قىتايدىڭ Moonshot AI ستارتاپى Kimi K2.5 دەپ اتالاتىن اشىق جاساندى ينتەللەكت (جي) مودەلىن تانىستىردى. ازىرلەۋشىلەردىڭ مالىمەتىنشە, جاڭا جۇيە ماتىنمەن عانا ەمەس, سۋرەت پەن ۆيدەومەن دە جۇمىس ىستەي الادى جانە بىرقاتار سىناقتاردا GPT-5.2 مەن Gemini 3 Pro كورسەتكىشتەرىنەن جوعارى ناتيجە كورسەتكەن, دەپ جازادى Egemen.kz.
Moonshot AI ازىرلەگەن Kimi K2.5 باستاپقىدا مۋلتيمودالدى جي رەتىندە جاسالعان. مودەل شامامەن 15 ترلن ۆيزۋالدى-ماتىندىك توكەن نەگىزىندە قايتا دايارلانعان, بۇل رەتتە «كورۋ» جانە ء«ماتىن» دەپ بولىنەتىن جەكە پايپلايندار قولدانىلماعان. مۇنداي ءتاسىل ءارتۇرلى دەرەك تۇرلەرىن ءبىر كونتەكستە قاتار وڭدەۋگە مۇمكىندىك بەرەدى.
Cybernet AI تۇركى تىلدەرىنە ارنالعان ەڭ ءىرى جاساندى ينتەللەكت مودەلىن تانىستىردى
جاڭا جي-مودەلدىڭ مۇمكىندىكتەرى اۋقىمدى. ول تەك ءماتىندى ەمەس, سۋرەت پەن ۆيدەونى دا تەرەڭ تۇسىنەدى. باعدارلامالاۋ سالاسىندا دا الەۋەتى جوعارى: سكرينشوت, ەكران جازباسى نەمەسە ديزاين ۇلگىلەرى ارقىلى كود جازا الادى. سونىمەن قاتار سايتتار مەن قوسىمشالاردىڭ ينتەرفەيستەرىن بەينە نەمەسە سۋرەتكە قاراپ قايتا جاساپ شىعارۋ قابىلەتىنە يە. جۇيە ءبىر مەزەتتە 100 جي-اگەنتتەن تۇراتىن توپتى باسقارىپ, 1 500-گە دەيىن قۇرال شاقىرۋىن ورىنداي الادى.
تەستىلەۋ ناتيجەلەرى دە نازار اۋدارتادى. باعدارلامالاۋ بويىنشا بەنچمارك سىناقتارىندا Kimi K2.5 Gemini 3 Pro جانە GPT-5.2 جۇيەلەرىنەن جوعارى بالل جيناعان. ۆيدەو تالداۋ تاپسىرمالارىندا Claude Opus مودەلىنەن وزىق ناتيجە كورسەتكەن. ال اگەنتتىك ستسەناريلەردە تاپسىرمالاردى ورىنداۋ جىلدامدىعى جەكەلەگەن جي قولدانۋمەن سالىستىرعاندا 4,5 ەسەگە دەيىن ارتقان.
جاڭا مودەلمەن بىرگە Moonshot AI ازىرلەۋشىلەرگە ارنالعان Kimi Code قۇرالىن دا ۇسىندى. بۇل كودپەن تىكەلەي تەرمينال ارقىلى نەمەسە VS Code, Cursor سەكىلدى رەداكتورلاردا جۇمىس ىستەۋگە مۇمكىندىك بەرەدى. كومپانيا ونى Claude Code پەن Gemini CLI-گە اشىق بالاما رەتىندە ۇسىنىپ وتىر.
ايتا كەتەيىك, Moonshot AI بىرنەشە ميلليارد دوللار ينۆەستيتسيا تارتقان. قازىر ستارتاپ جاڭا ينۆەستيتسيالىق راۋندقا دايىندالىپ جاتىر, ال كومپانيانىڭ باعالانۋى 5 ملرد دوللارعا جۋىق. ساراپشىلاردىڭ پىكىرىنشە, Kimi K2.5-ءتىڭ اشىق فورماتتا ۇسىنىلۋى جاھاندىق جاساندى ينتەللەكت نارىعىنداعى باسەكەنى كۇشەيتە ءتۇسۋى ىقتيمال.
بۇدان ىلگەرىرەكتە بەيجىڭنىڭ ەكى جىلدا جاساندى ينتەللەكتىنىڭ استاناسىنا اينالۋعا نيەتتى ەكەنىن جازعان ەدىك.