ءتۇرلى جاس ەرەكشەلىكتەرى بويىنشا باحرەين استاناسى – مانامادا وتكەن WTT Youth Contender ءتۋرنيرىن ەلىمىزدىڭ ۇستەل تەننيسشىلەرى ءۇش جۇلدەمەن قورىتىندىلادى. U11 ساناتىنداعى باسەكەدە ادەل ۆەبەر كۇمىسپەن كۇپتەلسە, قادىرعالي قابدىلۋاحيتوۆ پەن نۇريسلام قاسىم جۇپتىق سايىستاردا قولاعا قول جەتكىزدى.
حالىقارالىق فۋتبول تاريحى مەن ستاتيستيكاسى فەدەراتسياسى (IFFHS) بىلتىرعى جىلدىڭ قورىتىندىسى بويىنشا الەمنىڭ ەڭ ۇزدىك كلۋبتارىنىڭ رەيتينگىن جاريالادى. مىقتىلار كوشىن فرانتسيانىڭ پسج-سى باستاپ تۇر. پاريجدىكتەردى ءمادريدتىڭ «رەالى» مەن لوندوننىڭ «چەلسيى» وكشەلەپ كەلەدى. ەلىمىزدىڭ چەمپيونى – «قايرات» بۇل تىزىمدە 235-ورىندا تۇر. «استانا» 692, «توبىل» 710-ساتىعا تۇراقتادى.
شايبالى حوككەيدەن ىستانبۇلدا ءوتىپ جاتقان قىزداردىڭ ەكىنشى ديۆيزيونداعى كوماندالار اراسىنداعى الەم بىرىنشىلىگىندە ەلىمىزدىڭ قۇراماسى لاتۆيانى 9:1 ەسەبىمەن ويسىراتا ۇتتى. ماتچتا سوفيا مۋراۆەۆا حەت-تريك جاساسا, سوفيا زۋبكوۆا مەن رەناتا ليۆشيتس دۋبل اۆتورى اتاندى. ۆاسيليسا شۋكلينا مەن انفيسا نوۆيكوۆا ءبىر-ءبىر گولدان سوقتى. ەستەرىڭىزگە سالا كەتەيىك, العاشقى كەزدەسۋدە جەرلەستەرىمىز جاڭا زەلانديانىڭ 13:2 ەسەبىمەن تاس-تالقانىن شىعاردى.
28 جاستاعى تانىمال برازيليالىق فۋتزالشى, ليبەرتادورەس كۋبوگىنىڭ يەگەرى يگور كاريوكا الماتىنىڭ «قايراتىمەن» 1,5 جىلدىق مەرزىمگە كەلىسىمشارتقا وتىردى. بۇعان دەيىن ءوز ەلىندە, يسپانيا مەن يتاليانىڭ بەلدى كوماندالارىندا جاسىنداي جارقىلداعان امبەباپ ويىنشى كەيىنگى كەزدەرى سان-پاۋلۋدىڭ «كورينتيانسىنىڭ» قۇرامىندا بولدى. الماتىنىڭ «قايرات» فۋتبول كلۋبى ۋەفا چەمپيوندار ليگاسى جالپى كەزەڭىنىڭ 7-تۋرىندا ەسە جىبەردى. «استانا ارەنا» ستاديونىندا الماتىلىق كوماندا ويىنشىلارى بەلگيانىڭ «بريۋگگە» كلۋبىنان 1:4 ەسەبىمەن ويسىراي ۇتىلدى. ماتچتىڭ 32-مينۋتىندا الەكساندر ستانكوۆيچ ەسەپ اشسا, حانس ۆاناكەن – 38, رومەو ۆەرمانت – 74, برەندون مەحەلە 84-مينۋتتا ەنشىلەرىنە گول جازىپ, ەسەپتى ەسەلەدى. «قايرات» ساپىنان ادىلەت سادىبەكوۆ 90+2-مينۋتتا ەسەپ ايىرماسىن قىسقارتتى. الماتىلىق جاس ويىنشى الاڭعا 76-مينۋتتا شىقتى. «قايرات» چەمپيوندار ليگاسىندا قاتارىنان ءتورتىنشى رەت جەڭىلىس تاۋىپ وتىر. ءسويتىپ, جەتى تۋردان كەيىن ءبىر ۇپاي عانا ولجالاعان رافاەل ءۋرازباحتيننىڭ كومانداسى پلەي-وفف كەزەڭىنە شىعۋ مۇمكىندىگىنەن ايرىلدى. سوڭعى تۋردا الماتىلىقتار 28 قاڭتاردا «ارسەنال» (لوندون, انگليا) كومانداسىنا قارسى سىرت الاڭدا وينايدى.
5-7 اقپان ارالىعىندا يتاليانىڭ تۋرين قالاسىندا راپيرامەن سەمسەرلەسۋدەن گران-پري دوداسى وتەدى. اپەننين تۇبەگىندە سوفيا اقتاەۆا, اليونا گنوەۆا, عالىم نۇرىموۆ, تيموفەي سەميونوۆ سىندى نوياندارىمىز ونەر كورسەتەدى.
تولياتتيگە (رەسەي) ساپار شەككەن «بارىس» حوككەي كلۋبى جەرگىلىكتى «لادامەن» كەزدەستى. جەرلەستەرىمىزدىڭ جارىس كەستەسىنىڭ ەڭ سوڭعى ورنىندا كەلە جاتقان كومانداعا ءالى جەتپەدى, ايدىن يەلەرى 2:0 ەسەبىمەن جەڭىسكە جەتتى.