جانە 245,8 مۆت جەك-ءتى ىسكە قوسۋ جوسپارلانىپ وتىر. بارلىعى 13 جوبا, ونىڭ ىشىندە تەكەلى ەنەرگوكەشەنى, اتىراۋ جەو, تۇركىستان وبلىسىندا, الماتى قالاسىندا بۋ-گاز قوندىرعىلارى جانە ت. ب. جوبالار ىسكە اسىرىلادى.
پاۆلوداردا توزىعى جەتكەن جىلۋ-ەنەرگيا ورتالىعى جاڭعىرتۋدان وتەدى
پاۆلودار وبلىسىنىڭ اكىمى اسايىن بايحانوۆ 2025-2026 جىلدارداعى جىلۋ بەرۋ ماۋسىمىنىڭ بارىسى تۋرالى باياندادى. ەنەرگيا كوزدەرىندەگى نەگىزگى 46 جابدىقتا جوندەۋ جۇمىستارى اياقتالىپ, 37,1 شاقىرىم جىلۋ جەلىلەرى جاڭعىرتىلدى, بۇل جىلۋ جۇيەلەرىنىڭ قالىپتى جۇمىس ىستەۋىن قامتاماسىز ەتىپ, توزۋ دەڭگەيىن 1,5%-عا تومەندەتۋگە مۇمكىندىك بەردى.
ەكىباستۇز ماەس-2-ءنىڭ قۇرىلىس الاڭىندا پرەمەر-مينيستر ستانسانى كەڭەيتۋ جانە رەكونسترۋكتسيالاۋ جوباسىنىڭ جۇزەگە اسىرىلۋ بارىسىمەن تانىستى.
پرەزيدەنت: اەس-ءتىڭ اياقتالعانىن كۇتپەي جاڭا ەنەرگيا كوزدەرىن ىسكە قوسۋ كەرەك
بۇگىنگى تاڭدا مۇنداعى ەنەرگيا قۋاتى 1 گۆت-تى قۇرايدى. №3 جانە №4 ەنەرگيا بلوكتارىن سالۋ ستانسانىڭ قۋاتىن 2,1 گۆت-قا دەيىن ارتتىرۋعا مۇمكىندىك بەرەدى. «سامۇرىق-ەنەرگو» اق باسقارما توراعاسى قايرات ماقسۇتوۆ اتالعان بلوكتار 2028 جىلعى قىركۇيەكتە (№3 ەنەرگوبلوك) جانە 2030 جىلعى قىركۇيەكتە (№4 ەنەرگوبلوك) پايدالانۋعا بەرىلەتىنىن باياندادى. كەڭەيتۋ جوباسىن جۇزەگە اسىرۋعا سالىناتىن ينۆەستيتسيالاردىڭ جيىنتىق كولەمى 1,2 ترلن تەڭگەدەن اسادى.
ماەس-3 قۇرىلىسىنىڭ جوباسى بويىنشا قۋات كوزدەرىن كەزەڭ-كەزەڭىمەن ەنگىزە وتىرىپ, «تازا كومىر» تەحنولوگياسى نەگىزىندە جالپى قۋاتى 2,64 گۆت بولاتىن جاڭا كومىر گەنەراتسياسىن قۇرۋ جوسپارلانىپ وتىرعانى اتاپ ءوتىلدى.
مەملەكەت باسشىسى ۇلتتىق قۇرىلتايدا قۋات كوزدەرىنىڭ جەتكىلىكتى بولۋىن قامتاماسىز ەتۋدى مەملەكەتتىك ساياساتتىڭ اسا ماڭىزدى بولىگى رەتىندە قاراستىرۋ قاجەت ەكەنىن اتاپ ءوتتى.
ەنەرگەتيكا مينيسترلىگى: 2027 جىلى ەلىمىزدە ەنەرگيا تاپشىلىعى جويىلادى
«ماەس-2-ءنىڭ قوسىمشا ەنەرگيا بلوكتارىن ىسكە قوسۋ جانە ماەس-3-ءتىڭ قۇرىلىسىن باستاۋ ەكونوميكاعا سەرپىن بەرەدى. ءبىز بىرتىندەپ ەنەرگيا تاپشىلىعىن جويىپ, وتاندىق بيزنەسپەن قاتار ينۆەستورلار ءۇشىن دە قاجەتتى ەنەرگيا قۋاتتارىن ۇسىنۋعا مۇمكىندىك الامىز», دەدى ولجاس بەكتەنوۆ.