ەلىمىزدە تاۋار اينالىمىن تسيفرلاندىرۋ جاڭا كەزەڭگە ءوتتى. قارجى مينيسترلىگىنىڭ ەلەكتروندىق قارجى ورتالىعى تاۋارلاردىڭ ۇلتتىق كاتالوگىن (تۇك) جاڭعىرتۋدىڭ نەگىزگى كەزەڭىن اياقتاپ, ونىڭ اۋقىمىن بىردەن ون ەسەگە ۇلعايتتى. بۇرىن 1,3 ملن تاۋاردى قامتىعان جۇيەدە ەندى 13 ملن-عا جۋىق ءونىم تىركەلگەن. بۇل جاي عانا ساننىڭ ءوسۋى ەمەس, وتاندىق بيزنەس ءۇشىن جاڭا ءتارتىپ پەن تۇسىنىكتى ەرەجەلەردىڭ قالىپتاسۋى, دەپ جازادى Egemen.kz.
كاتالوگتىڭ ءمانىن قاراپايىم تىلمەن ايتساق, نارىقتاعى ءار تاۋارعا بىرىڭعاي «تسيفرلى تولقۇجات» بەرىلدى. بۇعان دەيىن ءبىر ءونىم مەملەكەتتىك ساتىپ الۋدا, سالىق نەمەسە كەدەن جۇيەسىندە ءارتۇرلى اتاۋمەن جۇرە بەرەتىن. سونىڭ سالدارىنان ەسەپتە شاتاسۋ, قايتالانعان دەرەك, ارتىق تەكسەرىس كوبەيەتىن. تۇك ەنگىزگەن 13 تاڭبالى NTIN كودى وسى بىتىراڭقىلىقتى جويىپ, تاۋاردىڭ قوزعالىسىن وندىرىستەن نەمەسە يمپورتتان باستاپ, دۇكەندەگى چەككە دەيىن ءبىر ارناعا تۇسىرەدى.
ۇلتتىق تاۋارلار كاتالوگى: نارىقتى جۇيەلەۋ باستاماسى
بۇل ەڭ الدىمەن بيزنەسكە ءتيىمدى. كاسىپكەر ءبىر تاۋاردى ءار جۇيەگە قايتا-قايتا سيپاتتاپ, اتاۋىن تۇزەتىپ اۋرە بولمايدى. ءبىر كود – بارلىق جەردە بىردەي. اشىقتىق ارتىپ, ەسەپ جۇرگىزۋ جەڭىلدەيدى, ال ادال جۇمىس ىستەيتىن كومپانيالار ءۇشىن باسەكەلەستىك شارتتارى تەڭەسەدى.
جوبانىڭ تاعى ءبىر ماڭىزدى قىرى – جاساندى ينتەللەكتىنى پايدالانۋ. جي كاتالوگتەگى مالىمەتتەردىڭ «گيگيەناسىن» اۆتوماتتى تۇردە جۇرگىزەدى. ماسەلەن, قاتە جازبالاردى تازالايدى, قايتالاناتىن اتاۋلاردى بىرىكتىرەدى, تاۋارلاردى ۇلتتىق جانە حالىقارالىق جىكتەۋىشتەرگە سايكەستەندىرەدى. ناتيجەسىندە بۇرىن ءبىر ساعات الاتىن قۇجات وڭدەۋ ءبىر مينۋتقا دەيىن قىسقارعان. بۇل – ۋاقىت ۇنەمى, ال ۋاقىت بيزنەس ءۇشىن تىكەلەي شىعىن مەن تابىسقا اسەر ەتەتىن رەسۋرس.
وتاندىق تاۋار وندىرۋشىلەردىڭ ءتىزىلىمى تولىقتىرىلدى
قازىر جۇيەگە فيسكالدى دەرەكتەردىڭ 10 وپەراتورى قوسىلعان. بۇل ەلدەگى باقىلاۋ-كاسسالىق ماشينالاردىڭ شامامەن 80 پايىزى. ونىڭ ىشىندە ءىرى ساۋدا جەلىلەرى – Magnum, Small, انۆار بار. مەملەكەتتىك ساتىپ الۋ پورتالى مەن ەلەكتروندىق شوت-فاكتۋرالار جۇيەسىمەن ىقپالداسۋ ەكسپورت پەن يمپورتتاعى راسىمدەردى دە جەدەلدەتىپ وتىر. كودتار اۆتوماتتى تۇردە سايكەستەندىرىلىپ, قاعازباستىلىق ازايادى.
مەملەكەت ءۇشىن تۇك – باقىلاۋ مەن تالداۋدىڭ قۋاتتى قۇرالى. نارىقتاعى ناقتى دەرەكتەرگە سۇيەنە وتىرىپ, كونترافاكتىمەن كۇرەسۋگە, باعالاردىڭ نەگىزسىز ءوسۋىن انىقتاۋعا مۇمكىندىك تۋادى. ال بيزنەس ءۇشىن بۇل – جاسىرىن اينالىم مەن «كولەڭكەلى» باسەكەنىڭ ازايۋى دەگەن ءسوز.
ۇلتتىق تاۋارلار كاتالوگى: 2026 جىلدان باستاپ تاۋار اينالىمى جاڭا تسيفرلىق تارتىپكە كوشەدى
ەلەكتروندىق قارجى ورتالىعى وكىلدەرىنىڭ ايتۋىنشا, «تاۋارلاردىڭ ۇلتتىق كاتالوگى اشىق ەكونوميكانىڭ ىرگەتاسىنا اينالىپ كەلەدى. ول باعانى جاسىرۋعا دا, ءونىمدى اۋىستىرىپ كورسەتۋگە دە جول بەرمەيدى». شىن مانىندە, جۇيە مەملەكەتكە ءتيىمدى باقىلاۋ, ال كاسىپكەرگە ايقىن ەرەجە ۇسىنىپ وتىر.
سايىپ كەلگەندە 13 ميلليون تاۋاردى بىرىكتىرگەن ۇلتتىق كاتالوگ – تەك تەحنيكالىق جاڭارتۋ ەمەس. بۇل – وتاندىق بيزنەستى تارتىپكە شاقىراتىن, ادال كاسىپكە جول اشاتىن جانە ەكونوميكانىڭ «كورىنبەيتىن» تۇستارىن جارىققا شىعاراتىن ماڭىزدى قادام.