مەملەكەت باسشىسى قاسىم-جومارت توقاەۆ قۇقىق بۇزۋشىلىقتىڭ الدىن الۋ, ازاماتتاردىڭ ەڭبەك ەتۋ بارىسىندا قاۋىپسىزدىگىن قامتاماسىز ەتۋ جانە جۇمىس بەرۋشىلەردىڭ جاۋاپكەرشىلىگىن كۇشەيتۋ ماسەلەلەرىنە ەرەكشە نازار اۋدارىپ كەلەدى. وسى باعىتتاعى تاپسىرمالاردىڭ ناقتى كورىنىسى سوت تاجىريبەسىندە دە ايقىن بايقالىپ جاتىر, دەپ حابارلايدى Egemen.kz.
اقمولا وبلىستىق سوتىندا وندىرىستىك جاراقات العان جۇمىسشىنىڭ پايداسىنا مورالدىق زياندى ءوندىرۋ تۋرالى ازاماتتىق ءىس قارالدى. ءىس ماتەريالدارىنا سايكەس, سلەسار-جوندەۋشى ا. ەڭبەك مىندەتتەرىن ورىنداۋ كەزىندە وندىرىستىك جاراقات العان. مەديتسينالىق قورىتىندىعا ساي, وعان باس جانە مويىن تۇسىنداعى سۇيەكتەردىڭ سىنۋى دياگنوزى قويىلىپ, ءۇشىنشى توپتاعى مۇگەدەكتىك بەلگىلەنگەن. سونىمەن قاتار, كاسىبي ەڭبەككە قابىلەتتىلىگىن جوعالتۋ دەڭگەيى 55 پايىز دەپ تانىلعان.
جازاتايىم وقيعا تۋرالى اكتىمەن جۇمىس بەرۋشىنىڭ كىناسى 100 پايىز ەكەنى انىقتالعان. بۇل ەڭبەك قاۋىپسىزدىگى تالاپتارىنىڭ ورەسكەل بۇزىلعانىن كورسەتەدى. جابىرلەنۋشى سوتقا جۇگىنىپ, جۇمىس بەرۋشىدەن تولەنبەگەن جالاقى سوماسىن جانە مورالدىق زياندى ءوندىرۋدى تالاپ ەتكەن. ءبىرىنشى ساتىداعى سوت تالاپتى ءىشىنارا قاناعاتتاندىرىپ, جابىرلەنۋشىنىڭ پايداسىنا 3 ميلليون تەڭگە كولەمىندە مورالدىق زيان وتەماقىسىن ءوندىرىپ بەردى. ال, جوعالتقان جالاقى سوماسىن ءوندىرۋ اننۋيتەتتىك ساقتاندىرۋ شارتىنا سايكەس جابىرلەنۋشىگە 1 ميلليون تەڭگە تولەنگەنىنە بايلانىستى قاناعاتتاندىرىلعان جوق.
سونىمەن قاتار, سوت ەڭبەك زاڭناماسىنىڭ جۇمىس بەرۋشى تاراپىنان بۇزىلعانىن نازارعا الىپ, مەملەكەتتىك ەڭبەك ينسپەكتسياسى كوميتەتى دەپارتامەنتىنىڭ اتىنا جەكە ۇيعارىم شىعاردى. بۇل شەشىم مەملەكەت باسشىسى جۇكتەگەن الدىن الۋ قاعيداتىنا ساي, زاڭ بۇزۋشىلىقتارعا جول بەرگەن سۋبەكتىلەردىڭ جاۋاپكەرشىلىگىن ارتتىرۋعا باعىتتالعان.وبلىستىق سوت القاسىنىڭ قاۋلىسىمەن ءبىرىنشى ساتىداعى سوتتىڭ شەشىمى وزگەرىسسىز قالدىرىلىپ, سوت اكتىسى زاڭدى كۇشىنە ەندى.
ايتا كەتەيىك, 2026 جىلعى 6 قاڭتاردا قوستاناي وبلىسىنداعى شاحتادا جارىلىس بولىپ, جۇمىسشى جاراقات العان ەدى.