ەكى اپتادان كەيىن يتاليانىڭ ميلان جانە كورتينا د’امپەتستسو قالالارىندا XXV قىسقى وليمپيادا ويىندارى باستالادى. وليمپياداعا ليتسەنزيا جەڭىپ العاندار قاتارىندا اباي وبلىسى, ءۇرجار اۋدانىنىڭ تۋماسى امىرعالي مۇراتبەكوۆ تە بار, دەپ جازادى Egemen.kz.
شاڭعىشى قازىر ۇلتتىق قۇراما مۇشەلەرىمەن وقۋ-جاتتىعۋ جيىنىندا جۇرگەندىكتەن وبلىس اكىمى بەرىك ءۋالي سپورتشىعا قۇتتىقتاۋ جولداپ, الداعى ۇلكەن جارىستا ساتتىلىك تىلەدى.
ء«سىز حالىقارالىق سپورت ارەناسىندا ەلىمىزدىڭ اتىنان ونەر كورسەتەتىن جەتەكشى سپورتشىلاردىڭ قاتارىنداسىز. اباي ءوڭىرىنىڭ جۇرتشىلىعى سىزگە زور سەنىم ءبىلدىرىپ, وليمپيادا ويىندارىندا ەل نامىسىن ابىرويمەن قورعايتىنىڭىزعا كامىل سەنەدى. ءبىزدىڭ وبلىستىڭ سپورتشىلارى بۇعان دەيىن قىسقى ازيادا ويىندارىندا ءساتتى ونەر كورسەتتى. بۇل رەتتە ءتورت بىردەي وليمپيادانىڭ قاتىسۋشىسى, ازيا ويىندارىنىڭ جەتى دۇركىن چەمپيونى وكسانا ياتسكايا, قازاقستاننىڭ ءۇش دۇركىن چەمپيونى, سوچيدەگى وليمپيادادا قازاقستان قۇراماسىنىڭ تۋ ۇستاۋشىسى بولعان ەردوس احماديەۆ, قازاقستاننىڭ ەڭبەك سىڭىرگەن سپورتشىسى گالينا ۆيشنەۆسكايا-شەپورەنكو, حاربيندەگى ازيادا ويىندارىنىڭ كۇمىس جۇلدەگەرلەرى كاميلا ەلگازينوۆا مەن كيريلل باۋەر ەسىمدەرىن قۇرمەتپەن اتاپ وتەمىز. XXV قىسقى وليمپيادا ويىندارىندا جەڭىستى جولدى جالعاستىرىپ, ءساتتى ونەر كورسەتىپ, جوعارى ناتيجەلەرگە قول جەتكىزۋىڭىزگە تىلەكتەسپىز», دەلىنگەن قۇتتىقتاۋدا.
امىرعالي مۇراتبەكوۆ 2005 جىلى ءۇرجار اۋدانىندا دۇنيەگە كەلگەن. شاڭعى جارىسىنان سپورت شەبەرى. 2024 جىلى شاڭعى جارىسىنان وتكەن قازاقستان چەمپيوناتتارىنىڭ جۇلدەگەرى, شاڭعى روللەرىنەن الەم كۋبوگىنىڭ جەڭىمپازى بولدى. 2025 جىلى شاڭعى جارىسىنان الەم چەمپيوناتىنا قاتىسىپ, قازاقستان رەسپۋبليكاسىنىڭ VI قىسقى سپارتاكياداسىنىڭ جۇلدەگەرى اتاندى. شاڭعى روللەرىنەن وتكەن ازيا كۋبوگىنىڭ ءۇش كەزەڭىندە جۇلدە الىپ, قازاقستان چەمپيوناتىنىڭ جەڭىمپازى بولدى. بىلتىر 19-28 جەلتوقسان ارالىعىندا شورتاندى قالاسىندا وتكەن قازاقستان كۋبوگىندە امىرعالي مۇراتبەكوۆ سكياتلون (20 شاقىرىم) جانە ماسس-ستارت (30 شاقىرىم) جارىستارىندا جەڭىسكە جەتتى. ناتيجەسىندە يتالياداعى 25-ءشى قىسقى وليمپيادا ويىندارىنا جولداما الدى.
ەل سپورتشىلارى قىسقى وليمپيادا ويىندارىندا قانداي كيىم ۇلگىسىمەن ونەر كورسەتەدى؟
ايتا كەتەيىك, قىسقى وليمپيادادا ەل نامىسىن 36 سپورتشى قورعايدى.
23 قاڭتار كۇنى پرەزيدەنت قىسقى وليمپياداعا قاتىساتىن ۇلتتىق قۇراما مۇشەلەرىنە مەملەكەتتىك تۋدى تاپسىردى.