شاحماتشى ءبيبىسارا اساۋباەۆا نيدەرلاندتىڭ ۆەيك-ان-زەە قالاسىندا ءوتىپ جاتقان اسا ءىرى حالىقارالىق ءتۋرنيردىڭ التىنشى تۋرىندا جەڭىلىس تاپسا, جەتىنشىسىن تەڭ ويناپ, سەگىزىنشىسىندە جەڭىسكە جەتتى.
وسىعان دەيىن ازۋلى امەريكالىق ويىنشى ەندي ۆۋدفوردى ۇتىپ, ودان كەيىن ازەربايجاندىق ايدىن سۋلەيمانلى, ارگەنتينالىق فاۋستينو ورا, يسپانيالىق دانيل يۋففا, ۋكراينالىق ۆاسيلي يۆانچۋكپەن تەڭ ويناعان ءبيبىسارا كەلەسى تۋردا فرانتسيالىق مارك-اندريا ماۋريتستسيمەن كەزدەستى. جاستار اراسىندا الەم چەمپيونى دەگەن اتاعى بار 18 جاستاعى شاحماتشىعا اساۋباەۆانىڭ ءالى جەتپەدى. قارا فيگۋرالارمەن ويناعان ول پارتيانىڭ ورتا تۇسىندا قاتەلىك جىبەردى. ماۋريتستسي ونى ۇتىمدى پايدالانىپ, 42-جۇرىستەن كەيىن جەڭىسكە جەتتى.
سودان سوڭ ءبيبىسارانىڭ جولى ۆەليمير يليچپەن قيىستى. سەربيالىق شەبەر وسى «چەللەنجدەر» ساناتىنداعى تۋرنيردەگى رەيتينگى ەڭ جوعارى ويىنشى. ونىڭ 2 638 ۇپايى بار. ب.اساۋباەۆانىڭ جيعان ۇپاي قورى – 2497. ءبيبىسارا يليچپەن تەڭ وينادى. كەشە ول جاسى 40-تان اسقان اسا تاجىريبەلى نيدەرلاندتىق ەرۆين ل’اميمەن كەزدەستى. قارا تاستارمەن ويناعانىنا قاراماستان ءبيبىسارا باسىمدىق تانىتىپ, تازا جەڭىسكە جەتتى. وسى تابىسىنان كەيىن قازاق شاحماتشىسى سەگىزىنشى ورىننان قايتا بەسىنشى ساتىعا كوتەرىلدى. اساۋباەۆانىڭ قورجىنىندا 4,5 ۇپاي بار. الدىڭعى ورىنداردا مارك-اندريا ماۋريتستسي (6,5), ەندي ۆۋدفورد (6,5), ايدىن سۋلەيمانلى (6), ۆاسيلي يۆانچۋك (4,5) سىندى گروسسمەيستەرلەر تۇر.