«ورنىندا بار وڭالار» دەيدى حالقىمىز. ءبىز تاۋەلسىزدىك العاننان بەرگى جىلدار ىشىندە ۇلتتىق قۇندىلىقتارىمىزدى قالپىنا كەلتىرىپ, ءتىلىمىزدىڭ دە, ءدىنىمىزدىڭ دە, تاريحىمىزدىڭ دا وشكەنىن جاندىرىپ, بارىن باياندى ەتە باستادىق. وعان كۇنى كەشە ەلىمىزدىڭ ايدىنى مەن ايبارىنا اينالعان ارۋ استانادا بىردەن 14 كوشە اتاۋىنىڭ وزگەرۋى دالەل بولسا كەرەك.
«استاناداعى كوشەلەردىڭ نەگىزگى بولىگى قازاق تىلىندەگى اتاۋلارعا يە. بۇل استانا قالاسىنداعى كوشە اتاۋلارىنىڭ 93 پايىزى قازاق تىلىندە دەگەن ءسوز. ەلوردادا 934 كوشە بولسا, ونىڭ نەگىزگى بولىگىنە مەملەكەتتىك تىلدە اتاۋ بەرىلگەن. بۇل رەتتە ەلوردامىز ۇلگى تۇتۋعا لايىق», دەيدى استانا قالاسى تىلدەردى دامىتۋ باسقارماسىنىڭ باسشىسى ەربول تىلەشوۆ.
«ەشتەن – كەش جاقسى» دەگەندەي استانا استانا بولعان 16-17 جىلدىڭ ىشىندە قازاقتىڭ ۇلى اكادەميگىنە ءالى كۇنگە دەيىن كوشە اتى بۇيىرماسا, بۇگىن سول ولقىلىقتىڭ ورنى تولدى: ەلورداداعى لەۆون ميرزويان اتىنداعى كوشە استانا قالالىق ءماسليحاتىنىڭ 5-شاقىرىلعان كەزەكتەن تىس سەسسياسىنىڭ شەشىمىمەن قانىش ساتباەۆ كوشەسى بولىپ وزگەرتىلدى.
بۇعان دەيىن رەسپۋبليكالىق مەرزىمدى باسىلىمدار مەن ەلەكتروندى بۇقارالىق اقپارات قۇرالدارىندا تالاي مارتە كوتەرىلىپ, قوعام تالقىسىنا سالىنعان استاناداعى ميرزويان كوشەسى بۇدان بىلاي قازاقتىڭ تۇڭعىش اكادەميگى قانىش ساتباەۆتىڭ ەسىمىمەن اتالاتىن بولدى. تورەشى – ۋاقىت دەگەن وسى.
استانا قالاسىنىڭ ونوماستيكالىق كوميسسياسى ۇكىمەت جانىنداعى رەسپۋبليكالىق ونوماستيكا كوميسسياسىمەن كەلىسىلگەن كوشەگە اتاۋ بەرۋ جانە قايتا وزگەرتۋ تۋرالى جەكەلەگەن ازاماتتاردان, قوعامدىق ۇيىمدار مەن جۇرتشىلىق وكىلدەرىنەن كەلىپ تۇسكەن وتىنىشتەر مەن ۇسىنىستاردى قاراپ, تومەندەگىدەي قورىتىندىعا كەلدى. ونى استانا قالالىق ءماسليحاتىنىڭ سەسسياسىندا دەپۋتاتتار ءبىراۋىزدان بەكىتتى. ەندەشە, التى الاش جۇرتىنا جاعىمدى جاڭالىق جەتكىزىپ, ءسۇيىنشى سۇراۋدىڭ رەتى كەلىپ-اق تۇر.
سونىمەن, استانا قالاسىنداعى 119-كوشەگە شىڭعىس ايتماتوۆتىڭ, ە-352 جوبالىق كوشەسىنە بۋداپەشت, 142-جوبالىق كوشەسىنە وزبەكالى جانىبەكوۆتىڭ, 209-جوبالىق كوشەسىنە ۇزاق باتىردىڭ, 203-جوبالىق كوشەسىنە جامەڭكە ابىزدىڭ, 188-كوشەگە شايمەردەن قوسشىعۇل ۇلىنىڭ, 200-كوشەگە ءىلياس وماروۆتىڭ, 59-جوبالىق كوشەسىنە جانتاي باتىردىڭ, ە-487 جوبالىق كوشەسىنە زەيىن شاشكيننىڭ, ە-107 جوبالىق كوشەسىنە ءامينا ومىرزاقوۆانىڭ, نۇرعيسا تىلەنديەۆ ورامىنا اسپانديار كەنجيننىڭ, جەرۇيىق كوشەسىنە (3-4 پيكەت) راقىمجان دۇيسەنباەۆتىڭ, ل.ميرزويان كوشەسىنە قانىش ساتباەۆتىڭ ەسىمىن بەرۋ تۋرالى ۇسىنىستار قولداۋ تاپتى. سونداي-اق, دارابوز كوشەسى مەن اسقار توقپانوۆ كوشەلەرى بىرىكتىرىلىپ, اسقار توقپانوۆ كوشەسى دەپ قايتا اتالاتىن بولدى.
استانا قالاسى الداعى ۋاقىتتا دا وسىنداي ونەگەلى ىستەردىڭ ۇيىتقىسى بولا بەرسىن!
«ەگەمەن-اقپارات».