استانا. 25 ناۋرىز. فرانتسۋز ءالپى تاۋلارىنىڭ ەتەگىنە سوعىپ, قيراعان نەمىستىڭ Germanwings كومپانياسىنىڭ ا320 لاينەرىنىڭ بورتىندا ءۇش قازاقستاندىق ازاماتتىڭ قازا تاپقانى بەلگىلى بولىپ وتىر. بۇل تۋرالى قازاقستان سىرتقى ىستەر مينيسترلىگىنىڭ ءباسپاسوز قىزمەتىنىڭ دەرەگىنە سۇيەنگەن egemen.kz حابارلادى.
«فرانتسيانىڭ وڭتۇستىگىندە اپاتقا ۇشىراعان A320 ءنومىرلى Airbus بورتىندا قازاقستاندىق ءۇش ازامات بولعان», - دەلىنگەن ۆەدومستۆو ءباسپاسوز قىزمەتى تاراتقان پاراقشادا.
قازاقستان سىرتقى ىستەر مينيسترلىگى 24 ناۋرىز كۇنى فرانتسۋز ءالپى تاۋلارىنىڭ ەتەگىنە سوعىپ, اپاتقا ۇشىراعان Germanwings اۆياكومپانياسىنىڭ بورتىندا قازاقستان رەسپۋبليكاسىنىڭ يمانعاليەۆ ەربول بازارالى ۇلى (1965 جىلى تۋعان), ەسەنعاليەۆا ايجان سارىمقىزى (1966 جىلى تۋعان) جانە يمانعاليەۆ ءادىل ەربول ۇلى (1989 جىلى تۋعان) ەسىمدى ازاماتتارىنىڭ قازا تاپقانىن مالىمدەپ وتىر.
اتى-جوندەرىنە قاراعاندا, ۇشەۋى ءبىر وتباسىنىڭ مۇشەلەرى سياقتى.
«قازا تاپقانداردىڭ وتباسىسى مەن تۋعان-تۋىستارىنا قاتتى قايعىرىپ, كوڭىل ايتامىز. بۇدان باسقا, گەرمانيا بيلىگىنىڭ اقپارى بويىنشا, قازاقستان ازاماتى بولۋى ىقتيمال بلەس ەلەنا نىسپىلى ايەل دە بولعان. قازىرگى تاڭدا ءتيىستى ورگاندار بۇل اقپاردىڭ قانشالىقتى شىندىققا جاناسىمدى ەكەنىن تەكسەرىپ جاتىر», - دەلىنگەن حابارلامادا.
سىرتقى ىستەر مينيسترلىگى سونداي-اق قازا تاپقاندار تۋعان-تۋىستارىنىڭ قازاقستان رەسپۋبليكاسىنىڭ بەرليندەگى كونسۋلدىعىنىڭ «قىزۋ جەلىدەگى» +4915208833631 (نەگىزگى بايلانىس), قازاقستان رەسپۋبليكاسىنىڭ يسپانياداعى (بارسەلونا) كونسۋلدىعىنىڭ +34674482333) نومىرىنە حابارلاسۋلارى كەرەك ەكەنىن تۇسىندىرەدى. بۇدان بولەك, كونسۋلدارمەن حابارلاسۋ مۇمكىن بولماي قالعان جاعدايدا تۋعان-تۋىستاردىڭ سىرتقى ىستەر مينيسترلىگىندەگى كەزەكشى ديپلوماتتىڭ +77172720111 دەگەن تەلەفون نومىرىنە حابارلاسۋلارىنا بولاتىندارىن ەسكەرتەدى.
Lufthansa-نىڭ ەنشىلەس كاسىپورنى بولىپ تابىلاتىن Germanwings اۆياكومپانياسىنىڭ A320 ءنومىرلى Airbus اۋە كەمەسى 24 ناۋرىز كۇنى بارسەلونادان ۇشىپ شىققانىنا ءبىر ساعاتتاي ۋاقىت بولعان كەزدە كەنەتتەن بارا جاتقان بيىكتىگىنەن كۇرت تومەن ءتۇسىپ, فرانتسۋزدىڭ ءالپى تاۋلارىنىڭ ەتەگىنە سوققان. سونىڭ الدىندا پيلوتتار قاۋىپ دابىلىن قاعا سالىپ, بايلانىستان شىعىپ قالعان. وسى ەكى ورتادا بار بولعانى 8 مينۋت قانا ۋاقىت وتكەن. الدىن الا بولجام بويىنشا, بورتتا 154 ادام وتىرعان, ولاردىڭ 6-ى ەكيپاج مۇشەلەرى بولعان.
سونداي-اق قيراعان ۇشاقتا قازاقستاننىڭ تۋماسى, كەڭەس زامانىنان بەرگى وپەرا ءانشىسى ولەگ برىجاكتىڭ بولعانى بۇدان بۇرىن حابارلانعان بولاتىن.
مۇرات ايتقوجا.