جانجال ءتۇبى – جارناما: جاعىمسىز جاڭالىقتار قالاي ساتىلىمدى ارتتىرادى؟

ساراپشى ينديرا بەيسەكەەۆا economykz.org سايتىندا جاريالاعان پىكىرىندە سوڭعى جىلدارى ۆيرۋستىق جاڭالىقتاردىڭ برەندتەرگە اسەرى كۇشەيگەنىن ايتا كەلىپ, بۇل قۇبىلىس ماركەتينگ مۇمكىندىگىمەن قاتار بەدەلگە تونەتىن تاۋەكەلدى دە قاتار الىپ جۇرەتىنىن باعامدايدى.

ونىڭ پايىمداۋىنشا, اقش-تا Nike Tech Fleece سۇر سپورتتىق كوستيۋمىنىڭ ساتىلىمى كۇرت ءوسۋى وسى قۇبىلىستىڭ ايقىن مىسالى. ۆەنەسۋەلا پرەزيدەنتى نيكولاس مادۋرو ۇستالعان ساتتە ءدال وسى كوستيۋممەن تۇسكەن فوتوسۋرەت تاراعاننان كەيىن, ەشقانداي جارناماسىز-اق سۇرانىس ارتا باستاعان. كەيبىر ولشەمدەر Nike-ءتىڭ ونلاين-دۇكەنىندە تولىق ساتىلىپ كەتتى, ال مادۋرو كيگەن 3XL ولشەمى ۆيرۋستىق تالقىلاۋ باستالعاننان كەيىن ءبىر ساعات ىشىندە سايتتان جوعالىپ كەتكەن. 

ۆەنەسۋەلا كوشباسشىسى بۇگىن سوتقا تارتىلادى

ساراپشى بۇل جاعدايدى جەكە وقيعا ەمەس, كەڭىرەك ءۇردىستىڭ كورىنىسى رەتىندە سيپاتتايدى.

«بۇل سەنساتسيالىق نەمەسە داۋلى جاڭالىقتاردىڭ برەندكە وزدىگىنەن جارناما بولىپ, قوسىمشا ماركەتينگ شىعىندارىنسىز-اق ساتىلىمدى ارتتىرا الاتىنىن كورسەتەدى. الەۋمەتتىك جەلىلەر مەن مەمدەر داۋىرىندە ساياسي وقيعادان باستاپ ينتەرنەتتەگى كۇتپەگەن قىزىققا دەيىن كەز كەلگەن ەرەكشە جاعداي ميلليونداعان ادامنىڭ نازارىن اۋدارىپ, ناقتى تاۋارعا دەگەن سۇرانىستى كۇشەيتە الادى», دەيدى ينديرا بەيسەكەەۆا.

جارناما قۇدىرەتى

ول مۇنداي مىسالداردىڭ الەمدىك تاجىريبەدە ءجيى كەزدەسەتىنىن دە اتاپ وتەدى.

«2021 جىلى امەريكالىق تەسسيكا براۋن شاشقا ارنالعان لاكتىڭ ورنىنا Gorilla Glue قۇرىلىس جەلىمىن قاتەلەسىپ قولدانعان وقيعا ينتەرنەتكە تەز تاراپ, ۇلكەن رەزونانس تۋدىردى. كونتەكستى تەرىس بولعانىنا قاراماستان, برەندكە دەگەن قىزىعۋشىلىق كۇرت ارتتى. AdAge دەرەكتەرىنە سايكەس, Google-دا ءونىم اتاۋى بويىنشا ىزدەۋ ءبىر ايدىڭ ىشىندە 50 ەسە وسكەن, ال Amazon-داعى ىزدەۋ مىڭداعان پايىزعا كوبەيگەن», دەپ جازدى ساراپشى.

ينديرا بەيسەكەەۆا 2016 جىلعى اقش-تاعى پرەزيدەنتتىك دەباتتاردى دا مىسالعا كەلتىرەدى.

«قاراپايىم سايلاۋشى كەن بوۋننىڭ قىزىل سۆيتەرمەن كادرعا ءتۇسۋى ونى ءبىر ساتتە ينتەرنەت كەيىپكەرىنە اينالدىردى. سونىڭ ناتيجەسىندە Izod ماركاسىنىڭ ۇقساس سۆيتەرى بىرنەشە كۇننىڭ ىشىندە ەل بويىنشا تولىق ساتىلىپ كەتتى. بۇل ساياسي وقيعانىڭ كۇتپەگەن كوممەرتسيالىق اسەرگە قالاي اينالاتىنىن كورسەتەدى», دەيدى ول.

وسىعان ۇقساس قۇبىلىس 2021 جىلعى يناۋگۋراتسيا كەزىندە دە بايقالدى.

«بەرني ساندەرستىڭ قولدان توقىلعان قولعاپ كيگەن سۋرەتى جىلدىڭ ەڭ تانىمال مەمدەرىنىڭ بىرىنە اينالدى. كوممەرتسيالىق ماقساتتا جاسالماعان قولونەر بۇيىمى بىرنەشە كۇننىڭ ىشىندە ۆيرۋستىق تاۋارعا اينالىپ, اۆتورىن جەرگىلىكتى كومپانيالارمەن ىنتىماقتاستىق ورناتۋعا ءماجبۇر ەتتى», دەدى ساراپشى.

برەندتەردى بەيرەسمي تۇردە العا جىلجىتاتىن تاعى ءبىر فاكتور رەتىندە ينديرا بەيسەكەەۆا ساياسي جانجالدار مەن بويكوتتاردى اتايدى.

«2020 جىلى Goya Foods كومپانياسىنىڭ باسشىسى دونالد ترامپتى قولداعاننان كەيىن بويكوت ناۋقانى باستالدى. بىراق پارادوكس مىنادا: ەكى اپتا ىشىندە كومپانيانىڭ ساتىلىمى 22 پايىزعا ءوستى. كوپ جاعدايدا بۇل بويكوتقا قارسى رەاكتسيا رەتىندە قالىپتاستى», دەيدى ول.

ساراپشى كەيدە ءبىر برەندكە باعىتتالعان سىننىڭ باسقا وندىرۋشىلەرگە نەمەسە تۇتاس سالاعا پايدا اكەلەتىنىن دە ەسكە سالادى.

«2025 جىلى Prada ءۇندى Kolhapuri ساندالدارىنا ۇقساس اياقكيىم كورسەتكەننەن كەيىن مادەني يەمدەنۋ ايىبىنا ۇشىرادى. ناتيجەسىندە كوممەرتسيالىق پايدا ءىرى ءسان ۇيىنە ەمەس, جەرگىلىكتى قولونەرشىلەرگە ءتيدى. بۇل مەديالىق قىسىم نارىقتاعى سۇرانىستى قالاي قايتا باعىتتاي الاتىنىن ايقىن كورسەتتى», دەپ جازدى ي.بەيسەكەەۆا.

ءسوز سوڭىندا ينديرا بەيسەكەەۆا ۆيرۋستىق تانىمالدىقتىڭ بيزنەس ءۇشىن تەك مۇمكىندىك ەمەس, جاۋاپكەرشىلىك ەكەنىن اتاپ وتەدى.

ء«ونىم قالاۋسىز سەبەپپەن ترەندكە اينالسا, كومپانيا ۇستامدى رەاكتسيا تانىتۋى كەرەك. الەۋمەتتىك جانە ساياسي كونتەكستى ەسكەرۋ, مادەني قاقتىعىستارعا ەتيكالىق جاۋاپ بەرۋ ماڭىزدى. ۇزاق مەرزىمدى پەرسپەكتيۆادا بەدەل مەن جاۋاپتى بيزنەس قاعيدالارى كەز كەلگەن “تەگىن” جارنامادان دا قىمبات», دەپ تۇيىندەيدى ساراپشى.